TeluguOne Health
● # Tweets

Download the TeluguOne App

Choose your platform to continue

తిరుమలపై ఎల్ నినో ఎఫెక్ట్: వెన్నాడుతున్ననీటి కొరత ముప్పు.. టీటీడీ అలర్ట్.!

Published on: Thu Nov 19, 2026 4:07PM

ఎల్ నినో ఎఫెక్ట్ కలియుగ ప్రత్యక్ష దైవం శ్రీవేంకటేశ్వరస్వామి కొలువై ఉన్న తిరుమల క్షేత్రంపై కూడా పడింది. ఈ ప్రభావంతో తిరుమల కొండపై తీవ్రమైన నీటి కొరత ఏర్పడే అవకాశాలు ప్రస్ఫుటంగా కనిపిస్తున్నాయి.  ప్రస్తుతం అందుబాటులో ఉన్న నీటి నిల్వలు  నాలుగు నెలల వరకూ సరిపోతాయన్న అంచనాతో టీటీడీ అధికారులు అప్రమత్తమయ్యారు.  ఎండల తీవ్రత, ఎల్ నినో ఎఫెక్ట్ తో జలాశయాల్లో నీటి మట్టాలు తగ్గుతుండటంతో తిరుమలలో భక్తులకు తాగునీటి సమస్యలు తలెత్తకుండా తిరుమల తిరుపతి దేవస్థానం  అప్రమత్తమైంది. ముందు జాగ్రత్తగా నీటి పొదుపు, సమర్థవంతమైన నీటి యాజమాన్య చర్యలను ప్రారంభించింది

భక్తుల రద్దీని బట్టి తిరుమలలో రోజుకు దాదాపు 50 లక్షల నుంచి 60 లక్షల గ్యాలన్ల నీటి వినియోగం ఉంటుంది. ఈ అవసరంలో సగం నీటిని పాపవినాశనం, గోగర్భం, ఆకాశగంగ, కుమారధార, పసుపుధార జలాశయాల నుంచి సమకూరుస్తున్నారు. మిగిలిన సగం నీటిని కల్యాణి డ్యామ్ నుంచి కొండకు సరఫరా చేస్తున్నారు.   గతంలో కురిసిన వర్షాల వల్ల కొంత ఊరట లభించినప్పటికీ, భవిష్యత్ అవసరాల దృష్ట్యా పొదుపు చర్యలను కట్టుదిట్టం చేసినట్లు అధికారులు తెలిపారు.

 ఇందులో భాగంగా ప్రైవేటు హోటళ్లు, మఠాలు, వాణిజ్య సముదాయాలకు రోజులో ఉదయం ఒక గంట, సాయంత్రం ఒక గంట చొప్పున మొత్తం రెండు గంటల పాటు మాత్రమే నీటిని సరఫరా చేస్తున్నారు. అవసరమైతే ప్రైవేటు హోటళ్లు తిరుపతి నుంచి ట్యాంకర్ల ద్వారా నీటిని రప్పించుకునేలా ప్రణాళికలు రూపొందిస్తున్నారు.   నీటి నిల్వల పరిస్థితి, ముందస్తు చర్యల వివరాలను ఇప్పటికే ముఖ్యమంత్రి చంద్రబాబు దృష్టికి తీసుకెళ్లినట్లు అధికారులు వెల్లడించారు. 

రాబోయే రోజుల్లో సమృద్ధిగా వర్షాలు కురిసి జలాశయాలు పూర్తిస్థాయిలో నిండితే 18 నెలల వరకు నీటి సమస్య ఉండదని అధికారులు అంచనా వేస్తున్నారు. ఒకవేళ వర్షాలు ఆశించిన మేరకు పడకపోతే, కల్యాణి డ్యామ్‌తో పాటు ఇతర ప్రత్యామ్నాయ వనరుల నుంచి నీటిని తీసుకురావాలని నిర్ణయించారు.   వాతావరణ మార్పులు, ఎల్‌నినో పరిస్థితుల నేపథ్యంలో నీటి వనరుల పరిరక్షణపై ప్రత్యేక దృష్టి సారించడం అనివార్యం అయ్యిందని చెబుతున్నారు.

ఇది కూడా చదవండి:  తిరుమలలో చంద్రబాబు చేసిన అద్భుతం: నీటి కరవుకు చరమగీతం.!​

జలాశయాల్లో పూడికతీత పనులు, చెక్‌డ్యామ్‌ల నిర్మాణం, అలాగే పంపిణీ వ్యవస్థలో నీటి లీకేజీలను అరికట్టడంపై టీటీడీ ప్రాధాన్యత ఇస్తోంది.   భక్తులకు ఎలాంటి అసౌకర్యం కలగకుండా నిత్యవసర తాగునీటి సరఫరాను నిరంతరాయంగా కొనసాగించడం ప్రధాన సవాల్‌గా నిలుస్తోంది. అదే సమయంలో వాణిజ్య, ప్రైవేటు అవసరాలకు నీటి వినియోగాన్ని నియంత్రించడం ద్వారా నిల్వలను కాపాడుకునే ప్రయత్నాలు సాగుతున్నాయి.   

రానున్న రోజుల్లో వర్షపాతం తీరు ఎలా ఉంటుంది, జలాశయాల్లోకి నీటి చేరిక ఏ మేరకు ఉంటుందనే అంశంపై అధికారులు నిరంతరం సమీక్షించే అవకాశం ఉంది. వర్షాభావ పరిస్థితులు కొనసాగితే ప్రత్యామ్నాయ మార్గాల అమలు మరింత కీలకంగా మారనుంది.   మొత్తానికి ఎల్‌నినో ప్రభావంతో తలెత్తే నీటి ఎద్దడిని ముందే ఎదుర్కొనేందుకు టీటీడీ చేపట్టిన పొదుపు, నిర్వహణ చర్యలు భక్తులకు ఊరట కలిగించేలా ఉన్నాయి. నీటి వనరుల సద్వినియోగం, ప్రత్యామ్నాయ ఏర్పాట్లతో రానున్న నెలల్లోనూ తిరుమలలో నీటి సరఫరా సజావుగా సాగాలని భక్తులు ఆశిస్తున్నారు. 

మీకు నచ్చవచ్చు:  తిరుమలలో భక్తుల రద్దీ.. శ్రీవారి సర్వదర్శనానికి 12 గంటల సమయం...!​

భక్త జనసంద్రం తిరుమల: సాధారణ రోజుల్లోనూ తగ్గని రద్దీ.!​

[Tirumala Water Scarcity, TTD Water Management, El Nino Effect,   Kalyani Dam, TeluguOne]