.

నటీనటులు: యష్నా ముతులూరి, వారాహి మల్లిపాముల, సాయి కృష్ణ, ఆర్జే కాజల్, కిరీటి దామరాజు

సాంకేతిక బృందం:

రచన: నిశాంతి ఏవని, వారాహి మల్లిపాముల

సంగీతం: నిర్వాణ్ ఆత్రేయ, రాజా కుమారి, కరణ్ పాండవ్

సినిమాటోగ్రఫీ: జ్ఞానశేఖర్ వి.ఎస్

దర్శకత్వం: నిశాంతి ఏవని

నిర్మాతలు: వారాహి మల్లిపాముల, శ్రీదేవి మల్లిపాముల

 

వారాహి మల్లిపాముల కొన్నేళ్ల క్రితమే ఈ సినిమా కథను రాసుకున్నారు. నిర్మాతల కోసం చాలా ప్రయత్నించారు కానీ చివరికి ఆమె స్వయంగా ఈ చిత్రాన్ని నిర్మించారు. ఇంగ్లీష్-తెలుగు భాషల్లో తెరకెక్కిన Impure నేడు విడుదలైంది. ఈ సినిమా గురించి వివరంగా మాట్లాడుకుందాం.

 

కథ:

పెళ్లి రోజున సంధ్య (Yashna Muthuluri)ని వరుడి కుటుంబం తిరస్కరిస్తుంది. దానికి కారణం గతంలొ వేరొకరితో ఆమెకు ఉన్న బంధం. తన మాజీ ప్రియుడితో శారీరకంగా దగ్గరయ్యాననే నిజాన్ని ఆమె ఒప్పుకుంటుంది. అయితే ఆమె కజిన్ వీర (Varahi Mallipamula) కేవలం సోషల్ మీడియాలో లైకుల కోసం ఈ విషయాన్ని పోస్ట్ చేయడంతో సంధ్యకు సమాజంలో అవమానాలు ఎదురవుతాయి. ఈ పీడకల నుంచి బయటపడేందుకు సంధ్య ఎలాగైనా పెళ్లి చేసుకోవాలని ఆరాటపడుతుంది.

ఆమె తల్లిదండ్రులు తగిన సంబంధం వెతకడం మొదలుపెడతారు, కానీ సమాజం చేసే విమర్శల వల్ల వాళ్ల ప్రయత్నాలు విఫలమవుతుంటాయి. మరోవైపు, వీర తను చేసిన పనికి పశ్చాత్తాపపడుతున్నా, వస్తున్న లైకులను ఆస్వాదిస్తూ ఉంటుంది. తన భర్త స్వలింగ సంపర్కుడు అని తెలియడంతో, ఆ బాధను మర్చిపోయి బిజీగా ఉండటానికి రకరకాల వ్యాపకాలు వెతుక్కుంటుంది. వీరి స్నేహితుడు ప్రణవ్ (Sai Krishna) నటుడిగా మారాలని హైదరాబాద్ వెళ్లి కష్టాలు పడుతుంటాడు. ఈ ముగ్గురి జీవితాల్లో తర్వాత ఏం జరిగిందనేదే మిగతా కథ!

 

విశ్లేషణ:

యష్నా ముతులూరిలో మంచి నటి కనిపించింది. భావాలు పలికించేటప్పుడు ఆమె కళ్లలో స్పష్టత ఉంటుంది. భవిష్యత్తులో మంచి నటిగా ఎదిగే లక్షణాలు ఆమెలో ఉన్నాయి. తల్లిదండ్రుల పాత్రలు చేసిన వారు మినహా మిగతా అందరి నటన చాలా పేలవంగా ఉంది. వారాహి మల్లిపాముల కూడా తెరపై ఏమాత్రం ఆకట్టుకోలేకపోయారు.

తమ తమ దారుల్లో గుర్తింపు కోసం వెతుక్కునే ముగ్గురి జీవితాల చుట్టూ ఈ సినిమా సాగుతుంది. కానీ సమస్య ఎక్కడంటే, వాళ్లు తమ జీవితాలను ఎప్పుడు తమ చేతుల్లోకి తీసుకోవాలి అని గ్రహించే సమయం, ఆ తర్వాత వాళ్ల ప్రయాణాన్ని చూపించడంలోనే కథాకథనాలు తడబడ్డాయి.

పురుషాధిక్యతను సమాజం ఎలా సాధారణంగా మార్చేసిందనే దానిపై ఇదొక వ్యంగ్య చిత్రం అయినప్పటికీ, స్వేచ్ఛను కూడా అదే కోణంలో చూడటాన్ని ఈ సినిమా సరిగ్గా గుర్తించలేకపోయింది. ఇతరుల గుర్తింపు కోసం పాకులాడకపోవడంలో లేదా మన కోసం మనం పనులు చేసుకోవడంలోనే పూర్తి స్వేచ్ఛ ఉండదు. చుట్టూ సులభమైన దారులు, తప్పించుకునే సాకులు ఉన్నప్పుడు "సరైన దారిని ఎంచుకోవడంలోనే" అది దాగి ఉంటుంది.

మహిళల సాధికారత గురించి చెప్పాలనుకున్న విషయం ప్రేక్షకులకు పూర్తి స్థాయిలో చేరలేదు. మహిళలకు ఏం లోపించిందో చెబుతూ, దాన్ని కేవలం ఒకటి రెండు ఎంపికలకు మాత్రమే కుదించడం వల్ల కథలో లోతు లోపించింది. తీసుకున్న కథాంశం ఎంత విశాలంగా ఉంటే, రచనలో కూడా అంతే లోతు ఉండాల్సింది.

 

పాజిటివ్స్:

యష్నా ముతులూరి నటన

అసలు కథాంశం

మొదటి పది నిమిషాల్లో వచ్చే కొన్ని మంచి డైలాగులు

 

నెగెటివ్స్:

కథలో తగినంత లోతు లేకపోవడం

ఇంగ్లీష్, తెలుగు కలిపిన సంభాషణల అతివాడకం

సెకండాఫ్‌‌లో ఒకే విషయాన్ని పదే పదే చూపించడం

 

చివరి గా : కొన్ని మంచి ఆలోచనలు ఉన్నాయి కానీ ఏదీ సరిగ్గా అతకలేదు.

 

రేటింగ్: 2.25/5

 

గమనిక: ఈ రివ్యూ లో వ్యక్తీకరించిన అభిప్రాయాలు రచయిత వ్యక్తిగతం. దీనికి సంస్థ ఎలాంటి బాధ్యత వహించదు. వీటిపై స్పందించే ముందు వీక్షకులు గమనించగలరు.