ఓటర్లంటే...
బిక్షగాళ్లు కాదని...
నేతల తలరాతలు
వ్రాసే బ్రహ్మదేవుళ్ళని...

ఓటర్లంటే...
అవసరమైతే
అందలమెఎక్కిస్తారని...
మోసం చేసే దోచుకునే దొంగల్ని
అధఃపాతాళానికి అణగద్రొక్కుతారని...

ఓటర్లంటే...
నిస్వార్థంతో...
నిత్యం ప్రజాసేవలో...
నిమగ్నమయ్యే వారిని 
ప్రత్యక్ష దైవాలుగా ఆరాధిస్తారని...

ఐదేళ్ళకోసారి దర్శనమిచ్చే..‌.
వాగ్దానాల వర్షం కురిపించే...
ప్రజాసమస్యలు పట్టించుకోని
బడానాయకుల భారతం పడతారని...

ఓటర్లంటే...
అమాయకులు కాదని...
తలలు పండిన నాయకుల్ని
సైతం మట్టి కరిపించే మాంత్రికులని...

ఓట్లకోసం...
భారీ మెజారిటీకోసం...
ప్రత్యర్ధి పై గెలుపు కోసం...
ఎన్నో కలలుకంటూ ఎన్నికల బరిలో
దిగిన అభ్యర్థులందరికి...అర్థం కావాలి...!
అర్థమైంది..అందుకే ఓటరు దేవుళ్ళారా..!
మీకు వందనాలు..! పాదాభివందనాలు..!