మొన్న...అట్టడుగున
ఊరికి చిట్టచివరన ఉన్న

నిన్న...విద్యకు...
విజ్ఞానానికి...ఆర్థిక వనరులకు...
ఆయుధాలకు...ఆమడదూరంలో ఉన్న

నేడు...
పూరిగుడిసెల్లో పుట్టి...
ఆకలికి అలమటించి...
స్వేచ్ఛాస్వాతంత్ర్యాల కోసం...
సంఘంలో సమానత్వం కోసం...
చేజారిన పౌరహక్కుల పరిరక్షణ కోసం...
ఆత్మగౌరవం కోసం పోరాడిన...పరితపించిన

ఈ కొండ జాతి మనుషులు...
ఈ భరతమాత ముద్దుబిడ్డలు...
ఈ దగాబడ్డ దళితజాతి మేధావులైన
శ్రీ కె. ఆర్ నారాయణన్ గారు
10వ రాష్ట్రపతిగా...
శ్రీ రామ్ నాద్ కోవింద్ గారు
14వ రాష్ట్రపతిగా...
శ్రీమతి ద్రౌపది ముర్ము గారు
15వ రాష్ట్రపతిగా...
నా భారతదేశ అత్యున్నత
అధికారపీఠాన్ని అధిరోహించినందుకు...

సాహసోపేతమైన
ఈ రాజకీయ నిర్ణయాన్ని
హర్షించాలా...? విమర్శించాలా....?
హర్షించి తీరాలి
కలనైనా ఊహించని
ఈ సువర్ణావకాశానికి...
అభినందించాలా...?అనుమానించాలా...?
అభినందించి తీరాలి...కారణం

ఒకనాడు
అమరజీవి అంబేద్కర్
కలగన్నది...కలవరించింది
చివరిశ్వాస వరకు పోరాడింది...
అట్టడుగున ఉన్న ఈ జాతి
ఈ అభ్యున్నతి కోసమే...
ఈ ఆత్మ గౌరవం కోసమే...
ఈ అధికార పీఠం కోసమే...
ఈ అత్యున్నత హోదా కోసమే...

అందుకే ఎంతో ముందుచూపుతో
ఓ నా భారతమాత ముద్దుబిడ్డలారా !
మీ ఆరాటం...
మీ పోరాటం...
మీ ఆశయం...
మీ ఆలోచనలు...
అన్నీ ఆకాశం వైపే...
తూర్పున ఉదయించే
ఆ సూర్యోదయం కోసమే...
చీకటిలో చితికిన మీ బ్రతుకులు
వెలుగుమయం కావడం కోసమే...
అన్న ఆ స్పూర్తి ప్రదాత...
భారత రాజ్యాంగ నిర్మాత
అమరజీవి అంబేద్కర్ ని
సదా స్మరించుకొంటూ...

నేడు 15 రాష్ట్రపతిగా అత్యున్నత పదవిని

అలంకరించింది శ్రీమతి ద్రౌపది ముర్ము...