గట్టున గడ్డిమేసే గాడిదకేమి తెలుసు ? 

పొలం‌ సేద్యంలో ఎంత సంతోషం !

ఎంత సంబరం దాగివుందో !

బురదంటే ఎంత సరదో !

ఎంత సంతోషమో !ఎంత సంబరమో ‌ !

విత్తనాలు చల్లడంలో ఎంత వినోదమో !

నవనవలాడే పచ్చని పైరును చూస్తుంటే 

ఎంత ఆనందమో పరమానందమో !

ఫలితం దక్కీ పంట చేతికందితే 

ఎంతటి ఆత్మతృప్తో !

ఎంతటి గర్వమో ఎంతటి గౌరవమో !

ఎంతటి శాంతి సౌభాగ్యమో ! కానీ

కరువు కాటువేసిందని ఊరంతా 

అప్పులై ఊపిరాడడంలేదని

తీర్చేదారిలేదని బ్రతుకేనరకమని

కనిపించని మానసిక వేదనతో 

మదనపడి మదనపడి  

నలిగిపోయి నలిగిపోయి

కృంగిపోయి కృంగిపోయి 

కుమిలిపోయి కుమిలిపోయి

ఆత్మన్యూనతతో అర్థాంతరంగా

ఆత్మహత్య చేసుకున్న ఓ రైతన్నా !

నీవు "స్వర్గానికెళ్లి" ఉండొచ్చు 

కానీ నీ భార్య బిడ్డలిక్కడ

"నరకాన్ని" అనుభవిస్తున్నారే... అయ్యే

ఓ రైతన్నా ! ఆవేశంలో ఎంతపని చేశావన్నా !

నీ భార్యాబిడ్డలకు ఎవరు దిక్కన్నా చెప్పన్నా! 

నేడు ఆరని వారి ఆకలికేకలే చెబుతున్నాయి

అర్థాంతరంగా ఇలా ఏ రైతుగుండె ఆగిపోరాదని

ఆవేశంతో ఆత్మహత్యలకు పాల్పడి 

గుండెల్ని చీల్చి కుటుంబాల్ని కూల్చి 

ఆధారపడిన వారిని అనాధల్నిచేసి వెళ్లిపోరాదని

ఆగని వారి కన్నీటిధారలే  అరిచిచెబుతున్నాయి

పోరాడి పోరాడి ఓడినా అది గెలుపేనని

"పొలందున్నే రైతు"కూడా ఒక "పోరాడే యోధుడేనని"