సాంకేతిక పరిజ్ఞానం ఊహించని వేగంతో దూసుకుపోతోంది. నిన్నటివరకు హాలీవుడ్ సైన్స్ ఫిక్షన్ సినిమాల్లో మాత్రమే చూసిన "డ్రైవర్ లేని కార్లు" ఇప్పుడు ప్రత్యక్షంగా లండన్ రోడ్లపైకి వచ్చేసాయి. ప్రముఖ రైడ్ హేలింగ్ దిగ్గజం ఉబెర్ మరియు ఆర్టిఫిషియల్ ఇంటెలిజెన్స్ అటానమస్ వెహికల్ టెక్నాలజీ కంపెనీ వేవ్ కలిసి బ్రిటన్ లో మొట్టమొదటి డ్రైవర్ లేని టాక్సీ సర్వీసులను అధికారికంగా ప్రారంభించాయి. ట్రాన్స్‌పోర్ట్ ఫర్ లండన్ (TfL) ప్రైవేట్ హైర్ లైసెన్స్ మంజూరు చేసిన దాదాపు నెల రోజుల తర్వాత ఈ సేవలు లండన్ వాసులకు అందుబాటులోకి రావడం గమనార్హం. రోడ్డు రవాణా చరిత్రలోనే ఇదొక చారిత్రాత్మక ఘట్టంగా నిలవనుంది.

లండన్ లో ప్రస్తుతం సేవలు అందిస్తున్న దాదాపు 1,00,000 ఉబెర్ వాహనాల భారీ నెట్‌వర్క్‌లో, మొదటి విడత పైలట్ ప్రాజెక్ట్ కింద కేవలం 15 ప్రత్యేకమైన వేవ్ సెల్ఫ్ డ్రైవింగ్ కార్లను మాత్రమే మోహరించారు. ఈ కార్లు సాధారణమైనవి కావు; ఫోర్డ్ కంపెనీకి చెందిన అత్యంత ప్రతిష్టాత్మకమైన ముస్తాంగ్ మాక్-ఈ ఎలక్ట్రిక్ మోడళ్లను దీని కోసం ప్రత్యేకంగా రూపొందించారు. ఈ వాహనాల్లో అత్యాధునిక ఆటోమేటిక్ సెన్సార్లు, ఆధునిక రాడార్ సిస్టమ్‌లు మరియు లైడార్ (Lidar) సాంకేతికతను అమర్చారు. గ్రేటర్ లండన్ వ్యాప్తంగా తూర్పున బెక్స్లీ నుండి ఉత్తరాన బార్నెట్ వరకు, అలాగే వాయువ్య దిశలో రిక్‌మ్యాన్స్‌వర్త్ సమీప ప్రాంతాల వరకు ఈ రోబోటిక్ కార్లు తిరుగుతాయి.

ఈ సెల్ఫ్ డ్రైవింగ్ కార్లలో వేవ్ డెవలప్ చేసిన నెక్స్ట్ జనరేషన్ 'AV 2.0' ఆటోమేటెడ్ వెహికల్ టెక్నాలజీని ఉపయోగించారు. ఇది రిమోట్ ఆపరేటర్లపై ఆధారపడకుండా ఆర్టిఫిషియల్ ఇంటెలిజెన్స్, మెషిన్ లెర్నింగ్ సహాయంతో ప్రయాణంలో నిర్ణయాలు స్వయంగా తీసుకుంటుంది. వేలాది గంటల ప్రాక్టికల్ టెస్టింగ్ ద్వారా నేర్చుకున్న విషయాలను ఈ ఏఐ టెక్నాలజీ తక్షణమే వర్తింపజేస్తుంది. అందుకే ఒక చిన్న సరిహద్దు ప్రాంతానికి మాత్రమే పరిమితం కాకుండా, లండన్ లాంటి రద్దీ నగర వీధుల్లో కూడా సునాయాసంగా ప్రయాణించగలదు. తొలి దశ ప్రయోగాత్మక పరీక్షల్లో భాగం కాబట్టి, భద్రతకు అత్యధిక ప్రాధాన్యతనిస్తూ డ్రైవింగ్ సీట్లో ఒక సర్టిఫైడ్ ట్రాన్స్‌పోర్ట్ ఫర్ లండన్ (TfL) సేఫ్టీ డ్రైవర్ సూపర్ వైజర్ గా కూర్చుంటారు.

 

 

 

how to book driverless uber london,london first self driving taxis wayve