ఓ మిత్రమా! 
లక్షలు సంపాదించావు 
లక్షాధికారి వయ్యావు 
కోట్లు సంపాదించావు
కోటీశ్వరుడివయ్యావు
 
పెరుగుతున్న 
ఈ సంపాదనలో పడి
తిరుగుతున్న నీ 
ఆయుస్సును గురించి 
ఆలోచించడం మానివేశావు
ఆర్జించిన నీ ఆస్తిని 
అనుభవించడం మర్చిపోయావు 
 
మరి ఇంకెంతకాలం
ఇలా శ్రమిస్తావు? 
ఇంకెప్పుడు ఆర్జించిన
నీ ఆస్తిని అనుభవిస్తావు? 

పైనుండి పిలుపురాగానే 
పరలోకం చేరక తప్పదు కదా 
నాడు నీ కష్టార్జితమంతా 
పరులపాలే కదా 

చీమలు పెట్టిన పుట్టల్లో 
పాములు దూరినట్లు 
రాత్రింబవళ్లూ రక్తం ధారపోసి
నీవు ఆర్జించిన నీ ఆస్తినంతా 
ఎవరో అపరిచితులు
ఎవరో అదృష్టవంతులు
హాయిగా అనుభవించెదరు కదా
 
ఇందుకేనా నీవంతగా
కడుపుమాడ్చుకొని కష్టపడింది ?
ఇందుకేనా నీవన్ని
త్యాగాలు చేసి ఇంత ఆస్తినార్జించింది?
అందుకే ఓ మిత్రమా! 
ఇప్పుడైనా ఇకనైనా ఒక్కక్షణం ఆలోచించు! 
పిల్లలకు ముందు ప్రేమను ఆపై ఆస్తిని పంచు!
ఆశపడి భ్రమపడి శ్రమపడి ఆర్జించిన నీ ఆస్తిని
కొంచెమైనా అనుభవించు ! ఆపై తృప్తిగా అస్తమించు!