సాధారణంగా ఏ సినిమా అయినా ప్రారంభం అయినప్పటి నుంచి దానికి సంబంధించిన అప్‌డేట్స్‌ను ఆడియన్స్‌కి చేరవేస్తుంటుంది చిత్ర యూనిట్‌. అలాగే సినిమా పూర్తయిన తర్వాత రిలీజ్‌కి దగ్గర పడుతున్న సమయంలో తమ సినిమా ప్రజల్లోకి వెళ్లాలన్న ఉద్దేశంతో వివిధ రకరకాలుగా ప్రమోషన్స్‌ చేస్తుంటారు. అందులో భాగంగానే ఆడియో రిలీజ్‌ అనీ, ప్రీ రిలీజ్‌ ఈవెంట్‌ అనీ, చిత్ర యూనిట్‌ ఇంటర్వ్యూలనీ.. ఇలా ఎంత వీలైతే అంత తమ సినిమా గురించి హైప్‌ తీసుకొచ్చే ప్రయత్నం చేస్తారు. ఆ క్రమంలో తమ సినిమా గురించి కాస్త అతిగానే చెప్పడం మనం చూస్తుంటాం. ఈ తంతుపై రామ్‌గోపాల్‌వర్మ స్పందిస్తూ ప్రమోషన్ల గురించి కొన్ని ఆసక్తికర వ్యాఖ్యలు చేశారు. అవేమిటో చూద్దాం.

‘సినిమా రిలీజ్‌ అయ్యే ముందు దానికి సంబంధించిన ప్రమోషన్స్‌ మనం చూస్తుంటాం. రకరకాల ఫంక్షన్స్‌లో ఆ సినిమాకి సంబంధింనిన హీరో, డైరెక్టర్‌, ప్రొడ్యూసర్‌.. ఇతర టెక్నీషియన్స్‌ రెచ్చిపోయి మాట్లాడుతుంటారు. ఈ సంక్రాంతి మాదే అని ఒకడంటాడు, బ్లాక్‌బస్టర్‌ కొట్టేస్తాం అని ఒకడంటాడు. మా సినిమా కుటుంబ సమేతంగా చూసి ఎంజాయ్‌ చేసే సినిమా అని ఒకడంటాడు. ఈసారి కొట్టేస్తున్నాం అని ఒకడంటాడు. బాక్సాఫీస్‌ను బద్దలు చేసేస్తుందని ఒకడంటాడు. ఇలాంటి మాటలు మనం వింటూనే ఉంటాం. ఆ సినిమా హిట్‌ అవుతుందో, ఫ్లాప్‌ అవుతుందో మనకు తెలీదు, వాళ్ళకి కూడా తెలీదు. కానీ, జనంలోకి ఇలాంటి మాటలు పంపిస్తుంటారు. టాలీవుడ్‌లో అలాంటి మాటలు మాట్లాడని ఒకే ఒక డైరెక్టర్‌ రాజమౌళి. ఇప్పటివరకు అతని కెరీర్‌లో ఒక్క ఫ్లాప్‌ కూడా లేదు. నాకు తెలిసి ఒక్క ఫ్లాప్‌ కూడా లేని డైరెక్టర్‌ రాజమౌళి మాత్రమే. అందులో డౌట్‌ లేదు. తన సినిమాకి కూడా ప్రమోషన్స్‌ చేస్తాడు. కానీ, ఏ ఒక్క ఫంక్షన్‌లోనూ తను చేసిన సినిమా బ్లాక్‌బస్టర్‌ అవుతుందని, బాక్సాఫీస్‌ను బద్దలు కొట్టేస్తుందని చెప్పిన సందర్భాలు లేవు నాకు తెలిసి. అంటే మనం చెప్పినా చెప్పకపోయినా సినిమాలో విషయం ఉంటే అదే సక్సెస్‌ అవుతుంది. ఆ విషయం రాజమౌళికి తెలుసు. అందుకే అలాంటి మాటలు ఆయన్నుంచి రావు’ అన్నారు.