ఓ మనిషీ..!
ఈ విశాల విశ్వంలో
ఈ సూర్యుని క్రింద
ఈ భూమిపైన
నమ్మశక్యం కాని
ఎన్ని వింతలో..?
ఎన్ని విచిత్రాలో...?
ఎన్ని ధర్మ సందేహాలో..?

నీకు కంటినిచ్చిందెవరు..?
ఆ దైవమే..! ఐతే
ఆ కంటికి చూపును...
ఆ కంటికి వెలుగును...
ఆ కంటికి కనురెప్పలను...
ఆ కంటికి నిద్రను...
ఆ కంట్లో కన్నీరు
నిచ్చిందెవరు..? ఆ దైవమే..! ఐతే

ఆ కన్నీటిని తుడిచే వ్రేలును...
ఆ మనిషిని ఓదార్చే ఒడిని...
ఆపదలో ఆదుకునే హస్తాన్ని...
ఆత్మీయతను పంచే...
సకాలంలో స్పందించే...
హృదయాన్నిచ్చిందెవరు..?
ఆ దైవమే..! ఐతే...
ఆ దైవాన్ని ప్రత్యక్షంగా దర్శించి ఈ
ధరణిలో ధన్యులైన ఆ పుణ్యాత్ములెవరు?

గడ్డితినని పులిని
సృష్టించిందెవరు..?
ఆపులికి ఆహారంగా
జింకలు పుట్టించిందెవరు..?
ఆ దైవమే..? ఐతే

ఆ ఆకాశంలో ఆ నీలి నీలి
మేఘాలను సృష్టించిందెవరు..?
ఆ మేఘాలను
నీటిబింధువుల్తో నింపిందెవరు..?
ఆ దైవమే..! ఐతే

కనిపించని ఆ గాలిని
సృష్టించిందెవరు..?
ఆగాలి ఎటునుంచి
ఎటువైపుకు ఎందుకు
పయనిస్తుందో ఎవరికి ఎరుక..?
ఆ దైవానికే..! ఐతే...
ఆ దైవాన్ని ప్రత్యక్షంగా
దర్శించి ఈ ధరణిలో
ధన్యులైన ఆ పుణ్యాత్ములెవరు..?

ఓ మనిషీ..!
ఎక్కడో పుట్టి
ఎక్కడో పెరిగే ఇద్దరు
యువతీయువకులను
భార్యాభర్తలుగా గుర్తించి
వారిని మూడు ముళ్లబంధంతో
ముడివేసేదెవరు..?
ఏకాంతంగా ఆ ఇద్దరినీ
ఓగదిలో దాచేదెవరు..? ఎందుకు..?

ఒక తల్లిగర్భంలో
పిండాన్ని సృష్టించేదెవరు..?
పుట్టబోయే ఆ బిడ్డ
ఆడో మగో నిర్ణయించేదెవరు..?
తల్లి రక్తాన్ని పాలగా
మార్చేదెవరు..? ఆ దైవమే..!

ఈ సృష్టికిమూలం
ఆ దైవమే..! ఐతే
ఆ దైవాన్ని ప్రత్యక్షంగా
దర్శించి ఈ ధరణిలో
ధన్యులైన ఆ పుణ్యాత్ములెవరు..?

ఓ మనిషీ..!
అదృశ్యుడైన
ఆ దైవాన్ని ప్రత్యక్షంగా
కళ్లతో దర్శించిందెవరు..? 
ముఖాముఖిగా
మాట్లాడిందెవరు..?
అఖండ తేజోమయుడైన...
అత్యంత శక్తి స్వరూపుడైన...
సూర్యున్ని తమ నేత్రాలతో
దర్శించుకోలేని ఈ నరులు...

ఆ సూర్యున్నే సృష్టించిన
ఆ దైవాన్ని ఎలా దర్శించుకోగలరు..?
అది అసాధ్యమే..! అసంభవమే..!
అవివేకమే..! అజ్ఞానమే..! అత్యాశే..!
అది ఒక చిదంబర రహస్యమే...అది
అర్థంకాని ఓ ప్రకృతిమర్మమే సృష్టిధర్మమే.