రియల్ కపుల్గా మారిన రీల్ కపుల్!
on May 15, 2021
టీవీ నటుడు, 'సావిత్రమ్మ గారి అబ్బాయి' సీరియల్ హీరో బాబు (చందన్ కుమార్).. నటి కవిత గౌడను వివాహం చేసుకున్నారు. కరోనా నిబంధనలను పాటిస్తూ కేవలం ఇరు కుటుంబ సభ్యులు, కొంతమంది సన్నిహితుల మధ్య బెంగళూరులో శుక్రవారం వారి పెళ్లి వేడుక ఘనంగా నిర్వహించారు. ఇటీవల కుటుంసభ్యుల సమక్షంలో వీరి నిశ్చితార్ధం రహస్యంగా జరిగిన సంగతి తెలిసిందే. ఇప్పుడు బంధంతో ఈ జంట ఒక్కటైంది.
కన్నడలో వీరిద్దరూ కలిసి జంటగా 'లక్ష్మీ బారమ్మ' అనే సీరియల్ లో నటించారు. ఆ సమయంలోనే ఒకరినొకరు ఇష్టపడడంతో పెద్దలను ఒప్పించి పెళ్లి చేసుకున్నారు. ఈ జంటకు ప్రముఖులు సోషల్ మీడియా వేదికగా శుభాకాంక్షలు చెబుతున్నారు. పెళ్లి అనంతరం చందన్ మీడియాతో మాట్లాడారు. కరోనా ఆంక్షలు అన్ని ఎత్తివేసి, సాధారణ పరిస్థితులు రాగానే అందరినీ పిలిచి గ్రాండ్ గా రిసెప్షన్ పార్టీ ఏర్పాటు చేయాలనుకుంటున్నట్లు చెప్పారు.
తమ పెళ్లిని ముందుగా అనుకున్న ముహుర్తానికే జరిపించాలని కుటుంబసభ్యులంతా నిర్ణయించారని.. దీంతో కరోనా ప్రోటోకాల్ నడుమ ప్రభుత్వ నిబంధనలను పాటిస్తూ తమ వివాహ తంతు జరిపించినట్లు చందన్ వెల్లడించాడు. మాస్క్ లతో తమ వివాహ శుభకార్యంలో పాల్గొన్న ఈ జంట ఫోటోలు ప్రస్తుతం సోషల్ మీడియాలో చక్కర్లు కొడుతున్నాయి. ఈ ఫోటోలు చూసిన నెటిజన్లు నూతన జంటకు శుభాకాంక్షలు చెబుతున్నారు.
Also Read