అమెరికా వ్యూహాత్మక పెట్రోలియం నిల్వలు (ఎస్పీఆర్) 300 మిలియన్ బ్యారెళ్ల దిగువకు జారిపోవడం సాధారణ పరిపాలనా గణాంకం కాదు. చమురు సరఫరా యుద్ధం, సముద్ర మార్గాల నిరోధం లేదా భారీ ప్రకృతి విపత్తు సమయంలో వినియోగించాల్సిన జాతీయ భద్రతా నిల్వను, తక్షణ  భౌగోళిక-రాజకీయ సంక్షోభంలో విస్తృతంగా వినియోగించిన ఫలితం.

ఆగస్టు 7తో ముగిసిన వారానికి ఎస్పీఆర్ నిల్వలు 6.1 మిలియన్ బ్యారెళ్లు తగ్గి 298.7 మిలియన్ బ్యారెళ్లకు చేరాయి.  1983 జనవరి తరువాత ఈ స్థాయి కనిష్ఠానికి ఎస్పీఆర్ దగజారడం ఇదే మొదటి సారి.   అమెరికా ఇంధన శాఖ అధికారిక వివరాల ప్రకారం ఆగస్టు 5 నాటికి నిల్వలు 304.8 మిలియన్ బ్యారెళ్లుగా ఉంది. ఎస్పీఆర్ అధీకృత నిల్వ సామర్థ్యం 714 మిలియన్ బ్యారెళ్లు.
 714 మిలియన్ బ్యారెళ్ల సామర్థ్యం ఉన్న నిల్వలో 300 మిలియన్ బ్యారెళ్లకంటే తక్కువ ఉండటాన్ని కేవలం సగానికి దిగువ అనడం సరిపోదు..  ధరల పతనాన్ని  ఎదుర్కొనే అమెరికా వ్యూహాత్మక స్వేచ్ఛ తగ్గిపోవడంగా చెప్పాల్సి ఉంటుంది.   టెక్సాస్, లూసియానా గల్ఫ్ తీర ప్రాంతాల్లోని ఉప్పు గుహలలో ఈ ఇంధనాన్ని అత్యంత సురక్షితంగా నిల్వ చేసే వ్యవస్థ అమెరికా వద్ద ఉంది. మొత్తం 714 మిలియన్ బ్యారెళ్లను భద్రపరిచేందుకు వీలుగా ఏర్పాటు చేసిన భూగర్భ కేంద్రాల్లో, ప్రస్తుతం సగానికంటే తక్కువ పరిమాణం మాత్రమే మిగలడం ఫెడరల్ ఇంధన భద్రత సమర్థతను ప్రశ్నించేలా చేస్తోంది. అయితే, ఈ పరిమితి కేవలం ఫెడరల్ ప్రభుత్వం ఆధీనంలో ఉన్న అత్యవసర నిల్వలకు మాత్రమే చెందుతుందని, వాణిజ్య సంస్థలు మరియు రిఫైనరీల వద్ద ఉన్న ప్రైవేటు నిల్వలు ఇందుకు అదనమని నిపుణులు స్పష్టం చేస్తున్నారు. 

1973, 74 అరబ్ చమురు నిషేధం అమెరికాకు గుణపాఠం నేర్పింది. విదేశీ చమురు సరఫరాపై అధిక ఆధారపడిన దేశం.. , చమురును ఆయుధంగా మలిచిన భౌగోళిక రాజకీయాల ఎదుట ఎంత అసహాయంగా మారుతుందో ఆ సంక్షోభం చూపించింది. దాని ఫలితంగానే 1975లో ఎనర్జీ పాలసీ అండ్ కన్జర్వేషన్ యాక్ట్ (ఈపీసీఏ) ద్వారా ఎస్పీఆర్ ఏర్పాటైంది. 

1977లో ఈ నిల్వకు తొలి చమురు సరఫరా చేరింది. 2009 డిసెంబర్ 27న ఎస్పీఆర్ అత్యధిక చారిత్రక నిల్వ అయిన 726.6 మిలియన్ బ్యారెళ్లకు చేరింది. హరికేన్ కత్రినా తర్వాత 2005లో, గల్ఫ్ ప్రాంతంలోని రిఫైనరీలు,  చమురు మౌలిక సదుపాయాలకు నష్టం జరిగినప్పుడు, అమెరికా అత్యవసర చమురును విక్రయాలు, మార్పిడి ఒప్పందాల ద్వారా ఉపయోగించింది.  ఆ సందర్భంలో దాదాపు 20.8 మిలియన్ బ్యారెళ్లు విడుదలయ్యాయి. 

ఈ చరిత్ర ఒక విషయం స్పష్టంగా చెబుతుంది.. ఎస్పీఆర్ అనేది రోజువారీ ఇంధన ధరలను రాజకీయంగా నియంత్రించడానికి సృష్టించిన నిధి కాదు. అది సరఫరా వ్యవస్థ స్తంభించినప్పుడు,  దేశ ఆర్థిక వ్యవస్థను నిలబెట్టడానికి ఉద్దేశించిన జాతీయ భద్రతా ఆయుధం.

మార్చి 11న అధ్యక్షుడు డొనాల్డ్ ట్రంప్ ఆదేశంతో అమెరికా ఇంధన శాఖ ఎస్పీఆర్ నుంచి 172 మిలియన్ బ్యారెళ్ల ముడిచమురు విడుదలకు అనుమతించింది. హోర్ముజ్ జలసంధి ద్వారా చమురు ఎగుమతులకు అంతరాయం ఏర్పడటం, ఇరాన్ యుద్ధం నేపథ్యంలో ప్రపంచ చమురు సరఫరా ఒత్తిడిలోకి వెళ్లడం ఈ నిర్ణయానికి తక్షణ కారణమని మార్కెట్ నివేదికలు పేర్కొన్నాయి. ఇది చిన్నపాటి జోక్యం కాదు. మార్చి చివరి నుంచి ఆగస్టు 7 వరకు వరుసగా 20 వారాలపాటు నిల్వలు తగ్గాయి.  ఈ వ్యవధిలో సమష్టిగా 116.7 మిలియన్ బ్యారెళ్లు విడుదలైనట్లు అధికారిక గణాంకాలు చెబుతున్నాయి.  మొత్తం 172 మిలియన్ బ్యారెళ్ల విడుదల ప్రణాళిక పూర్తిగా అమలైతే నిల్వ   243.4 మిలియన్ బ్యారెళ్లకు దిగజారే అవకాశముందని అంచనాలు చెబుతున్నాయి.  అత్యవసర సమయంలో నిల్వను వినియోగించడం తప్పు కాదు. అయితే తక్షణ ధరల ఒత్తిడిని తగ్గించేందుకు దేశ భద్రతా బఫర్ ను అసాధారణ స్థాయిలో ఖాళీ చేసి.. దానిని  తిరిగి నింపే స్పష్టమైన కాలపట్టికను చూపకపోవడం మాత్రం విధానపరమైన లోపంగా పరిశీలకులు విశ్లేషిస్తున్నారు. 

ఈపీసీఏ ప్రకారం అధ్యక్షుడికి ఎస్పీఆర్ నుంచి చమురు విడుదల చేయడానికి విస్తృత అధికారం ఉంది. కానీ అది నిరంకుశ అధికారం కాదు.   సివియర్ ఎనర్జీ సప్లై ఇంటరప్షన్  ఉందని అధ్యక్షుడు నిర్ధారించాలి.  అత్యవసర పరిస్థితి కారణంగా సరఫరాలో గణనీయమైన, దీర్ఘకాలిక తగ్గుదల ఏర్పడిందని, దాని వల్ల పెట్రోలియం ఉత్పత్తుల ధరలు తీవ్రంగా పెరిగాయని, ఆ పెరుగుదల జాతీయ ఆర్థిక వ్యవస్థపై పెద్ద ప్రతికూల ప్రభావం చూపుతుందని తేల్చాలి. హోర్ముజ్ జలసంధి చుట్టూ ఏర్పడిన సరఫరా సంక్షోభం వంటి పరిస్థితిలో ఈ చట్టబద్ధ ప్రమాణాలను సమర్థించడానికి ప్రభుత్వానికి బలమైన ఆధారం ఉండవచ్చు. అంతర్జాతీయ ఇంధన సంస్థ  సమష్టి చర్యల కింద అమెరికా బాధ్యతలు నెరవేర్చాల్సి వచ్చినా విడుదలకు చట్టపరమైన మార్గం ఉంది. అయితే చట్టబద్ధ అధికారం ఉందన్న ఒక్క కారణంతో నిర్ణయం వ్యూహాత్మకంగా సముచితమైందని తేలదు. కోర్టు పరిశీలనకు సాధారణంగా పరిమిత స్థలం ఉన్నా, ప్రజాస్వామ్య పర్యవేక్షణకు కాంగ్రెస్, మీడియా,  ప్రజలే ప్రధాన వేదికలు.

ఎస్పీఆర్లో చమురు విడుదల చేస్తే మార్కెట్లో అదనపు సరఫరా వస్తుంది. అది తాత్కాలికంగా చమురు ధరలపై ఒత్తిడి తగ్గిస్తుంది. కానీ ఇది ఉత్పత్తిని శాశ్వతంగా పెంచే పరిష్కారం కాదు. నిల్వ నుంచి తీసిన ప్రతి బ్యారెల్ కు  బదులుగా భవిష్యత్తులో మళ్లీ కొనుగోలు చేసి నిల్వను నింపాలి. అప్పటి మార్కెట్ ధర ఎక్కువైతే, తక్కువ ధర సమయంలో అమ్మిన చమురును అధిక ధరకు కొనాల్సిన పరిస్థితి కూడా రావచ్చు. అమెరికా ఇంధన శాఖ ప్రకారం ఎస్పీఆర్ లోని  చమురుకు చరిత్రపరమైన సగటు కొనుగోలు ధర బ్యారెల్కు 29.70 డాలర్లు. ఈ సంఖ్య ప్రభుత్వానికి తక్షణ ఆదాయం లభిస్తుందనే సౌకర్యవంతమైన వాదనకు దారితీయవచ్చు. కానీ ఎస్పీఆర్ లక్ష్యం లాభనష్టాల వ్యాపారం కాదు. తీవ్రమైన సరఫరా సంక్షోభంలో దేశ ఆర్థిక వ్యవస్థను కాపాడటం. అందువల్ల చమురు అమ్మి ఆదాయం సంపాదించాం  అనే వాదన, భవిష్యత్ అత్యవసర భద్రతను బలహీనపరిస్తే, ప్రభుత్వ లెక్కల్లో కనిపించేది అర్ధసత్యం మాత్రమే.

ఎస్పీఆర్ గరిష్ఠ నామమాత్ర విడుదల సామర్థ్యం రోజుకు 4.4 మిలియన్ బ్యారెళ్లు. అధ్యక్షుడు నిర్ణయం తీసుకున్న సుమారు 13 రోజుల్లో చమురు మార్కెట్లోకి ప్రవేశించగలదని ఇంధన శాఖ చెబుతోంది. కాగితంపై ఇది భారీ సామర్థ్యంగానే కనిపిస్తుంది. కానీ సౌకర్యాల మరమ్మతులు, నిర్మాణ పనులు, పైప్ లైన్  పరిమితులు, గల్ఫ్ తీరంలోని రవాణా పరిస్థితులు వాస్తవ విడుదల సామర్థ్యాన్నిఅనివార్యంగా ప్రభావితం చేస్తాయి. 

ఫెడరల్ పరిశీలకుల అంచనాలను ఉటంకిస్తూ వచ్చిన నివేదికల ప్రకారం, నిర్మాణ పనులు,  నిర్వహణ పరిమితుల వల్ల ఎస్పీఆర్లోని చమురులో పావు వంతుకన్నా ఎక్కువ భాగం తక్షణ విడుదలకు అందుబాటులో లేకపోయే పరిస్థితులు ఉన్నాయి. మరోవైపు..  ఇంధన శాఖ ప్రతినిధి ప్రకారం ఉప్పు గుహలను సురక్షితంగా నిర్వహించడానికి సామర్థ్యంలో సుమారు 10 శాతం, అంటే దాదాపు 70 మిలియన్ బ్యారెళ్ల కనిష్ఠ స్థాయి అవసరం. 

అంటే 298.7 మిలియన్ బ్యారెళ్లు ఉన్నాయన్న గణాంకం మొత్తం ఉపయోగించదగిన అత్యవసర రక్షణ అని భావించడం పొరపాటు. నిల్వ పరిమాణం, దాన్ని ఎంత వేగంగా విడుదల చేయగలం, ఏ నాణ్యత గల ముడిచమురు ఎక్కడ అందుబాటులో ఉంది, ఏ రిఫైనరీ దాన్ని ప్రాసెస్ చేయగలదు అన్న  అంశాలన్నీ కలిసే నిజమైన భద్రతా సామర్థ్యాన్ని నిర్ణయిస్తాయి.

ఈ అంశాన్ని రాజకీయ పోరాటానికి ఉపయోగించుకోవడం చాలా సులభం. ప్రతిపక్షం ప్రభుత్వం జాతీయ భద్రతా నిల్వను ఖాళీ చేసింది  అంటుంది. అధికార పక్షం  అపూర్వమైన ప్రపంచ సరఫరా సంక్షోభంలో వినియోగదారులపై ధరల భారాన్ని తగ్గించాం  అంటుంది. ఈ రెండు వాదనల్లోనూ కొంత సత్యం మాత్రమే ఉంది; కానీ పూర్తి వాస్తవం మరింత కఠినమైనది.

హోర్ముజ్ జలసంధి సరఫరా అంతరాయం నిజంగా తీవ్రమైతే.. ఎస్పీఆర్ వినియోగం చట్టబద్ధంగానే కాకుండా విధానపరంగానూ అవసరమై ఉండవచ్చు. కానీ అదే సమయంలో, 172 మిలియన్ బ్యారెళ్ల విడుదల అనేది నిల్వలో మిగిలిన సామర్థ్యంతో పోలిస్తే అసాధారణంగా పెద్ద పరిమాణం. దాని ఫలితంగా అమెరికా తదుపరి సముద్ర మార్గ నిరోధం, తుఫాను, యుద్ధ విస్తరణ, లేదా ప్రపంచ ఉత్పత్తి పతనం ఎదురైతే తక్కువ వ్యూహాత్మక బఫర్ తో పోరాడాల్సి వస్తుంది.

2021 నవంబర్ నుంచి 2023 మార్చి మధ్య జరిగిన 220 మిలియన్ బ్యారెళ్ల చారిత్రక విడుదల తరువాత ఎస్పీఆర్ ఇప్పటికే సామర్థ్యంలో సగానికి సమీప స్థాయికి దిగివచ్చింది. దాని తర్వాత 2026 హోర్ముజ్ సంక్షోభ విడుదల నిల్వను మరింతగా హరించింది. కాబట్టి ప్రస్తుత స్థితికి కేవలం ఒకే ప్రభుత్వాన్ని లేదా ఒకే నిర్ణయాన్ని బాధ్యుడిని చేయడం సరికాదు.  కానీ ప్రస్తుత విడుదల పరిమాణం, పునర్నిర్మాణ ప్రణాళికపై అధికార ప్రభుత్వం జవాబుదారీగా ఉండాల్సిందే. 

చమురు ధరల పెరుగుదల నేరుగా పెట్రోల్ బంకులో కనిపిస్తుంది.  కానీ దాని ప్రభావం అక్కడితో ఆగదు. రవాణా ఖర్చు పెరిగితే ఆహార సరఫరా, పారిశ్రామిక ఉత్పత్తి, విమాన ప్రయాణం, సరుకు రవాణా, వ్యవసాయ ఇన్ పుట్  అన్నీ ఖరీదవుతాయి. ద్రవ్యోల్బణం మళ్లీ పెరిగితే ఫెడరల్ రిజర్వ్ పై  వడ్డీ రేట్లను అధికంగా ఉంచే ఒత్తిడి పెరుగుతుంది.  దాని ప్రభావం గృహరుణం, వాహన రుణం, వ్యాపార రుణాలపై పడుతుంది. అందువల్ల ఎస్పీఆర్ నుంచి చమురు విడుదలను  ప్రజలకు ఉపశమనం,  జాతీయ నిల్వల దోపిడీ  అని ఏక వాక్యంతో తీర్పు చెప్పడం సరైంది కాదు. కానీ తీవ్రమైన సరఫరా అంతరాయాన్ని ఎదుర్కొనే సమయంలో ధరల నియంత్రణకు తాత్కాలిక ఉపశమనాన్ని ఇవ్వడం ఒక విషయం.. అదే చర్యను దీర్ఘకాలిక ఇంధన విధానానికి ప్రత్యామ్నాయంగా చూపడం మరో విషయం. రెండవది ఆర్థికంగానూ, భద్రతాపరంగానూ నిలవదు. ఎస్పీఆర్ను ఖాళీ చేయడం ద్వారా ప్రభుత్వం చమురు సమస్యను పరిష్కరించదు.  అది సంక్షోభాన్ని కొనుగోలు చేసే సమయాన్ని మాత్రమే పెంచుతుంది. ఆ సమయాన్ని కొత్త సరఫరా, సమర్థ వినియోగం, నిల్వ పునర్నిర్మాణం కోసం వినియోగించకపోతే, తదుపరి సంక్షోభం మరింత ఖరీదైనదవుతుంది.

మీడియాలో  300 మిలియన్ బ్యారెళ్ల దిగువ  అనే అంకె ఆకర్షణీయమైన శీర్షిక.. కానీ దాని వెనుక ఉన్న ప్రశ్నలు మరింత ముఖ్యమైనవి. 172 మిలియన్ బ్యారెళ్ల విడుదల పూర్తయ్యాక నిల్వను ఎప్పుడు, ఏ ధర వద్ద, ఎంత వేగంగా తిరిగి నింపుతారు?  తగ్గిన నిల్వ స్థాయి వద్ద ఉప్పు గుహల నిర్వహణ ప్రమాదాలపై ప్రభుత్వ ప్రణాళిక ఏమిటి?  ప్రైవేటు రంగం వద్ద ఉన్న నిల్వలతో, ఐఈఏ బాధ్యతలతో, దేశీయ ఉత్పత్తితో అమెరికా అత్యవసర కవరేజీ వాస్తవంగా ఎంత?

2025 చివరినాటికి 411 మిలియన్ బ్యారెళ్ల ఎస్పీఆర్ నిల్వ అమెరికా నికర ముడిచమురు దిగుమతులకు  125 రోజుల రక్షణను అందించేదని ఇంధన శాఖ తెలిపింది. ఐఈఏ సభ్యదేశాలకు ప్రజా,  ప్రైవేటు నిల్వల కలయికలో కనీసం 90 రోజుల దిగుమతి రక్షణ అవసరం. 2026 విడుదలల అనంతరం ఈ గణితం వేగంగా మారింది. కాబట్టి ప్రభుత్వం ప్రతివారం నిల్వ పరిమాణాన్ని చెప్పడం మాత్రమే కాకుండా, ప్రస్తుత అంతర్జాతీయ సరఫరా పరిస్థితులకు అనుగుణంగా అమెరికా వాస్తవ అత్యవసర రక్షణ ఎన్ని రోజులు ఉందో పారదర్శకంగా వివరించాలి.

అమెరికా ఎస్పీఆర్ను 1975లో సృష్టించిన ఉద్దేశ్యం.. మార్కెట్ లాభం కోసం కాదు, రాజకీయ శీర్షికల కోసం కాదు, దేశాన్ని తీవ్రమైన చమురు సరఫరా దెబ్బల నుంచి కాపాడటానికి. ఇప్పుడు 298.7 మిలియన్ బ్యారెళ్లకు పడిపోయిన నిల్వ ఆ ఉద్దేశ్యాన్ని మళ్లీ గుర్తు చేస్తోంది. ప్రస్తుత విడుదల ఒక నిజమైన భౌగోళిక రాజకీయ సరఫరా అత్యవసరానికి స్పందన కావచ్చు. కానీ నిల్వను 243 మిలియన్ బ్యారెళ్ల సమీపానికి తీసుకెళ్లే మార్గంలో, తిరిగి నింపే ప్రణాళికను ప్రజలకు చెప్పకుండా ముందుకు సాగితే అది బాధ్యతాయుత ఇంధన నిర్వహణ కాదు. జాతీయ భద్రతా బీమా పాలసీని అవసరమైనప్పుడు ఉపయోగించడం సమంజసం.. కానీ ప్రతి సంక్షోభానంతరం దాన్ని మళ్లీ పునరుద్ధరించకపోవడం నిర్లక్ష్యమే.

-సీతారాం కంఠంనేని 

ఈ విశ్లేషణ మీకు నచ్చినట్లయితే, దయచేసి మా https://TeluguOne.com  పోర్టల్‌ను అనుసరించండి, మీ స్నేహితులతో పంచుకోండి, అలాగే మీ విలువైన అభిప్రాయాలను తెలియజేయండి.   

US Strategic Petroleum Reserve, US Crude Oil Reserve, elow 300 Million Barrels, Global Energy Crisis, Hormuz Strait Oil Supply Impact, US Fuel Price Inflation News Telugu