భారతీయ రైల్వే చరిత్రలో ప్రయాణికులకు మరింత మెరుగైన, అధునాతన సేవలను అందించేందుకు కేంద్ర ప్రభుత్వం ప్రతిష్టాత్మకంగా తీసుకువచ్చిన వందేభారత్ స్లీపర్ రైళ్లు త్వరలోనే ఆంధ్రప్రదేశ్ ప్రజలకు అందుబాటులోకి రానున్నాయి. ఇప్పటివరకు కేవలం పగటి పూట కూర్చుని ప్రయాణించే సిట్టింగ్ కోచ్‌లతో నడుస్తున్న వందేభారత్ రైళ్ల స్థానంలో, రాత్రి సమయాల్లో సుదూర ప్రాంతాలకు ప్రయాణించే ప్రయాణికుల కోసం అత్యాధునిక వసతులతో కూడిన స్లీపర్ వెర్షన్‌ను పట్టాలెక్కుస్తున్నారు. 

ముఖ్యంగా దక్షిణ భారతదేశంలోని ప్రధాన నగరాలను కలుపుతూ ప్రారంభించనున్న ఈ వందేభారత్ స్లీపర్ రైలు సర్వీసు ద్వారా ఏపీలోని పలు కీలక రైల్వే స్టేషన్లలో హాల్టింగ్ కల్పించనుండటంతో రాష్ట్ర ప్రజలకు సరికొత్త ప్రయాణ అనుభూతి లభించనుంది.   విమానంలో ప్రయాణిస్తున్న అనుభూతిని కలిగించేలా ఈ రైలు బోగీలను అత్యంత ఆధునిక సాంకేతికతతో డిజైన్ చేశారు. ఈ రైలులో మొత్తం 16 కోచ్‌లు అందుబాటులో ఉండగా, ప్రయాణికుల సౌకర్యం కోసం ఫస్ట్ ఏసీ, సెకండ్ ఏసీ మరియు థర్డ్ ఏసీ బోగీలను ఏర్పాటు చేశారు. మొత్తం 823 మంది ప్రయాణికులు ఒకేసారి ప్రయాణించేలా ఈ కోచ్‌ల సామర్థ్యం ఉంది. 

ఇందులో 11 థర్డ్ ఏసీ కోచ్‌లలో 611 బెర్త్‌లు, 4 సెకండ్ ఏసీ కోచ్‌లలో 188 బెర్త్‌లు, అలాగే ఒక ఫస్ట్ ఏసీ కోచ్‌లో 24 బెర్త్‌లు ప్రత్యేకంగా డిజైన్ చేయబడ్డాయి. ప్రయాణంలో ప్రయాణికుల భద్రతకు అత్యంత ప్రాధాన్యతనిస్తూ అత్యాధునిక కవచ్ భద్రతా వ్యవస్థ, ఆటోమేటిక్ సెన్సార్ డోర్లు, సీసీటీవీ నిఘా కెమెరాలు, డిజిటల్ డిస్‌ప్లే బోర్డులు మరియు అత్యవసర సమయాల్లో ఉపయోగించే టాక్ బ్యాక్ యూనిట్లు వంటి అధునాతన ఫీచర్లు పొందుపరిచారు.   ఈ సరికొత్త వందేభారత్ స్లీపర్ రైలు ప్రధానంగా బెంగళూరులోని సర్ ఎం విశ్వేశ్వరయ్య టెర్మినల్ (SMVT) నుంచి ముంబైలోని ఛత్రపతి శివాజీ మహారాజ్ టెర్మినస్ (CSMT) మధ్య రాకపోకలు సాగించనుంది. 

ఈ మార్గంలో ప్రయాణించే రైలు ఆంధ్రప్రదేశ్ మీదుగా ప్రయాణించనుండటంతో రాయలసీమ  ఇతర ప్రాంతాల వారికి మహానగరాలకు వెళ్లే మార్గం సులువవుతుంది. ఏపీలోని ధర్మవరం, అనంతపురం, గుంతకల్ రైల్వే స్టేషన్లలో ఈ రైలుకు స్టాపేజ్ కల్పించడం జరిగింది. దీనివల్ల ఈ ప్రాంతాల నుంచి బెంగళూరు, ముంబై వెళ్లే ఐటీ ఉద్యోగులు, వ్యాపారులు మరియు సాధారణ ప్రయాణికులకు ఎంతో ప్రయోజనం చేకూరనుంది.   గంటకు 160 నుండి 180 కిలోమీటర్ల వేగంతో పరుగులు పెట్టగల సామర్థ్యం ఉన్న ఈ రైలు, బెంగళూరు-ముంబై మధ్య దాదాపు 1118 కిలోమీటర్ల దూరాన్ని కవర్ చేస్తుంది.

 ప్రస్తుతం సాధారణ ఎక్స్‌ప్రెస్ రైళ్లలో ఈ ప్రయాణానికి దాదాపు 20 నుంచి 22 గంటల సమయం పడుతుండగా, ఈ వందేభారత్ స్లీపర్ రైలు ద్వారా ఆ ప్రయాణ సమయం కేవలం 16 గంటలకు మాత్రమే తగ్గనుంది. దీనివల్ల ప్రయాణికులకు సుమారు 4 నుంచి 6 గంటల విలువైన సమయం ఆదా అవుతుంది. రాత్రి సమయంలో ప్రయాణాన్ని ప్రారంభించి, మరుసటి రోజు మధ్యాహ్నానికి గమ్యస్థానానికి చేరుకునేలా టైమింగ్స్ రూపొందించడంతో ప్రయాణ బడలిక పూర్తిగా తొలగిపోతుంది. రైలులో నాణ్యమైన శాఖాహార, మాంసాహార క్యాటరింగ్ సేవలు కూడా అందుబాటులో ఉండనున్నాయి. త్వరలోనే ప్రారంభం కానున్న ఈ వందేభారత్ స్లీపర్ రైలు సర్వీసులు ఆంధ్రప్రదేశ్ రవాణా రంగంలో మరొక మైలురాయిగా నిలవనున్నాయి.   

 

 

 

[ Vande bharat sleeper, ap railway news, bangalore mumbai train, vande bharat express, indian railways, andhra pradesh trains, Telugu One, Telugu News ]