TeluguOne Health
● # Tweets

Download the TeluguOne App

Choose your platform to continue

సెనా దేశాలపై ఓపెనర్ గా సెంచరీలు: కేఎల్ రాహుల్ అరుదైన ఘనత.!

Published on: Sat Nov 21, 2026 8:25AM

న్యూజిలాండ్‌తో జరుగుతున్న తొలి టెస్టు మ్యాచ్‌లో భారత ఓపెనర్ కేఎల్ రాహుల్ అరుదైన ఘనతను సొంతం చేసుకున్నాడు. వెల్లింగ్టన్‌ వేదికగా సాగుతున్న పోరులో మూడో రోజు శతకం బాదిన రాహుల్, దక్షిణాఫ్రికా, ఇంగ్లండ్, న్యూజిలాండ్, ఆస్ట్రేలియా (సేనా - SENA) దేశాలన్నింటిలోనూ టెస్టు సెంచరీలు   చేసిన తొలి టీమ్ ఇండియా ఓపెనర్‌గా రికార్డు సృష్టించాడు.  

న్యూజిలాండ్ తొలి ఇన్నింగ్స్‌లో 368 పరుగులకు ఆలౌట్ కాగా, ఆ తర్వాత బ్యాటింగ్ ప్రారంభించిన భారత్‌కు రాహుల్, యశస్వి జైస్వాల్ శుభారంభం అందించారు. రెండో రోజు ఆట ముగిసే సమయానికి 52 పరుగులతో అజేయంగా నిలిచిన రాహుల్, మూడో రోజు లంచ్‌ సమయానికి 93 పరుగుల వద్దకు చేరుకున్నాడు. అనంతరం శతకం పూర్తి చేసుకోవడం ద్వారా న్యూజిలాండ్ గడ్డపై తన తొలి టెస్టు శతకాన్ని ఖాతాలో వేసుకున్నాడు.

ఈ శతకంతో రాహుల్  పలు మైలురాళ్లు  అందుకున్నాడు. భారత క్రికెట్ చరిత్రలో అన్ని సేనా దేశాల్లో టెస్టు సెంచరీలు సాధించిన ఐదో బ్యాటర్‌గా నిలిచాడు. గతంలో సచిన్ టెండూల్కర్, విరాట్ కోహ్లీ, రాహుల్ ద్రవిడ్, మహ్మద్ అజారుద్దీన్ మాత్రమే ఈ ఘనత సాధించగా, ఓపెనర్‌గా ఈ ఫీట్ చేసిన తొలి భారతీయుడిగా రాహుల్ నిలిచాడు. ఆసియా ఓపెనర్ల విషయానికి వస్తే పాకిస్థాన్ మాజీ బ్యాటర్ సయీద్ అన్వర్ తర్వాత ఈ జాబితాలో చేరిన రెండో ఆటగాడిగా గుర్తింపు పొందాడు.

ఇక పోతే టీమ్ ఇండియా ఓపెనర్ బ్యాటర్ గా  అత్యధిక టెస్టు సెంచరీలు చేసిన జాబితాలో మురళీ విజయ్ (12)తో రాహుల్ సమంగా నిలిచాడు. ఈ జాబితాలో సునీల్ గవాస్కర్ (33), వీరేంద్ర సెహ్వాగ్ (22) తొలి రెండు స్థానాల్లో ఉన్నారు. న్యూజిలాండ్‌లో టెస్టు శతకం సాధించిన నాలుగో భారత ఓపెనర్‌గా కూడా రాహుల్ రికార్డులకెక్కాడు.

ఇది కూడా చదవండి:  రాజ్‌కోట్‌లో రికార్డు సృష్టించిన యువ బ్యాటర్ రాహుల్​

రెండో రోజు ఆటలో యశస్వి జైస్వాల్ వేగంగా 85 పరుగులు చేసి పెవిలియన్ చేరినప్పటికీ, రాహుల్ మాత్రం వికెట్‌ను కాపాడుకుంటూ ఇన్నింగ్స్‌ను ముందుకు నడిపించాడు. మూడో రోజు దేవదత్ పడిక్కల్‌తో కలిసి రెండో వికెట్‌కు కీలక భాగస్వామ్యాన్ని నెలకొల్పడం ద్వారా న్యూజిలాండ్ బౌలర్లపై ఒత్తిడి పెంచాడు. 

ప్రస్తుత ప్రపంచ టెస్టు ఛాంపియన్‌షిప్   సైకిల్‌లోనూ రాహుల్ నిలకడైన ప్రదర్శనతో భారత్ తరఫున అత్యధిక పరుగులు చేసిన ఆటగాడిగా ముందుకెళ్తున్నాడు.
రాహుల్ సెంచరీతో  తొలి టెస్టులో  టీమ్ ఇండియా ఆధిక్యం దిశగా సాగుతోంది. పెద్ద స్కోరు నమోదు చేయగలిగితే, నాలుగో ఇన్నింగ్స్‌లో న్యూజిలాండ్‌పై ఒత్తిడి తీసుకురావడం భారత బౌలర్లకు సులభమవుతుంది.   

మీకు నచ్చవచ్చు:  IND vs WI: కేఎల్ రాహుల్ అద్భుత శతకం.. మూడో వన్డేలో భారత్ భారీ స్కోరు.!​

ఐదో వన్డేలో టీమ్ ఇండియా విజయం: సిరీస్ కైవసం.!​

[KL Rahuls century, Record, SENA, Countries, India vs New Zealand, WellingtonTest, TeluguOne]