అర్నాబ్, మురసు పెను తుపానుల నష్టం నుంచి తేరుకోకముందే, ఆ తుపానుల వల్ల సంభవించిన నష్టం అంచనాకు కేంద్ర బృందం రాష్ట్రంలో పర్యటిస్తున్న వేళ ఆంధ్రప్రదేశ్ రాష్ట్రంపై మరో తుపాను దండెత్తనుంది.   బంగాళాఖాతంలో ఏర్పడిన అల్పపీడనం బలపడి వాయుగుండంగా మారి రాష్ట్రంపై దండెత్తుతోంది.  కోస్తా  రాయలసీమ జిల్లాలపై ఈ తుపాను ప్రభావం చూపనుంది.  ఇప్పటికే రాష్ట్రం వరుస తుపానుల కారణంగా తీవ్ర ఇబ్బందులను ఎదుర్కొన్న విషయం తెలిసిందే. ఈ వాతావరణ శాఖ చేసిన తుపాను హెచ్చరిక ప్రజలను బెంబేలెత్తిస్తోంది.  

 వాతావరణ శాఖ హెచ్చరికల ప్రకారం, ఆగ్నేయ బంగాళాఖాతం,  దాన్ని ఆనుకుని ఉన్న ప్రాంతాల్లో కేంద్రీకృతమైన వాయుగుండం పశ్చిమ వాయవ్య దిశగా కదులుతూ మరింత బలపడి తుపానుగా మారుతుంది.  దీని ప్రభావంతో రానున్న   రోజుల్లో దక్షిణ కోస్తా,  రాయలసీమ వ్యాప్తంగా భారీ వర్షాలు కురిసే అవకాశం ఉందని వాతావరణ శాఖ పేర్కొంది.  ముఖ్యంగా తీర ప్రాంతాల్లో గంటకు వంద కిలోమీటర్లకు మించిన వేగంతో పెనుగాలులు వీచే అవకాశం ఉందని వాతావరణ శాఖ హెచ్చరించింది.  దీంతో మత్స్యకారులు   సముద్రంలో వేటకు వెళ్లవద్దని రాష్ట్ర విపత్తుల నిర్వహణ సంస్థ హెచ్చరించింది.   

ఇటీవల రాష్ట్రాన్ని అతలాకుతలం చేసిన అర్నాబ్, మురసు తుపానుల దాటి నుంచి ఇప్పుడిప్పుడే  కోలుకుంటున్న ఆంధ్రప్రదేశ్ కు తాజాగా వాతావరణ శాఖ చేసిన హెచ్చరిక గోరుచుట్టు మీద రోకటి పోటు చందంగా మారింది. అర్నాబ్, మురసు తుపానుల ధాటికి రాష్ట్రంలో  వేలాది ఎకరాల్లో పంటలు నీట మునిగి రైతులు తీవ్రంగా నష్టపోయారు. 

విద్యుత్, రవాణా వ్యవస్థలు తీవ్రంగా దెబ్బతిన్నాయి. ఆ నష్టాల నుంచి కోలుకునే లోపే మరో తుపాను ముంచుకువస్తుండటంతో అన్నదాతలు ఆందోళన చెందుతున్నారు. తీరప్రాంత, లోతట్టు ప్రాంతాల ప్రజలు భయందోళనలకు గురౌతున్నారు.  

ఇది కూడా చదవండి: మురసు తుపాను ప్రభావిత ప్రాంతాల్లో కేంద్ర బృందాల పరిశీలన: నష్టం అంచనా, కేంద్రానికి నివేదిక.!

కాగా వాతావరణ శాఖ హెచ్చరికల నేపథ్యంలో రాష్ట్ర ప్రభుత్వం ఇప్పటికే అధికార యంత్రాంగాన్ని అప్రమత్తం చేసింది.  అవసరమైతే లోతట్టు ప్రాంతాల ప్రజలను సురక్షిత ప్రాంతాలకు తరలించేందుకు ఏర్పాట్లు చేస్తోంది. సహాయక చర్యల కోసం   ముందస్తు చర్యలు చేపట్టింది.   ప్రభుత్వ యంత్రాంగం, రక్షణ బందాలు ఎలాంటి అత్యవసర పరిస్థితినైనా ఎదుర్కొనేందుకు సిద్ధంగా ఉన్నాయని అధికారులు తెలిపారు. 

ప్రజలు కూడా వర్షాలు కురిసే సమయంలో అత్యవసరమైతే తప్ప బయటకు రావద్దని అధికారులు సూచించారు.  వాతావరణ శాఖ సూచనలను ఎప్పటికప్పుడు పాటించాలని కోరారు. వరుస తుపానుల వల్ల రాష్ట్ర ఆర్థిక వ్యవస్థపై, ముఖ్యంగా వ్యవసాయ రంగంపై తీవ్ర ప్రభావం పడుతోందని నిపుణులు ఆందోళన వ్యక్తం చేస్తున్నారు. భవిష్యత్తులో ఇలాంటి విపత్తులను సమర్థవంతంగా ఎదుర్కొనేందుకు శాశ్వత ప్రాతిపదికన రక్షణ చర్యలు చేపట్టాల్సిన అవసరం ఎంతైనా ఉందని అభిప్రాయపడుతున్నారు.

మీకు నచ్చవచ్చు:  మురసు తుపాను నష్టాలపై సీఎం చంద్రబాబు ఏరియల్ సర్వే.!

నష్టంపై సమీక్షించిన సీఎం చంద్రబాబు.. కేంద్రానికి సమగ్ర నివేదిక.!

[Cyclonethreat AP,  Andhra Pradesh weather, IMD alert, Heavyrains, TeluguOne]