చిన్న మొక్కేకదాని...
పీకకు...పీక కోసేస్తా...
అన్నది నిన్నటి
ఓ సినిమాలో నటుని
సూపర్ హిట్ డైలాగ్

ఔను మిత్రమా...
చిన్న నిప్పురవ్వే కదాని...
వదిలేయకు...కారడివినే
అది కాల్చి బూడిద చేస్తుంది...

చిన్న రంధ్రమే కదాని...
నిర్లక్ష్యం చేయకు...అది పెద్ద
ఓడనే నీటిలో ముంచేస్తుంది...

చంచడే కదాని...
కాస్త కాస్త తోడేయకు...
కళ్ళముందే వంటపాత్ర
పూర్తిగా ఖాళీ ఐపోతుంది...

నాటి కామాంధులకది
చిన్నివిషయమే కావచ్చు...
కానీ లంకాదహనానికి...
రాక్షస సంహారానికి...
రావణరాజ్యం
కుప్పకూలిపోవడానికి
ఏమిటీ అసలు కారణం...
తల్లి సీతమ్మ అపహరణం...

అందుకే అంటారు పెద్దలు...
విజ్ఞులు...అనుభవగ్నులు...
చరిత్ర చెబుతోందని...
చిన్న విషయాలు
చీపురుపుల్లలు కాదని
అవి అగ్గిపుల్లలని...
వాటిపై సైతం కూసింత
దృష్టి పెట్టమని...
నిద్రపోక నిఘా ఉంచమని...
నిఘా ఉంచుకున్న...
నిర్లక్ష్యం వహించిన...
రేపు నీ జీవితంలో
కురిసేది నిప్పుల వర్షమేనని...