నిన్నమతం ఒక మత్తుమందు
నేడు ఆపేరు ఎత్తితేనే రక్తం చిందు

రాముడు కోరునా రక్తాభిషేకం లేదే
అల్లా కోరునా అల్లకల్లోలం లేదే
క్రీస్తు కోరునా కిరాతకం లేదే
మరెందుకు మతం పేర
ఈ మారణహోమాలు
జీహాద్ పేర ఈ  జీవహింసలు
రధయాత్ర పేర ఆ రక్తపాతాలు
మతబోధ ముసుగులో ఈ మతమార్పిడులు

శాంతి శాంతి అంటూనే
సమరానికి సై అంటారా ?
అందరిని ప్రేమించాలంటూనే
అన్యం పుణ్యం ఎరుగని
అమాయకుల ప్రాణాలు తీస్తారా  ?
పవిత్ర యుద్దం పేర ప్రజల తలల్ని
నరరూప రాక్షసుల్లా నడిరోడ్డులో నరికేస్తారా?

అత్యాధునిక
అణ్వాయుధాలున్నాయన్న అహంకారమా!
పాలునీళ్ళు ప్రవహించే చోట
రాక్షసత్వం రాజ్యమేలుతోందా !
రక్తదాహం తీరకుందా !
నరుల రక్తం ఏరులైపారేది
ఏకఛత్రాధిపత్యం కోసమేనా ?
ఇది ఎక్కడి నీతి ? ఇది ఎక్కడి ధర్మం ?
ఎక్కడ శాంతి ? ఎప్పుడు కాంతి ?
ప్రేమ భ్రమయేనా? శాంతి భ్రాంతియేనా?

అందుకే,
మతోన్మాదమే ఐతే మరో ఉగ్రవాదం 
ఉపేక్షించక మోపాలి దానిపై ఉక్కుపాదం