మెల్లగా నడుస్తుంది
చకచకా పరుగులు
పెడుతుంది ఆపై
నురగలు గ్రక్కుతూ...

కొంత దూరం
నిర్మలంగా...నిశ్చలంగా...
ప్రశాంతంగా ప్రయాణిస్తుంది...

కడలి ఒడిని చేరేవరకు
బాటసారులెందరికో
తీరని దాహాన్ని తీరుస్తుంది...

ఎన్నో బీడు భూములను
సస్యశ్యామలం చేస్తుంది...
పచ్చని పంటలనిచ్చి రైతుల
బ్రతుకుల్లో వెలుగులు నింపుతుంది...

ఎందరికో ఆకలిమంటలు తీర్చి...
కడకు కడలిలో కలిసి పోతుంది..
ఉప్పగా మారిపోతుంది...
నది తన ఉనికినే కోల్పోతుంది...

కన్నుమూసిన జీవాత్మ
పరమాత్మలో కలిసిపోయినట్లు...