జమ్మూ కాశ్మీర్‌లోని ఉధంపూర్ జిల్లాలో భద్రతా బలగాలకు, ఉగ్రవాదులకు మధ్య జరిగిన తీవ్రమైన ఎదురుకాల్పుల్లో ఇద్దరు ఉగ్రవాదులు హతమయ్యారు. ఉధంపూర్ జిల్లాలోని మజాల్తా ప్రాంతంలో సెప్టెంబర్ 16 మరియు 17 తేదీల మధ్య రాత్రి ఈ ఉగ్రవాద నిరోధక ఆపరేషన్ జరిగింది. ఈ ప్రాంతంలో అనుమానాస్పద వ్యక్తుల కదలికలు ఉన్నాయంటూ అందిన పక్కా నిఘా వర్గాల సమాచారంతో ఈ సంయుక్త ఆపరేషన్ ప్రారంభమైంది. ప్రతికూల వాతావరణం, దట్టమైన అడవులు, క్లిష్టమైన భౌగోళిక పరిస్థితులు తక్కువ దృశ్యమానత ఉన్నప్పటికీ, వైట్ నైట్ కార్ప్స్ దళాలు, జమ్మూ కాశ్మీర్ పోలీసులు  సీఆర్పీఎఫ్ సంయుక్తంగా ఈ కఠినమైన ఆపరేషన్‌ను విజయవంతంగా నిర్వహించాయి. 

దట్టమైన బ్రట్టాల్ మరియు సోహన్ అటవీ ప్రాంతంలో ఉగ్రవాదులు నక్కి ఉన్నారనే కచ్చితమైన సమాచారంతో భద్రతా బలగాలు ఆ ప్రాంతాన్ని చుట్టుముట్టాయి. ఈ కార్డన్ అండ్ సెర్చ్ ఆపరేషన్ సందర్భంగా బలగాలను చూసి ఉగ్రవాదులు కాల్పులు జరపడంతో, ఇరువర్గాల మధ్య భీకరమైన ఎదురుకాల్పులు ప్రారంభమయ్యాయి. సుదీర్ఘంగా సాగిన ఈ పోరులో ఇద్దరు ఉగ్రవాదులు మరణించారు. ఎన్‌కౌంటర్ ముగిసిన తరువాత ఘటనా స్థలం నుండి భద్రతా బలగాలు భారీగా ఆయుధాలు మరియు మందుగుండు సామగ్రిని స్వాధీనం చేసుకున్నారు. 

హతమైన ఉగ్రవాదుల మృతదేహాలను కూడా తెల్లవారుజామునే అధికారులు వెలికితీశారు. ప్రైమరీ సమాచారం ప్రకారం, ఈ ఉగ్రవాదులు పాకిస్తాన్ కేంద్రంగా పనిచేస్తున్న జైషే మహ్మద్ (JeM) ఉగ్రవాద సంస్థకు చెందిన ప్రాక్సీ గ్రూప్ "కశ్మీర్ టైగర్స్" సంస్థకు చెందినవారని, వారు విదేశీ ఉగ్రవాదులై ఉంటారని బలగాలు అనుమానిస్తున్నాయి. అయితే, వీరికి సంబంధించిన పూర్తి గుర్తింపు మరియు ఖచ్చితమైన అనుబంధాలు ఇంకా అధికారికంగా నిర్ధారించబడాల్సి ఉంది. ఈ ప్రాంతంలో ఉగ్రవాద కార్యకలాపాలను అణచివేయడానికి భద్రతా బలగాలు అత్యంత అప్రమత్తంగా వ్యవహరిస్తున్నాయి. ఇదే మజాల్తా ప్రాంతంలో ఈ ఏడాది ఫిబ్రవరిలో కూడా ఇదే విధంగా జరిగిన మరో ఆపరేషన్‌లో ఇద్దరు జైషే మహ్మద్ ఉగ్రవాదులను భద్రతా బలగాలు మట్టుబెట్టడం గమనార్హం.

తాజా ఎన్‌కౌంటర్ నేపథ్యంలో ఉధంపూర్ జిల్లావ్యాప్తంగా, ముఖ్యంగా మజాల్తా అటవీ ప్రాంతంలో అదనపు భద్రతా బలగాలను మోహరించారు. ఉగ్రవాదుల సహచరులు ఎవరైనా ఇంకా అడవుల్లో నక్కి ఉన్నారేమోనని తెలుసుకోవడానికి ఆర్మీ, పారా స్పెషల్ ఫోర్సెస్, రాష్ట్రీయ రైఫిల్స్ మరియు జమ్మూ కాశ్మీర్ పోలీసులు సంయుక్తంగా విస్తృతమైన గాలింపు చర్యలు కూంబింగ్ ఆపరేషన్‌ను ముమ్మరం చేశారు. 

చుట్టుపక్కల అన్ని మార్గాల్లోనూ నిఘాను కట్టుదిట్టం చేసి, అనుమానిత ప్రాంతాల్లో సోదాలు నిర్వహిస్తున్నారు. ఈ ఏడాది సెప్టెంబర్ 5న సెంట్రల్ కాశ్మీర్‌లోని బద్గామ్ జిల్లాలో లష్కరే తోయిబా (LeT) కమాండర్‌ను హతం చేసిన కొన్ని రోజుల వ్యవధిలోనే ఈ ఉధంపూర్ ఎన్‌కౌంటర్ జరగడం ప్రాధాన్యత సంతరించుకుంది. జమ్మూ డివిజన్‌లో ఇటీవల కాలంలో పెరుగుతున్న ఉగ్రవాద కదలికలను తిప్పికొట్టడానికి భద్రతా బలగాలు డేగ కన్నేసి, వ్యూహాత్మకంగా ముందుకు సాగుతున్నాయి.

 

 

[ Udhampur encounter, Jammu and Kashmir news, Majalta gunfight, two terrorists killed, security forces, Indian Army J&K, PM MODI, Amith shash, Telugu One, Telugu News ]