నా కలం కన్న
నా కమ్మని కవితలు
అభ్యుదయ భావాల...
ఆణిముత్యాల...
నిత్యసత్యాల...
నీతి కవితలు...

సుఖసంతోషాలను
సకల శుభాలనొసగే
సూక్తి సుధలు...

కలం బట్టి నేకవిత
వ్రాయబూనగా...
వెన్నుతట్టె...ఆ వేమన్న
పొంగిపోయె...ఈ పోలన్న...

నా కలం కన్న
నా కమ్మని కవితలు
పొంగిపోయే పాలకుండలు...
ఆరక రగిలే అగ్నిజ్వాలలు...

నా కలం కన్న
నా కమ్మని కవితలు
నీతికి నిజాయితీకి నిధులు...
చల్లనినీడనిచ్చే పచ్చని వృక్షాలు...

నా కలం కన్న
నా కమ్మని కవితలు
నిజానికి నిలువుటద్దాలు‌‌...
నిర్మలమైన జీవితానికై
చేస్తాయి నిశ్శబ్దపు యుద్ధాలు...

నా కలం కన్న
నా కమ్మని కవితల్లో
కష్టేఫలి శ్రమయేవ జయతేన్న
నిప్పులాంటి నినాదాలుంటాయి
కష్టజీవుల కన్నీటి వరదలకు
ఆనకట్టలుంటాయి
కడుపునింపే కరెన్సీ కట్టలుంటాయి