అగ్రరాజ్యం అమెరికా తీవ్ర ఆర్థిక లోటుతో విలవిలలాడుతోంది. దేశ చరిత్రలోనే మొదటిసారిగా అమెరికా స్థూల జాతీయ రుణం 40 ట్రిలియన్ డాలర్ల  రికార్డు స్థాయికి చేరుకుంది. ఈ తాజా అధికారిక   గణాంకాలు ప్రపంచ ఆర్థిక రంగాన్ని భయాందోళనలకు గురిచేస్తున్నాయి. కేవలం మూడేళ్ల క్రితం కాంగ్రెషనల్ బడ్జెట్ ఆఫీస్   అంచనాల కంటే రెండు సంవత్సరాల ముందే  అమెరికా జాతీయ రుణం ఈ మైలు రాయిని చేరుకోవడం గమనార్హం. పెరుగుతున్న ఈ అప్పు భారాన్ని నియంత్రించేందుకు, తీవ్ర ఒత్తిడిలో ఉన్న బాండ్ మార్కెట్‌ను స్థిరీకరించేందుకు ట్రెజరీ సెక్రటరీ స్కాట్ బెసెంట్ ఒక కీలక ప్రతిస్పందనను ప్రకటించారు. 

దీర్ఘకాలిక బాండ్ల కొనుగోలు పరిమాణాన్ని రెట్టింపు చేస్తూ ఆయన నిర్ణయం తీసుకున్నారు.  అమెరికా అప్పుల ప్రయాణం పరిశీలిస్తే ఇది నేటి సమస్య కాదు. 1791 నాటి అమెరికా స్వాతంత్ర్య పోరాటం సమయంలో  75 మిలియన్లుగా ఉన్న రుణం, కాలక్రమేణా పెరుగుతూ వచ్చింది. 1835లో ఆండ్రూ జాక్సన్ హయాంలో మాత్రమే రుణం సున్నాకి చేరింది. అయితే.. అంతర్యుద్ధం,  రెండవ ప్రపంచ యుద్ధం సమయంలో అప్పు మళ్లీ భారీగా పెరిగింది. ఆధునిక యుగంలో, మొదటిసారిగా 1981లో అప్పు  1 ట్రిలియన్ డాలర్ మార్కును దాటింది. అప్పటి నుంచి ఇప్పటివరకు గమనిస్తే..  గత దశాబ్ద కాలంలోనే అప్పు రెట్టింపు కావడం కలవరపెడుతోంది.  డోనాల్డ్ ట్రంప్,  జో బైడెన్ హయాలలో  కోవిడ్ 19 ఉపశమన చర్యలు, పన్ను తగ్గింపులు,  వివిధ సంక్షేమ పథకాల వ్యయం వల్ల అప్పు అనూహ్య రీతిలో పెరిగి అంచనాలకు అధిగమించేసింది.  తాజా వివరాల ప్రకారం..  గత అక్టోబర్‌లో  38 ట్రిలియన్లుగా ఉన్న రుణం, కేవలం   నెలల వ్యవధిలోనే  40 ట్రిలియన్ డాలర్లకు  పెరిగింది. ఆగస్టు 18 నాటికి మొత్తం చలామణిలో ఉన్న అప్పు  40,047,426,000,000  డాలర్లుగా నమోదైంది. 

ఇందులో ప్రజల వద్ద ఉన్న ట్రెజరీ సెక్యూరిటీలు  32.266 ట్రిలియన్ డాలర్లు  కాగా, ప్రభుత్వ అంతర్గత అప్పు 7.782 ట్రిలియన్ డాలర్లు.  అదే సమయంలో..  30 ఏళ్ల ట్రెజరీ యీల్డ్ గత 19 ఏళ్లలో ఎన్నడూ లేని విధంగా 5.311శాతానికి  చేరుకుంది. ఈ పరిస్థితిని చల్లబరిచేందుకు స్కాట్ బెసెంట్ సెప్టెంబర్ నుండి దీర్ఘకాలిక బాండ్ కొనుగోలు కార్యక్రమం కింద ఆపరేషన్ గరిష్ట పరిమితిని  2 బిలియన్ల నుండి  4 బిలియన్ డాలర్లకు పెంచుతున్నట్లు వెల్లడించారు.  చట్టపరమైన,  నిర్మాణ పరమైన అంశాలను పరిశీలిస్తే..    ప్రజల వద్ద ఉన్న అప్పులో సుమారు 31శాతం విదేశీయుల చేతుల్లోనే ఉంది. వీటిలో జపాన్  1.2 ట్రిలియన్లతో అగ్రస్థానంలో ఉండగా, బ్రిటన్, చైనాలు వరుసగా ఆ తరువాతి   స్థానాల్లో ఉన్నాయి. 

కాంగ్రెస్ నిర్ణయించే అప్పు పరిమితిని మున్ముందు మళ్లీ పెంచాల్సిన పరిస్థితి ఏర్పడవచ్చు.  బైపార్టిసన్ పాలసీ సెంటర్ అంచనా ప్రకారం, 2027 నాటికి అమెరికా  41.1 ట్రిలియన్ డాలర్ల  చట్టబద్ధమైన అప్పు పరిమితికి చేరుకునే అవకాశం ఉంది.  ఈ మొత్తం సంక్షోభంలో ఆందోళనకరమైన అంశం వడ్డీ భారం. అమెరికా చెల్లిస్తున్న వడ్డీ ఖర్చు ఏటా రక్షణ రంగానికి కేటాయించే బడ్జెట్ కంటే ఎక్కువగా ఉంటోంది. ఇటీవలి ఆర్థిక సంవత్సరంలో వడ్డీ చెల్లింపులకే  970 బిలియన్ డాలర్లకు పైగా వెచ్చించారు. ప్రభుత్వ ఆదాయంలో వసూలయ్యే ప్రతి పన్ను డాలర్‌లో దాదాపు 19 సెంట్లు కేవలం వడ్డీ చెల్లింపులకే సరిపోతోంది. మున్ముందు ఈ వడ్డీ చెల్లింపులు సోషల్ సెక్యూరిటీ,  మెడికేర్ వంటి ప్రధాన సంక్షేమ ఖర్చులను కూడా మించిపోయే ప్రమాదం ఉందని కాంగ్రెషనల్ బడ్జెట్ ఆఫీస్ (సీబీఓ) హెచ్చరిస్తోంది.  

ప్రభుత్వం చేపట్టిన బాండ్ బైబ్యాక్ నిర్ణయం తాత్కాలిక ఉపశమనం మాత్రమేనని ఆర్థిక విశ్లేషకులు అంటున్నారు.  స్కాట్ బెసెంట్ తీసుకున్న చర్య మార్కెట్‌లో ద్రవ్యతను పెంచడానికి, వడ్డీ రేట్లలో హెచ్చుతగ్గులను తగ్గించడానికి సహాయపడవచ్చు. కానీ ఇది అప్పును తగ్గించే మార్గం కాదు, కేవలం మెచ్యూరిటీ గడువులను పునర్వ్యవస్థీకరించడం మాత్రమేనని నిపుణులు చెబుతున్నారు.  32 ట్రిలియన్ల భారీ మార్కెట్ పరిమాణంతో పోలిస్తే ఈ బైబ్యాక్ సొమ్ము చాలా స్వల్పమని, ఇది శాశ్వత పరిష్కారం ఏ మాత్రం కాదనీ పరిశీలకులు విశ్లేషిస్తున్నారు. 

ఇక  రాజకీయంగా చూస్తే, ఈ అప్పుల కుప్పకు రిపబ్లికన్, డెమోక్రాట్ పార్టీలు రెండూ బాధ్యత వహించాల్సి ఉంటుంది. పన్ను కోతలు ఒకవైపు ఆదాయాన్ని తగ్గిస్తుంటే, మరోవైపు  సంక్షేమ ఖర్చులు పెరుగుతున్నాయి. ఇరు పార్టీల నాయకులు తగిన రాజకీయ నిర్ణయాలు తీసుకోకపోవడమే ఈ పరిస్థితికి   కారణం. 

రాబోయే దశాబ్దాల్లో అప్పు, జీడీపీ నిష్పత్తి ఊహించని రీతిలో పెరిగే ప్రమాదం ఉందని వివిధ బడ్జెట్ రీసెర్చ్ సంస్థలు హెచ్చరిస్తున్నాయి.  అగ్రరాజ్య బాండ్ మార్కెట్ ప్రభావం ప్రపంచవ్యాప్తంగా ప్రతిబింబిస్తోంది. అమెరికాలో వడ్డీ రేట్లు పెరిగితే, ఇతర అభివృద్ధి చెందిన దేశాలైన జపాన్, ఫ్రాన్స్, జర్మనీ, బ్రిటన్ దేశాలలో కూడా రుణ వ్యయాలు పెరుగుతాయి. దానికి తోడు అంతర్జాతీయంగా చమురు ధరల పెరుగుదల, ఆర్టిఫిషియల్ ఇంటెలిజెన్స్  రంగానికి పెరుగుతున్న రుణాల జారీ కూడా ఆర్థిక వ్యవస్థపై అదనపు భారాన్ని మోపుతున్నాయి. అమెరికా తక్షణమే కఠినమైన పన్ను విధానాలు,  వ్యయ నియంత్రణలు అమలు చేయకపోతే, రాబోయే రోజుల్లో రికార్డు స్థాయి రుణాలు ఆర్థిక వ్యవస్థను మరింత ప్రమాదంలోకి నెట్టే అవకాశం ఉంది. 

 -సీతారాం కంఠంనేని 

ఈ విశ్లేషణ మీకు నచ్చినట్లయితే, దయచేసి మా https://TeluguOne.com  పోర్టల్‌ను అనుసరించండి, మీ స్నేహితులతో పంచుకోండి, అలాగే మీ విలువైన అభిప్రాయాలను తెలియజేయండి.   

 

(US National Debt, Scott Bessent Bond Buyback, US Economy Crisis, US Federal Debt 40 Trillion, US Treasury Yields)