స్మశానంలో దొంగలు పడ్డారు
కాని దోచుకునేందుకేముంది?
ఇన్ని ఎముకలు పుర్రెలు !
ఇంత బూడిద తప్ప !
వారెంతటి కోటీశ్వరులైనా
పేరుకే శ్రీమంతులు
భూమిమీద ఊపిరి ఉన్నంత వరకే
సిరిసంపదలు
వస్తూ పట్టుకొచ్చి
సమాధిల్లో దాచుకున్నదేమిటి?
సమాధులు త్రవ్వితే దొరికేదేముంది?
గుళ్ళూ గోపురాలు త్రవ్వినా
గుప్తనిధులు దొరుకునేమో !
ఎన్నికోట్లు ఆర్జించిలాభమేమి?
కన్నుమూసి కట్టెగా మారితే
ఎంతటి శ్రీమంతులైనా
బికారులే బిక్షగాళ్ళే సన్యాసులే !
కాటికి పయణం ఖాళీచేతులతోనే !
కానీ కాదేదీ కబ్జా కనర్హమన్నట్టు
ధనదాహం తీరని కబ్జాదారుల
కబంధహస్తాల్లో నేడు స్మశానాలు
వారికవి స్వర్గాధామాలౌతున్నాయి
ఔరా ! ఇది ఎంతవింత నమ్మలేనంత ?
 |