బాక్సాఫీస్‌ వార్‌కి సిద్ధమవుతున్నారు ఎన్టీఆర్‌, హృతిక్‌ రోషన్‌. ఈ ఇద్దరు హీరోల అభిమానులు ఎప్పుడెప్పుడా అని ఎదురుచూస్తున్న ‘వార్‌2’ చిత్రం ఆగస్ట్‌ 14న ప్రపంచవ్యాప్తంగా విడుదలవుతోంది. ఈ క్రమంలోనే ప్రమోషన్స్‌ను స్పీడప్‌ చేశారు మేకర్స్‌. ఈ సినిమాపై ప్రేక్షకుల్లో భారీ అంచనాలు ఉన్నాయి. ఎందుకంటే ఎన్టీఆర్‌ తొలిసారి హిందీలో నటిస్తున్న సినిమా కావడం ఒక కారణమైతే. హృతిక్‌రోషన్‌ వంటి హీరోతో కలిసి నటించడం మరో కారణంగా చెప్పుకోవచ్చు.

ఇప్పటికే విడుదలైన ఈ సినిమా టీజర్‌, ట్రైలర్‌, పాటలు ఆడియన్స్‌ని విపరీతంగా ఆకర్షిస్తున్నాయి. ముఖ్యంగా ఎన్టీఆర్‌ను, హృతిక్‌ రోషన్‌ను ఒకే ఫ్రేమ్‌లో చూసేందుకు ప్రేక్షకులు ఉత్సాహం చూపిస్తున్నారు. వీరద్దరి క్యారెక్టర్లు ఎంత పవర్‌ఫుల్‌గా ఉండబోతున్నాయి అనేది టీజర్‌ ద్వారా, ట్రైలర్‌ ద్వారా తెలిసింది. ఒక బాలీవుడ్‌ స్టార్‌, ఒక టాలీవుడ్‌ స్టార్‌ కలిసి నటిస్తున్న ఈ సినిమాలో ఇద్దరూ కలిసి స్టెప్స్‌ వేస్తే ఎలా ఉంటుంది అనే ఆలోచనకు తెరరూపం ఇచ్చారు. ఈ సినిమా నుంచి ‘సలామ్‌ అనాలి’ అనే సాంగ్‌ను విడుదల చేశారు. ఈ పాటలో ఎన్టీఆర్‌, హృతిక్‌ల స్టెప్స్‌ ఎంతో అద్భుతంగా ఉన్నాయి. ఎన్టీఆర్‌ కంటే హృతిక్‌ రోషన్‌ దాదాపు 10 ఏళ్ళు పెద్దవాడైనప్పటికీ తన డాన్స్‌లో స్పీడ్‌ తగ్గలేదని ప్రూవ్‌ చేసుకున్నాడు. ఇక ఎన్టీఆర్‌ గురించి చెప్పాలంటే డాన్స్‌లో తనకు తిరుగులేదని టాలీవుడ్‌లో ప్రూవ్‌ చేసుకున్న ఎన్టీఆర్‌.. హిందీ ప్రేక్షకుల్ని సైతం ఆకట్టుకుంటాడని చెప్పడంలో ఎలాంటి సందేహం లేదు.

‘సలాం అనాలి’ సాంగ్‌లో ఎన్టీఆర్‌, హృతిక్‌ పోటీపడి మరీ స్టెప్స్‌ వేశారు. అలాగే సినిమాలో కూడా ఇద్దరూ ఏమాత్రం తగ్గకుండా చేశారని తెలుస్తోంది. ఇక సాంగ్‌ టీజర్‌ను ఎన్టీఆర్‌, హృతిక్‌ ఫ్యాన్స్‌ తెగ వైరల్‌ చేసేస్తున్నారు. ఆగస్ట్‌ 14న సూపర్‌స్టార్‌ రజినీకాంత్‌, లోకేష్‌ కనకరాజ్‌ కాంబినేషన్‌లో రూపొందిన కూలీ కూడా రిలీజ్‌ అవుతోంది. ఈ రెండు సినిమాల మధ్య బాక్సాఫీస్‌ వార్‌ ఒక రేంజ్‌లో ఉంటుందని అందరూ అంచనా వేస్తున్నారు. ఇప్పటికే విడుదలైన కూలీ ట్రైలర్‌ కూడా సినిమాపై ఇప్పటివరకు ఉన్న అంచనాలను రెట్టింపు చేసిందనే చెప్పాలి. మరి ఈ రెండు సినిమాల్లో దేనిది పైచేయి అవుతుంది అనేది తెలియాలంటే ఆగస్ట్‌ 14 వరకు వేచి చూడక తప్పదు.