పవన్ కళ్యాణ్ కొత్త పార్టీ జనసేన పేరుపై వివాదం షురూ
posted on Mar 13, 2014 2:33PM
పోలిటిక్స్ లోకి ఎంటరవుతున్న పవర్ స్టార్ పవన్ కళ్యాన్ పార్టీ పేరు ఇంకా అధికారికంగా ప్రకటించకపోయినా జనసేన అంటూ నెటిజన్లు ప్రచారం చేస్తున్నారు. ఈ పేరుకు మించిన పేరే ఉండదంటూ రాంగోపాల్ వర్మ వంటివారు అప్పుడే ట్వీటేశారు. ఇంతలోనే జనసేన పార్టీ తమది అంటూ కొందరు మీడియా ముందుకు రావడం సంచలనం సృష్టించింది. రాజకీయ పార్టీ పెట్టాలనుకుంటున్న తాము 6 నెలలు కష్టపడి జనసేన అని నామకరణం చేసుకున్నామని చెబుతున్నారు. వారం రోజుల క్రితం ఎన్నికల కమిషన్ కు దరఖాస్తు చేశామని బాలరాజ్, అతని మిత్రులు చెబుతున్నారు. తమ పార్టీ పేరైన జనసేనపై ఎవరికి ఎటువంటి అభ్యంతారాలున్నా తెలియజేయాల్సిందిగా పత్రికల్లో ప్రకటనలు కూడా ఇచ్చామని ఆధారాలు చూపిస్తున్నారు. మీడియాలో ప్రచారం నిజమై పవన్ పార్టీ కూడా జనసేనే అయితే దయ చేసి పేరు మార్చుకోవాలని అప్పీల్ చేశారు. పవన్ పార్టీ తరపున ఇంతవరకు ఏ ఒక్కరూ పార్టీ పేరు ప్రకటించలేదు. పవర్ స్టార్ పార్టీ పేరు కూడా జనసేన అయితే మరో కొత్త వివాదం మొదలైనట్లే.