రివ్యూల్ని అస్స‌లు ప‌ట్టించుకోను.. ప్రేక్ష‌కుల‌కూ రివ్యూలు అక్క‌ర్లేద్దు అన్న‌ది దిల్‌రాజు మాట‌. సినిమా బాగుంటే.. ఏ రివ్యూ ఆ విజ‌యాన్ని ఆప‌లేద‌న్న‌ది ఆయ‌న న‌మ్మే సిద్దాంతం. అందుకే రివ్యూలు చూడ్డ‌ట‌. అయితే త‌న సినిమాల‌కు తానే రివ్యూలు రాసి.. ప్రేక్ష‌కుల ముందుకు తీసుకొస్తానని మొన్నామ‌ధ్య‌... బిల్డ‌ప్ ఇచ్చాడు. ఇప్పుడు కృష్ణాష్ట‌మి సినిమా వ‌చ్చింది. ప్ర‌తీ రివ్యూ ఏకిప‌డేసింది. ఇంత రొటీన్ క‌థ దిల్‌రాజు బ్యాన‌ర్లోనేరాలేద‌ని ముక్త‌కంఠంతో చెప్పేస్తున్నాయి స‌మీక్ష‌లు. అయితే.. దిల్‌రాజు రివ్యూ ఇంత వ‌ర‌కూ రిలీజ్ కాలేదు. మ‌రి ఆయ‌న‌కు రాసే ఉద్దేశం ఉందో, లేదో? రాస్తే ప్రేక్ష‌కుల అభిప్రాయం తెలుసుకొని రాస్తాన‌న్నాడు.

సినిమా చూసినోళ్లంతా రొటీన్ సినిమా రా బాబూ... అని మొత్తుకొంటుంటే, మ‌రి దిల్‌రాజుకి ఆ మాట‌లు వినిపిస్తాయా? ఈ క‌థ పుట్ట‌డానికి కార‌ణం... దిల్‌రాజు. టీమ్ సెట్ చేసి సునీల్‌ని ఇందులోకి లాక్కొచ్చిందీ ఆయ‌నే. ఎడిట్ రూమ్‌లో రోజుల త‌ర‌బ‌డి కూర్చుని ట్రిమ్ చేసి ఫైన‌ల్ అవుట్ పుట్ ఏమిటో డిసైడ్ చేసిందీ ఆయ‌నే. సినిమా విడుద‌లని వాయిదాలు వేస్తూ జాప్యం చేసిందీ ఆయ‌నే. ఈ సినిమాకి రివ్యూ రాస్తా.. నేనే రేటింగులు ఇచ్చుకొంటా అన్న‌దీ ఆయ‌నే. మ‌రి.. అలాంటి మ‌నిషి ఇప్పుడు ఏమ‌ని స్పందిస్తాడో? త‌ప్పుల బాధ్య‌త అంతా త‌న నెత్తిమీద వేసుకొంటాడా? లేదంటే సినిమా బాగానే ఉంది ప్రేక్ష‌కుల‌కే చూడ‌డం రాదు.. అని నింద ఎదుటివాళ్ల‌పై కి విసిరేస్తాడా? వెయిట్ అండ్ సీ.