అల్లు అర్జున్, ప్రభాస్ ల సినీ కెరీర్ గ్రాఫ్ ఎలా ఉందోనని ఫిలిం నగర్‍లో చర్చ జరుగుతూంటే ఇదేదో బావుందనిపించి మీకోసం వాళ్ళిద్దరి సినీ కేరీర్ గ్రాఫ్ ని అందిస్తున్నాం. ముందుగా వీళ్ళిద్దరూ సినీ కుటుంబాల నేపథ్యం నుండి వచ్చినవారే. స్టైలిష్ స్టార్ అల్లు అర్జున్ తాత ప్రముఖ నటులు స్వర్గీయ అల్లు రామలింగయ్య, తండ్రి అల్లు అరవింద్ ప్రముఖ నిర్మాత, మామయ్యలు చిరంజీవి, పవన్ కళ్యాణ్, బావ రామ్ చరణ్ ప్రముఖ హీరోలు. అలాగే యంగ్ రెబెల్ స్టార్ ప్రభాస్ తండ్రి ప్రముఖ నిర్మాత, పెదనాన్న రెబెల్ స్టార్ కృష్ణం రాజు. ఇక వాళ్ళిద్దరి సినీ కెరీర్ గ్రాఫ్ పై దృష్టి సారిస్తే.... ముందుగా అల్లు అర్జున్ నటించిన సినిమాలను చూద్దాం. గంగోత్రి సినిమా ద్వారా పరిచయమైన అల్లు అర్జున్ ఆ తర్వాత ఆర్య, బన్నీ, దేశముదురు, హ్యాపీ, వేదం, వరుడు, ఆర్య-2 తదితర చిత్రాల్లో నటించాడు. వీటిలో వరుడు, ఆర్య-2 సినిమాలు అతన్ని నిరాశపరిచాయి. మిగిలిన సినిమాలు ఫరవాలేదనిపించాయి. దేశ ముదురు, ఆర్య, బన్నీ సినిమాలు మంచి హిట్లుగా నిలిచాయి.

మరి ప్రభాస్ విషయానికొస్తే ఈశ్వర్ సినిమాతో హీరోగా సినీ రంగప్రవేశం చేశాడు. తర్వాత రాఘవేంద్ర, వర్షం, ఛత్రపతి, పౌర్ణమి, మున్నా, యోగి, బుజ్జిగాడు మేడిన్ చెన్నై, బిల్లా, డార్లింగ్, ఇటీవల మిస్టర్ పర్ ఫెక్ట్ చిత్రాల్లో నటించాడి ప్రభాస్. వీటిలో వర్షం సినిమా సూపర్ హిట్టయి ప్రభాస్ కి స్టార్ ఇమేజ్ నిస్తే, ఛత్రపతి సినిమా చాలా పెద్ద హిట్టయి మాస్ హీరోగా అతని బాక్సాఫీస్ స్టామినాని నిరూపించింది.ఆ తర్వాత పౌర్ణమి, యోగి, మున్నా, బుజ్జిగాడు మేడిన్ చెన్నై, బిల్లా చిత్రాలు నిరాశపరచినా, డార్లింగ్, మిస్టర్ పర్ ఫెక్ట్ సినిమాలు హిట్టయి అతనికి ఊరటకలిగించాయి. అల్లు అర్జున్, ప్రభాస్ ఇద్దరూ చక్కని స్నేహితులనే విషయాన్ని ఇక్కడ మనం గుర్తుంచుకోవాలి.