కూకట్‌పల్లి ఎమ్మెల్యే అభ్యర్థిగా సినీ నటుడు..!!

తెలంగాణ ముందస్తు వేడి కూకట్‌పల్లి మీద ఆసక్తిని రేకిస్తోంది. గత కొద్ది రోజులుగా కూకట్‌పల్లి రాజకీయం సినిమా వారి చుట్టూ తిరుగుతుంది. మొన్నటికి మొన్న కూకట్‌పల్లి నుండి టీడీపీ తరుపున నందమూరి కళ్యాణ్ రామ్ ఎమ్మెల్యే అభ్యర్థిగా బరిలోకి దిగుతారంటూ వార్తలు వచ్చిన విషయం తెలిసిందే. అయితే ఇప్పుడు కూకట్‌పల్లి బరిలోకి దిగుతున్నారంటూ మరో సినీ నటుడి పేరు తెరమీదకు వచ్చింది. అయితే ఇదేదో నార్మల్ గా వచ్చిన వార్త కాదు. స్వయంగా ఆ నటుడే చెప్పాడు. ఆ నటుడు ఎవరో కాదు సుధాకర్‌నాయుడు. శుక్రవారం ఆయన కేపీహెచ్‌బీలోని వినాయక మండపాల్లో నిర్వహించిన పూజల్లో పాల్గొన్నారు. అనంతరం ధర్మారెడ్డికాలనీ ఫేజ్‌-1లో విలేకరులతో మాట్లాడుతూ.. ఏదో ఒక పార్టీ లేదా, స్వతంత్య్ర అభ్యర్థిగా అయినా ఈసారి కూకట్‌పల్లి నుంచి పోటీ చేస్తానని తెలిపారు. తెలంగాణలో జనసేన పార్టీ పోటీ చేస్తే మాత్రం ఆ పార్టీ తరపున నిలబడుతానని చెప్పారు. సుధాకర్‌నాయుడు పలు సినిమాల్లో నటించి మెప్పించడమే కాకుండా.. 'రంగ ది దొంగ', హీరో వంటి సినిమాలకు దర్శకత్వం వహించారు.