2015కి గుడ్ బై చెప్పేసే స‌మ‌య‌మిది. స‌రికొత్త ఆశ‌ల‌తో కొత్త‌యేడాదికి స్వాగ‌త స‌త్కారాలు పంపుతున్న వేళ ఇది. 2015 తెలుగు సినిమా ప‌రిశ్ర‌మ‌కు మిశ్ర‌మ ఫ‌లితాల్ని అందించింది. బాహుబ‌లి, శ్రీ‌మంతుడు లాంటి భారీ హిట్స్ తో పాటు బ్రూస్లీ, అఖిల్‌, కికి 2 లాంటి డిజాస్ట‌ర్లనూ రుచి చూపించింది. బాలీవుడ్ ప్ర‌ముఖుల ఆక‌స్మిక మ‌ర‌ణాలు... చిత్ర‌సీమ‌ను క‌దిలించాయి. ఇలా ఎన్నో జ్ఞాప‌కాలు.. 2015 ఇప్పుడు కాల‌గ‌ర్భంలో క‌ల‌సిపోతున్న.. ఆ స్మృతులు మాత్రం ఎప్ప‌టికీ వెంటాడుతూనే ఉంటాయి.

ఇప్పుడు 2016కి కోటి ఆశ‌ల‌తో క్లాప్ కొట్టేయ‌బోతున్నాం. 2016లోనూ స్టార్ హీరోల హంగామా క‌నిపించ‌బోతోంది. కొత్త రికార్డుల‌కు, బ్లాక్ బ్ల‌స్ట‌ర్ విజ‌యాల‌కూ.. ఈ యేడాదీ సూప‌ర్ ఛాన్స్ ఉంది. సంక్రాంతికి రాబోతున్న డిక్టేట‌ర్‌, నాన్న‌కు ప్రేమ‌తో చిత్రాల‌కు రికార్డులు బ‌ద్ద‌లు కొట్టే శ‌క్తి సామ‌ర్థ్యాలున్నాయి. వేస‌వికి వ‌స్తున్న సర్దార్‌, బ్ర‌హ్మోత్స‌వం వంద కోట్ల వైపు క‌న్నేశాయి.

బాహుబ‌లి 2 ఈ యేడాది వ‌చ్చేస్తే.. ఇక ఆ సంబ‌రం రెట్టింపు అవుతుంది. ఈ యేడూ... తెలుగు చిత్ర‌సీమ వంద‌ల కోట్లు త‌న బ్యాగులో వేసుకొనే ఛాన్స్ ద‌క్కుతుంది. రామ్‌చ‌ర‌ణ్ త‌నిఒరువ‌న్‌.. కూడా 2016లోనే వ‌స్తుంది. అన్నింటికంటే ముఖ్యంగా చిరంజీవి 150వ సినిమా కత్తి రీమేక్ కొత్త యేడాదే సెట్స్ పైకి వెళ్ల‌నుంది. ద‌స‌రాకి ఈ చిత్రం విడుద‌ల‌య్యే అవ‌కాశాలున్నాయి.

బ‌న్నీ స‌రైనోడుతో మ‌రో రూ.50 కోట్ల సినిమా త‌న ఖాతాలో వేసుకోవాల‌న్న ప‌ట్టుద‌ల‌తో ఉన్నాడు. ర‌వితేజ‌, నాగార్జున‌, గోపీచంద్‌... వీళ్లంతా ఘ‌న విజ‌యాల్ని సాధించే స‌త్తా ఉన్న‌వాళ్లే, చిన్న సినిమాలు ఎప్పుడు ఏ అద్భుతాన్ని సృష్టిస్తాయో చెప్ప‌లేం. సో.. 2016లోనూ భారీ విజ‌యాల్ని చూడొచ్చ‌న్న‌మాట‌.