అరుణోదయ వేళ
"కాకి" కావు కావుమని...
అరుచుచుండు కర్ణకఠోరంగా...
కొమ్మల్లో "కోయిలమ్మ"
కుహు కుహుఅని ...
కూయుచుండు కమ్మగా...
పసందుగా...వీనుల విందుగా...

"కంచు" మ్రోగునట్టు
కనకంబు మ్రోగకకున్ననేమి...
కంచు మెరుపు కన్న
"బంగారునగ" మెరుపే మిన్న...

జలజలమని
"జలపాతంలా"దూకకున్ననేమి...
గలగలమని
"సెలయేరులా" పారకున్ననేమి...
"జీవనది" ప్రవహించు...
నిర్మలంగా...నిశ్చలంగా
పంటలకు ప్రాణం పోస్తు...
దారిలో దాహార్తి తీరుస్తు...

నిదానంగా...నిశ్శబ్దంగా 
ప్రయాణించు..."నిజం"...
సప్తసముద్రాలు
అరనిముషంలో
దాటిపోవు..."అబద్ధం"...

తిన్నింటివాసాలు లెక్కెట్టు
జిత్తులమారి "టక్కరి నక్క"...
తిండిపెట్టిన యజమాని కోసం
ప్రాణత్యాగానికైనా సిద్దమౌ
విశ్వాసం గల "కాపలా కుక్క"...