English | Telugu
ప్చ్.. చిరు పక్కన హీరోయిన్ లేదు
Updated : Sep 22, 2015
చిరంజీవి రీ ఎంట్రీ అంటే మాటలా?? ఈసారి ఎంట్రీ అదిరిపోవాలి. అదీ... ఏడేళ్ల తరవాత చిరుని వెండి తెరపై చూడబోతున్నారు అభిమానులు. పాటలు, ఫైట్లు, డైలాగులు ఎందులోనూ లోటు రాకూడదు. ఈ విషయాల్లో తన స్టామినా ఏమాత్రం తగ్గలేదని చిరుకూడా నిరూపించుకోవాలాయె.
అందుకే... శ్రీనువైట్ల గట్టి స్కెచ్చే వేశాడు.ఆయన దర్శకత్వం వహిస్తున్న బ్రూస్లీలో చిరు ఓ అతిథి పాత్రలో కనిపించనున్న సంగతి తెలిసింది. చిరు కోసం ఓ పాట, ఓ ఫైటు డిజైన్ చేశారు. పతాక సన్నివేశాలకూ చిరు పాత్రతో లింకు పెట్టారు. ఆ మాటకొస్తే.. హీరో పాత్రకు ఏమాత్రం తీసిపోని విధంగా చిరు పాత్రని సృష్టించారు. చిరు - చరణ్ల పాట కోసం ఐటెమ్ భామ కావల్సొచ్చింది. ఇలియానా, తమన్నా పేర్లు పరిశీలనకు వచ్చాయి. అయితే ఇలియానా పారితోషికం పేరుతో నిర్మాతని బెదిరించేసరికి, తమన్నాతో సర్దుకుపోదామనుకొన్నారు.
ఇప్పుడు తమన్నా కూడా హ్యాండిచ్చేసింది. దాంతో.. ఇప్పుడు హీరోయిన్ లేకుండానే ఈ పాటని తెరకెక్కించేద్దాం అని భావిస్తున్నారట. చిరు, చరణ్ డాన్స్ చేస్తుంటే.. ఇక హీరోయిన్ని ఎవరు పట్టించుకొంటారన్నది చిత్రబృందం లాజిక్. మరి ఈ తెలివితేటలు ముందు ఎందుకు లేవో..??