ప్రతిష్టాత్మకమైన
ఆస్కార్ ను గెలుచుకున్న
"ఆర్ ఆర్ ఆర్ తెలుగు చిత్రం"
నా "తెలుగు తల్లి" నుదుట
దర్శక దిగ్గజం రాజమౌళి
దిద్దిన‌ "సింధూర తిలకం"
ఆస్కార్ అవార్డుతో
తేనెలూరే నా తెలుగు
"పాటకు జరిగింది పట్టాభిషేకం"
ప్రపంచ వ్యాప్తంగా
వెలిగే నా "తెలుగు జాతికి"
ఇది ఓ గర్వకారణం..! ఓ పర్వదినం..!

అసలు అదృష్టవంతులెవరు ?
ఇది ఎవరి కృషికి కసికి నిదర్శనం ?
ఎందరి శ్రమకు కళానైపుణ్యానికి
విశ్వవేదిక సాక్షిగా దక్కినదీ ప్రతిఫలితం ?

నిజానికి...
నేడు "ఆస్కార్ అవార్డు గ్రహీత"
ఎవరో కాదు నా "తెలుగు అక్షరమే"
తెలుగుభాషలో పొదిగిన
ఆణిముత్యాలవంటి
యాభైయారు అక్షరాల్లో
మొదటి రెండు అక్షరాలే
మహత్తరమైన మాంత్రికశక్తి
దాగిన "బీజాక్షరాలు"
అ...తరువాత...ఆ... ఉంది
అ...మ్మ ఉంది
ఆ...కలి ఉంది
అ...మృతముంది
ఆ...కర్షణ ఉంది
అ...ద్భుతం ఉంది
ఆ...స్కార్ అవార్డు ఉంది...

నా "తెలుగు అక్షరం"
మొన్న "నింగిలో మెరిసే నక్షత్రం"
నిన్న "నిశిరాత్రిలో నిండు పున్నమి"
నేడు విశ్వానికే విస్మయం కలిగించి
"నాటు నాటు" అంటూ
ప్రపంచానికే తెలుగు వెలుగులు
పంచిన "సుప్రభాత సూర్యకిరణం"

నిన్న...
గోల్డెన్ గ్లోబ్ అవార్డుతో
నా "తెలుగు అక్షరం"
గంగా గోదావరిలా గంతులేసింది
నేడు...
ఈ ఆస్కార్ అవార్డుతో
నా "తెలుగు భాష"
ఒక పసిఫిక్
మహాసముద్రమై ఉప్పొంగిపోయింది
నా "పాటకు జరిగింది పట్టాభిషేకం"
నా "అక్షరానికి దక్కింది ఆస్కార్ అవార్డు"