సుమన్ శెట్టిని తక్కువంచనా వేస్తున్నారు.. ఆయన ఫ్లాష్ బ్యాక్ తెలుసా?
on Sep 18, 2025
తెలుగు తెర చూసిన గొప్ప కమెడియన్స్ లో సుమన్ శెట్టి (Suman Setty) ఒకరు. అమాయకత్వంతో కూడిన హాస్యాన్ని పండించడంలో ఆయన దిట్ట. 15 ఏళ్ళ పాటు పదుల సంఖ్యలో సినిమాలు చేసి, ప్రేక్షకుల మనసు దోచుకున్నారు. కొన్నేళ్లుగా సినిమాల్లో పెద్దగా కనిపించని సుమన్ శెట్టి.. ఇప్పుడు బిగ్ బాస్-9 లో ప్రత్యక్షమై అందరినీ సర్ ప్రైజ్ చేశారు. (Bigg Boss 9)
బిగ్ బాస్ అంటేనే వివాదాలకు, గొడవలకు పెట్టింది పేరు. అలాంటి బిగ్ బాస్ షోలో సుమన్ శెట్టి లాంటి ఇన్నోసెంట్ పర్సన్ రాణించగలడా? అనే అనుమానాలు మొదట వ్యక్తమయ్యాయి. అయితే సుమన్.. ఓ వైపు అవసరమైన సమయంలో ధీటైన సమాధానాలు చెబుతూనే, మరోవైపు తనదైన కామెడీ టైమింగ్ తో ఆకట్టుకుంటున్నారు. దీంతో సుమన్ శెట్టికి రోజురోజుకి మద్దతు పెరుగుతోంది. ముఖ్యంగా అప్పట్లో సినిమాలు చూసి సుమన్ ని అభిమానించిన వారు.. ఇప్పుడు బిగ్ బాస్ షో చూసే అలవాటు లేకపోయినా.. ఆయనకు ఓట్లు వేస్తున్నారంటే.. ఏ రేంజ్ సపోర్ట్ లభిస్తుందో అర్థం చేసుకోవచ్చు. ఈ జనరేషన్ కి సుమన్ శెట్టి గురించి పెద్దగా తెలిసి ఉండకపోవచ్చు. కానీ, ఒక్కసారి ఆయన జర్నీ గురించి తెలిస్తే మాత్రం.. వావ్ అనకుండా ఉండలేరు.
సుమన్ శెట్టి స్వస్థలం విశాఖపట్నం. 1983 జూన్ 9న జన్మించారు. సినీ రచయిత సత్యానంద్ ఆయనలోని నటుడిని గుర్తించి, సినిమాలలో ప్రయత్నించమని ప్రోత్సహించారు. అలా తేజ దర్శకత్వంలో 2002లో వచ్చిన 'జయం' సినిమాతో టాలీవుడ్ కి కమెడియన్ గా పరిచయమయ్యారు సుమన్ శెట్టి. ఆ సినిమాలో 'అలీ బాబా'గా ఆయన పంచిన వినోదాన్ని అంత తేలికగా మరచిపోలేము. మొదటి సినిమాకే బెస్ట్ కమెడియన్ గా నంది అవార్డు అందుకున్నారో.. ఏ రేంజ్ లో నవ్వుల వర్షం కురిపించారో అర్థం చేసుకోవచ్చు.
'జయం' తర్వాత సుమన్ శెట్టి వెనుతిరిగి చూసుకోలేదు. స్టార్ కమెడియన్ గా దశాబ్దంపాటు ఆయన కెరీర్ దిగ్విజయంగా కొనసాగింది. కబడ్డీ కబడ్డీ, 7జి బృందావన్ కాలనీ, యజ్ఞం, ధైర్యం, రణం, ఉల్లాసంగా ఉత్సాహంగా, దొంగల బండి, బెండు అప్పారావు.. ఇలా ఎన్నో సినిమాల్లో తనదైన నటనతో కట్టిపడేశారు. తెలుగులో మాత్రమే కాకుండా తమిళ్ లోనూ ఆయనకు మంచి గుర్తింపు ఉంది. అక్కడ దాదాపు 20 సినిమాల్లో నటించి మెప్పించారు.
2002 నుంచి 2012 మధ్య కాలంలో టాలీవుడ్ మోస్ట్ బిజీ ఆర్టిస్ట్ లలో సుమన్ శెట్టి ఒకరు. ఆ సమయంలో కొందరు యంగ్ హీరోల కంటే.. ఈ కమెడియన్ ఎక్కువ పేరు, డబ్బు సంపాదించారు అనడంలో అతిశయోక్తి లేదు. అయితే ఎంత ఎదిగినా ఒదిగి ఉండటం సుమన్ శెట్టికి ఉన్న గొప్ప లక్షణాలలో ఒకటి. తన తొలి చిత్ర దర్శకుడు తేజను గాడ్ ఫాదర్ గా భావిస్తారు. ఆయన సూచనతో అప్పట్లో హైదరాబాద్ లోని మణికొండలో మంచి ఇల్లు కట్టుకున్నారు. ఇప్పుడు ఆ ఇంటి విలువ ఎన్నో రెట్లు పెరిగింది. ఇంకో విశేషం ఏంటంటే.. తన ఇంటిలో డైరెక్టర్ తేజ పేరు మీద ప్రత్యేకంగా ఒక రూమ్ ని కేటాయించారు. ఆ రూమ్ లో తేజ ఫోటో ఉంటుంది. దీన్ని బట్టే సుమన్ శెట్టి మనస్తత్వం ఎంత గొప్పదో అర్థమవుతోంది.
కొన్నేళ్లుగా సినిమాల్లో తక్కువగా కనిపిస్తున్న సుమన్.. తన కుటుంబంతో కలిసి వైజాగ్ లో నివసిస్తున్నారు. ఎంత పేరు, డబ్బు ఉన్నా.. ఆయన హంగు ఆర్భాటాలకు దూరంగానే ఉంటారు. అలాంటి వ్యక్తి ఇప్పుడు బిగ్ బాస్ లోకి అడుగుపెట్టారు. తన నిజాయితీ, కామెడీ టైమింగ్ తో అందరి మనసులు దోచుకుంటున్నారు. అందుకే ఆయన విన్నర్ కావాలని కోరుకునే వారి సంఖ్య రోజురోజుకి పెరుగుతోంది.
Latest News
Video-Gossips
TeluguOne Service
Customer Service
Live Help 24/7Customer Care
Send your Queries to
