తెలుగులో బిగ్ బాస్ షో ఇప్పటివరకు నాలుగు సీజన్లను పూర్తి చేసుకుంది. అన్ని సీజన్లకు మంచి రేటింగ్స్ వచ్చాయి. ఇప్పుడు సీజన్ 5ను మొదలుపెట్టబోతున్నారు. జూలై నుండి ఈ షో ప్రారంభించాలని బిగ్ బాస్ నిర్వాహకులు భావిస్తున్నారు. దానికి సంబంధించిన పనులను కూడా మొదలుపెట్టారు. అయితే ఇప్పుడు వారికో సమస్య మొదలైంది. అదేంటంటే.. బిగ్ బాస్ షోలో కనిపించడానికి సెలబ్రిటీలెవరూ కూడా ఆసక్తి చూపడంలేదట.

సీజన్ 4లో పేరున్న తారలెవరూ కనిపించలేదనే విమర్శలు వచ్చాయి. అందుకే ఈసారి కాస్త క్రేజ్ ఉన్న వాళ్లను తీసుకురావాలని భావించారు. ఆ విధంగానే 30 మంది సెలబ్రిటీల లిస్ట్ ను సిద్ధం చేశారు. వారిలో 16 మందిని ఫైనల్ చేయాలనుకున్నారు. ఇంటర్వ్యూలు కూడా మొదలుపెట్టారు. అయితే వీరిలో చాలా మంది ఈ ఆఫర్‌ను రిజెక్ట్ చేస్తున్నారట. ఈ షో విషయంలో ఉత్సాహం చూపకపోవడానికి చాలా కారణాలున్నాయి. ఈ షో కోసం తప్పనిసరిగా రెండు వారాలు క్వారెంటైన్‌లో ఉండాలి.

దాంతో పాటు మరో వంద రోజులు షో కోసం వెచ్చించాలి. అంటే దాదాపు నాలుగు నెలల వరకు పర్సనల్ లైఫ్‌కి దూరంగా ఉండాలి. షోలో ఉన్నప్పుడు కరోనా వస్తే ఇంకో తలనొప్పి. అందుకే సెలబ్రిటీలు ఎవరూ కూడా ఈ షోపై పెద్దగా ఆసక్తి చూపడం లేదంటున్నారు. అంతేకాదు.. టైటిల్ గెలిచినప్పటికీ సినిమా అవకాశాలు వస్తాయనే కన్ఫర్మేషన్ లేదు. ఎందుకంటే గతంలో టైటిల్ గెలిచిన వారెవరికీ కూడా సరైన అవకాశాలు రాలేదు. అందుకే ఈ షో వైపు క్రేజ్ ఉన్న వారెవరూ చూడడం లేదు. అంటే ఈసారి కూడా అరకొర సెలబ్రిటీలతో అడ్జస్ట్ అవ్వాలన్నమాట!