ఆకలేసిన ఒక మేక
కసాయివాడి ఎడమ
చేతిలోని పచ్చని ఆకుల్ని
చూసి పక్కున నవ్వుతుంది
వాడి వెంటే పరుగులు తీస్తుంది
వాడి కాళ్ళచుట్టే తిరుగుతుంది

వాడు ప్రేమతో వీపు నిమరగానే
కొన్ని ఆకులు ముందు విసరగానే
ఆకలితో వున్న ఆ మేక పాపం
చకచకా ఆకులు మేస్తుందే కాని
వాడి కుడిచేతిలో ఓ పదునైన
కత్తి కసికసిగా చూస్తుందని...
ఇక అదేతనకు చివరిరాత్రిని...

నిద్రలేచీ లేవంగానే
కళ్లుతెరిచీ తెరవంగానే
మెడపైన కత్తివేటు పడుతుందని...
రేపు రక్తపు మడుగులో పడి
తాను గిలగిలలాడక తప్పదని...

ఆపై తన ప్రాణాలు, క్షణాల్లో
గాలిలో కలిసిపోతాయని...
ఆ అమాయకపు మేకకు తెలియదు పాపం
ఆ కసాయివాడు పచ్చిమోసగాడని...తనకు
తిండి పెట్టేది తిరిగి తనను తినడానకేనని....