తెలుగు సినిమా అంటే ఒకప్పుడు ఎన్టీఆర్, ఏఎన్నార్, కృష్ణ, శోభన్ బాబు వంటి స్టార్ నటుల సినిమాలే ఎక్కువగా గుర్తొచ్చేవి. సెట్లు, పాటలు, ఫైట్లు, కుటుంబ కథలు.. ఇలా భారీ సినిమాలు ప్రేక్షకులను అలరిస్తుండేవి. కానీ అదే సమయంలో సామాన్యుల జీవితాలను, పల్లెటూరి ప్రజల కష్టాలను వెండితెరపై సహజంగా చూపించే ప్రయత్నాలు కూడా జరిగాయి. అలాంటి ప్రయత్నాల్లో ఒక అద్భుతమైన సినిమా ‘ఊరుమ్మడి బతుకులు’. ఈ సినిమా విడుదలై 50 ఏళ్లు పూర్తవుతోంది.
1976లో విడుదలైన ఈ చిత్రానికి బి.ఎస్. నారాయణ దర్శకత్వం వహించారు. రాళ్లపల్లి, సత్యేంద్ర కుమార్, మాధవి ప్రధాన పాత్రల్లో నటించారు. జె. వెంకటయ్య, జి.కె. మూర్తి నిర్మాతలుగా వ్యవహరించారు. ఆర్ట్ ఎంటర్‌ప్రైజెస్ బ్యానర్‌పై తెరకెక్కిన ఈ సినిమా అప్పటి తెలుగు చిత్ర పరిశ్రమలో ఒక విభిన్నమైన ప్రయత్నంగా నిలిచింది.
ఈ సినిమా ప్రధానంగా గ్రామీణ జీవితాలు, పేద ప్రజల కష్టాలు, గ్రామాల్లోని పెత్తందారుల ఆధిపత్యం, సామాన్యులు ఎదుర్కొనే సమస్యలను తెరపై ఆవిష్కరించింది. ఇద్దరు గ్రామ పెద్దల మధ్య ఆధిపత్య పోరు, వారి మధ్య నలిగిపోయే అమాయక ప్రజల జీవితాలను కథాంశంగా తీసుకున్నారు.
ఒక ఊరిలో జరిగే సంఘటనలను చూపిస్తూనే.. సమాజంలోని అసమానతలు, అధికార బలం ఉన్నవారి దౌర్జన్యాలు సామాన్యుల జీవితాలను ఎలా ప్రభావితం చేస్తాయో దర్శకుడు సహజంగా చూపించారు. అందుకే ఈ సినిమా సాధారణ కమర్షియల్ చిత్రాలకు భిన్నంగా ప్రత్యేక గుర్తింపు తెచ్చుకుంది.
ఇది కూడా చదవండి: శోభన్ బాబుకు స్టార్‌డమ్ తెచ్చిన మూవీ.. 'తాసిల్దార్ గారి అమ్మాయి' వెనుక ఇన్ని విశేషాలా.?
‘ఊరుమ్మడి బతుకులు’ సినిమాకు దక్కిన అతిపెద్ద గుర్తింపు జాతీయ అవార్డు. 1976 సంవత్సరానికి గాను ఉత్తమ తెలుగు చలనచిత్రంగా జాతీయ చలనచిత్ర అవార్డును అందుకుంది.
ఈ సినిమాలో సంగీతం కూడా ప్రత్యేక ఆకర్షణగా నిలిచింది. ఎం.బి. శ్రీనివాసన్ సంగీతం అందించగా, మహాకవి శ్రీశ్రీ రాసిన ‘శ్రమైక జీవన సౌందర్యానికి సమానమైనది లేనే లేదోయ్’ అనే పాట ఎంతో ప్రత్యేకంగా నిలిచింది. ఎస్పీ బాలసుబ్రహ్మణ్యం ఆలపించిన ఈ పాటలో శ్రమజీవుల గొప్పతనాన్ని అద్భుతంగా ఆవిష్కరించారు.
మొత్తానికి ఐదు దశాబ్దాల క్రితం వచ్చిన ‘ఊరుమ్మడి బతుకులు’ కేవలం ఒక సినిమా మాత్రమే కాదు. గ్రామీణ సమాజంలోని వాస్తవ పరిస్థితులను తెరపైకి తీసుకొచ్చిన ప్రయత్నం. పెద్ద పెద్ద స్టార్ నటులు లేకపోయినా, భారీ బడ్జెట్ లేకపోయినా మంచి కథకు జాతీయ స్థాయిలో గుర్తింపు వస్తుందని నిరూపించిన చిత్రం. అందుకే 50 ఏళ్లు గడిచినా ఈ సినిమా తెలుగు సినీ చరిత్రలో ప్రత్యేకంగా గుర్తుండిపోతుంది.
మీకు నచ్చవచ్చు:
30 ఏళ్ల ‘భామనే సత్యభామనే’.. కమల్ హాసన్ మేకప్ వెనుక అసలు కథ తెలుసా.?
23 ఏళ్ళ క్రితం జరిగింది ఇదే.. పవన్ కళ్యాణ్ వదులుకున్న తమిళ అమ్మాయి.!
[Oorummadi Brathukulu 50 Years, National Award, B S Narayana, Sri Sri, Rallapalli]
