తెలుగు, తమిళ చిత్ర పరిశ్రమల్లో తనదైన టైమింగ్తో ప్రేక్షకులను కడుపుబ్బా నవ్విస్తున్న నటులు సత్య (Satya), యోగిబాబు (Yogi Babu). ఇప్పుడు వీరిద్దరూ కలిసి ఒకే సినిమాలో హీరోలుగా నటిస్తుండటం విశేషం. 'రంగబలి' సినిమాతో నవ్వులు పూయించిన దర్శకుడు పవన్ బాసంశెట్టి ఈ చిత్రానికి దర్శకత్వం వహిస్తున్నాడు. ఈ క్రేజీ ఎంటర్టైనర్ నేడు పూజా కార్యక్రమాలతో ఘనంగా ప్రారంభమైంది.
సత్య ఈ మధ్య కాలంలో వరుస సినిమాలతో తెలుగులో మోస్ట్ వాంటెడ్ కమెడియన్గా మారిపోయాడు. రీసెంట్ గా 'జెట్లీ'తో హీరోగానూ అవతరించాడు. మరోవైపు యోగిబాబు కూడా తమిళంలో స్టార్ కమెడియన్ గా క్రేజ్ సొంతం చేసుకున్నాడు. ఈ ఇద్దరు కామెడీ స్టార్స్ ఒకే ఫ్రేమ్లో కనిపిస్తే థియేటర్లలో నవ్వుల వర్షం కురియడం ఖాయమని చెప్పవచ్చు. ఔట్ అండ్ ఔట్ ఎంటర్టైనర్ గా ఈ సినిమాను పవన్ బాసంశెట్టి తెరకెక్కిస్తున్నారు.
నేడు చిత్ర యూనిట్ సభ్యుల సమక్షంలో ఈ సినిమా ప్రారంభోత్సవ వేడుక జరిగింది. పూజా కార్యక్రమాల అనంతరం షూటింగ్ను కూడా ప్రారంభించారు. ఒక విభిన్నమైన కథాంశంతో, ఆద్యంతం వినోదాత్మకంగా ఈ సినిమా సాగనుందని సమాచారం.
'రంగబలి' సినిమాలో సత్య కామెడీ ఎంతలా హైలైట్ అయిందో తెలిసిందే. మూవీ రిజల్ట్ ఎలా ఉన్న, సత్య కామెడీకి ఓ రేంజ్ రెస్పాన్స్ వచ్చింది. ఇక ఇప్పుడు సత్యకు యోగిబాబు తోడవ్వడంతో కామెడీ ఏ రేంజ్ లో ఉంటుందనే ఆసక్తి నెలకొంది.
నయవాయు చిత్రాలు, డ్రీమ్ మూవీ మేకర్స్ సంయుక్తంగా నిర్మిస్తున్న ఈ సినిమాకు 'లవ్ స్టోరీ' ఫేమ్ పవన్ సి.హెచ్ సంగీతం అందిస్తున్నాడు. ఈ చిత్రానికి సంబంధించిన ఇతర వివరాలను త్వరలోనే ప్రకటించనున్నారు.
