ఆకాశంలోఎగిరే పక్షులకు తెలుసు
ఆహారం ఎక్కడ దొరుకుతుందో...
అడవిలో తిరిగే మదపుటేనుగులకు తెలుసు
మంచినీటి సరస్సులెక్కడుంటాయో...

చెరువు గట్టుకుచేరి తొంగితొంగి చూసే
కొంగలకు తెలుసు చేపలెక్కడ చిక్కుతాయో...
ఎక్కడోవున్న రాబందులకు తెలుసు
చచ్చిన కళేబరాలెక్కడ పడివుంటాయో...

పుట్టలోని చలిచీమలకు తెలుసు
ఎక్కడ చెక్కెర బెల్లంముక్క పడివుందో..
కోర్టులోని న్యాయమూర్తులకు తెలుసు
ఎవరు నేరస్తులో ? ఎవరు నిర్థోషులో?...
పోలీసు బాసులకు తెలుసు
హత్యచేసింది ఎవరో ఆ హత్యవెనుక
ఏ అధికారి అదృశ్య హస్తముందో...

రాత్రులందు రెక్కీలు నిర్వహించే దొంగలకు తెలుసు
ఏ ఇళ్ళు దోచుకోవచ్చో ఎలా‌ఈజీగా తప్పించుకోవచ్చో
దొరల్లా తిరిగే దోపిడి దొంగలకు తెలుసు
దోచుకున్నదీ ఏస్విస్ బ్యాంక్ లో ఎలా దాచుకోవచ్చో

కానీ...ఈ మనిషికి తెలియనివి రెండే
ఒకటి...రేపు తనకు పుట్టబోయే బిడ్డా
ఆడా మగా అమ్మాయా‌ అబ్బాయాయని...
రెండు...రేపటి‌ రోజున ఆ మృత్యువు
ఏ రూపంలోవచ్చి తనను కబళిస్తుందోనని...