సర్దార్.. పవన్ వన్ మ్యాన్ షో
on Apr 6, 2016
పవన్ కల్యాణ్ సినిమా అంటే... పవన్ చుట్టూ తిరగాల్సిందే. పవన్ వన్ మ్యాన్ షో.. చూడాల్సిందే. కేవలం పవన్ మంత్రంతో.. పవన్ బలంతో పవన్ సినిమాలు ఆడేసిన సందర్భాలు చాలా కనిపిస్తాయి. సర్దార్ విషయంలోనూ అదే జరిగిందని ఇండ్రస్ట్రీ వర్గాల టాక్. ఈ సినిమాని పవన్ వన్ మ్యాన్ షోగా నడిపించాడట. ఈ సినిమాకి బలం.. బలగం అంతా పవన్ కల్యాణే అని తెలుస్తోంది. ఈ కథని చాలా ఇష్టంగా రాసుకొన్నాడు పవన్. తన పాత్రని మరింత ఇష్టంగా తీర్చిదిద్దుకొన్నాడట. తన అభిమానులు తననుంచి ఏం ఆశిస్తారో, అన్నీ స్పష్టంగా తెలుసిన పవన్.. వాళ్ల ఆలోచనలకు, అంచనాలకూ తగ్గట్టే తన పాత్రని డిజైన్ చేసుకొన్నాడట. మరీ ముఖ్యంగా పోలీస్ స్టేషన్ చుట్టూ అల్లుకొన్న సన్నివేశాలు.. సూపర్బ్ గా వచ్చాయని టాక్.
తెరపైనే కాదు, తెర వెనుక కూడా పవన్ తన పవర్ చూపించాడు. సెట్లో.. పవన్ ఏం చెబితే అదే నడిచింది. నటీనటులు, సాంకేతిక నిపుణులూ.. ఇలా అందర్నీ పవన్ ఏరి కోరి ఎంచుకొన్నాడు. ఆఖరికి ఎవరు ఏయే కాస్ట్యూమ్స్ వేయాలో.. పవనే డిసైడ్ చేశాడట. ఏ షాట్ ఎలా తీయాలో స్ర్కీన్ ప్లే లోనేపవన్ రాసుకొన్నాడని చిత్రబృందమే చెబుతోంది. ఇప్పుడు పోస్ట్ ప్రొడక్షన్ విషయంలోనూ పవన్కల్యాణ్ దగ్గరుండి.. తన టీమ్ని నడిపిస్తున్నాడట. పవన్ నిద్రే లేకుండా ల్యాబుల్లోనే గడుపుతున్నాడని, సినిమా రిలీజ్ అయ్యేంత వరకూ పవన్కి తీరికే లేదని చిత్రబృందం చెబుతోంది. ప్రతీ సీన్, ప్రతీ షాట్.. పవన్ చూశాకే ఓకే అవుతోందట. ఆర్.ఆర్ విషయంలో, కలర్ గ్రేడింగ్ విషయంలోనూ పవన్ ప్రత్యేక శ్రద్ద తీసుకొంటున్నాడట. సాధారణంగా పవన్ తన సినిమాకి సంబంధించిన షూటింగ్ పూర్తయితే మరే విషయంలోనూ కలగచేసుకోడు. సినిమా ఎలా వస్తుందా అని కూడా ఆరా తీయడు.కానీ సర్దార్ విషయంలో మాత్రం పవన్ ప్రత్యేక శ్రద్ద చూపించడం ఇండ్రస్ట్రీ వర్గాలనే కాదు, ఆయన సన్నిహితుల్ని కూడా ఆశ్చర్యపరుస్తోంది. దీనంతటికీ కారణం.. ఈ సినిమాకి పవన్ నిర్మాత అనేనా..?? ఇంకేమైనా కారణాలున్నాయా??