తలుచుకుంటే ఏదైనా సాధిస్తా: కేసీఆర్

తన జీవితంలో ఇప్పటి వరకు తాను ఓటమి అంటూ ఎరుగనని, తాను తలచుకుంటే దేన్నయినా సాధించి తీరుతానని తెలంగాణ ముఖ్యమంత్రి కేసీఆర్ అన్నారు. చాలామంది తెలంగాణ రాదన్నారు.. సాధించి చూపించాను అని ఆయన గుర్తు చేశారు. ఓటమి అనేది తన జీవితంలో లేదని, తాను అనుకున్నది ప్రతి ఒక్కటీ సాధించానని అన్నారు. తమ ప్రభుత్వ హయాంలోనే తెలంగాణ తాగునీటి గ్రిడ్‌ ఏర్పాటు చేస్తామన్నారు. మూడున్నర ఏళ్లలో తెలంగాణలోని ప్రతి ఇంటికి మంచినీటి సౌకర్యం కల్పిస్తామని సీఎం కేసీఆర్ హామీ ఇచ్చారు. వాటర్ గ్రిడ్ ఏర్పాటుపై తెలంగాణలో సర్వే నిర్వహిస్తాని చెప్పారు. గతంలో నిర్వహించిన కుటుంబ సర్వేకు మంచి స్పందన వచ్చిందని తెలిపారు. ప్రధాని మోడి కూడా సర్వే గురించి అడిగారని, దేశవ్యాప్తంగా ఇలాంటి సర్వే నిర్వహించాలని ఆయనకి తాను సూచించానని కేసీఆర్ చెప్పారు.