TeluguOne Health
● # Tweets

Download the TeluguOne App

Choose your platform to continue

ఓట్ల తొలగింపుపై సమరశంఖం.. కాంగ్రెస్ శ్రేణులకు సీఎం రేవంత్ పిలుపు.!

Published on: Sun Nov 22, 2026 2:58PM

గాంధీ భవన్‌లో జరిగిన కాంగ్రెస్ పార్టీ రాజకీయ వ్యవహారాల కమిటీ (పీఏసీ) సమావేశంలో ముఖ్యమంత్రి రేవంత్ రెడ్డి పలు కీలక అంశాలపై మాట్లాడారు. తెలంగాణ కాంగ్రెస్ నూతన ఇన్‌ఛార్జిగా నియమితులైన బీఎం సందీప్‌కు స్వాగతం పలికారు. ఆయన నియామకం చేపట్టిన సోనియా గాంధీ, మల్లికార్జున ఖర్గే, రాహుల్ గాంధీలకు ధన్యవాదాలు తెలిపారు. గతంలో ఇన్‌ఛార్జిగా పనిచేసిన మీనాక్షి నటరాజన్ హయాంలో ఉపఎన్నికలు, పంచాయతీ, మున్సిపల్ ఎన్నికల్లో కాంగ్రెస్ మంచి ఫలితాలు సాధించిందని పేర్కొన్నారు. పంచాయతీ ఎన్నికల్లో 66 శాతం, మున్సిపల్ ఎన్నికల్లో 85 శాతం విజయాలు సాధించామని తెలిపారు. మీనాక్షి నటరాజన్‌కు కృతజ్ఞతలు తెలియజేశారు.

ఓబీసీ కులగణనపై తీర్మానం.!

వందేళ్ల తర్వాత తొలిసారిగా తెలంగాణలో ఓబీసీ కులగణన నిర్వహించామని సీఎం తెలిపారు. 2027లో కేంద్ర ప్రభుత్వం చేపట్టనున్న జనగణనలో ఓబీసీ కులగణన కూడా చేపట్టాలని డిమాండ్ చేశారు. ఈ మేరకు పీఏసీ సమావేశంలో తీర్మానం చేసి కేంద్రానికి విజ్ఞప్తి చేయాలని సూచించారు. ప్రధానమంత్రికి ఈ అంశంపై లేఖ రాయాలని పీసీసీ అధ్యక్షుడు మహేష్ కుమార్ గౌడ్‌కు సూచించారు.

ఎల్‌నినో ప్రభావం.. కేంద్రానికి రూ.30 వేల కోట్ల సాయం కోరుతాం.!


దేశంలో వ్యవసాయ రంగం అభివృద్ధికి తొలి ప్రధాని జవహర్‌లాల్ నెహ్రూ తీసుకున్న చర్యలు కీలకమని రేవంత్ రెడ్డి పేర్కొన్నారు. విద్య, సాగునీటి రంగాల అభివృద్ధితో పాటు ఆహార ధాన్యాల ఉత్పత్తి పెరగడంలో ఆయన ప్రణాళికలు దోహదపడ్డాయని చెప్పారు. ఎల్‌నినో ప్రభావంతో వర్షాలు తగ్గాయని, ప్రపంచవ్యాప్తంగా సుమారు 100 దేశాలు ఈ ప్రభావంతో ఇబ్బందులు ఎదుర్కొంటున్నాయని తెలిపారు. 

పక్క రాష్ట్రాలైన మహారాష్ట్ర, కర్ణాటకలోనూ కరవు పరిస్థితులు ఉన్నాయని పేర్కొన్నారు. తక్కువ నీటితో పండే పంటలను సాగు చేయాలని రైతులకు సూచించారు. రాష్ట్రంలో ప్రస్తుతం ఆహార ధాన్యాలకు కొరత లేదని, వర్షాకాలంలో 20 వేల మెగావాట్ల విద్యుత్ డిమాండ్ ఉన్నప్పటికీ రైతులకు సరఫరా చేశామని, పంటలు ఎండిపోకుండా కాపాడగలిగామని వెల్లడించారు.

రాబోయే ఎనిమిది నెలల పాటు ప్రజలకు తాగునీరు అందించడం ప్రభుత్వానికి కీలక సవాలుగా మారిందని చెప్పారు. ప్రాజెక్టుల్లో అందుబాటులో ఉన్న నీటిని తాగునీటి అవసరాలకు వినియోగించాల్సి ఉంటుందని తెలిపారు. ఎల్‌నినో ప్రభావాన్ని ఎదుర్కొనేందుకు రాష్ట్రానికి రూ.30 వేల కోట్లు అవసరమని, ఈ మేరకు కేంద్ర ప్రభుత్వం ఆర్థిక సాయం అందించాలని కోరారు. పీఏసీ సమావేశంలోనూ ఈ అంశంపై తీర్మానం చేయాలని సూచించారు.

ప్రతి ఒక్కరికీ ఉపాధి కల్పించేలా కొత్త కార్యక్రమం.!

రాష్ట్రంలో ప్రతి ఒక్కరికీ పని కల్పించడమే లక్ష్యంగా త్వరలోనే భారీ కార్యక్రమాన్ని ప్రారంభించనున్నట్లు సీఎం ప్రకటించారు. ఇప్పటికే ఉపాధి హామీ పథకంలో పనులు చేస్తున్న వారి సంఖ్య గణనీయంగా పెరిగిందని తెలిపారు. రాబోయే ఐదు నెలల పాటు సంక్రాంతి తరహాలో ప్రజాబలం కార్యక్రమాన్ని నిర్వహిస్తామని చెప్పారు. పార్టీ నాయకులు ప్రతి గ్రామానికీ వెళ్లి ప్రజలతో మమేకం కావాలని సూచించారు. ప్రతి ఒక్కరికీ ఉపాధి కల్పించడంతో పాటు నిధుల కొరత లేకుండా చూస్తామని హామీ ఇచ్చారు. పార్టీలో పనిచేసిన అనేక మందికి ఇప్పటికే పదవులు కల్పించామని పేర్కొన్నారు.

SIRపై కాంగ్రెస్ శ్రేణులకు రేవంత్ రెడ్డి పిలుపు.!

ఓటు హక్కు ప్రాధాన్యతను వివరిస్తూ రేవంత్ రెడ్డి కీలక వ్యాఖ్యలు చేశారు. అమెరికాలో మహిళలకు ఓటు హక్కు కల్పించడానికి సుమారు 300 ఏళ్లు పట్టిందని గుర్తుచేశారు. పరిపాలన ఎవరు చేయాలన్నది ప్రజలే నిర్ణయించాలనే ఉద్దేశంతో నెహ్రూ, మహాత్మా గాంధీ, అంబేడ్కర్ దేశంలోని ప్రతి ఒక్కరికీ ఓటు హక్కు కల్పించారని పేర్కొన్నారు.

2019లో దేశ జనాభా 130 కోట్లుగా ఉన్నప్పుడు ఓటర్ల సంఖ్య 91 కోట్లని, 2024లో జనాభా 140 కోట్లకు చేరినప్పుడు ఓటర్ల సంఖ్య 97.5 కోట్లుగా నమోదైందని సీఎం వివరించారు. SIR ప్రక్రియ ద్వారా కనీసం 20 కోట్ల ఓట్లు తొలగించే అవకాశం ఉందని ఆరోపించారు. ఇప్పటికే 13 కోట్ల ఓట్లు తొలగించారని పేర్కొన్నారు. దళితులు, ఆదివాసీలు, గిరిజనులు, మహిళల ఓట్లను తొలగిస్తున్నారని, వలసల కారణంగా వారి ఓటు హక్కుకు ముప్పు ఏర్పడుతోందని ఆందోళన వ్యక్తం చేశారు.

గతంలో ఓటర్ల జాబితా సవరణ ప్రక్రియ ఓటు హక్కును కల్పించే లక్ష్యంతో ఉండేదని, ఇప్పుడు ఓట్ల తొలగింపునకు ఉపయోగిస్తున్నారని రేవంత్ రెడ్డి విమర్శించారు. తెలంగాణలో 71 లక్షల ఓట్లను పక్కన పెట్టారని ఆరోపించారు. ఇంటిపేర్లలో స్వల్ప తేడాలు ఉన్నా ఓట్లను తొలగిస్తున్నారని, ఈ ప్రక్రియ యాంత్రికంగా సాగుతోందని అన్నారు.

బీఎల్ఓలు అప్రమత్తంగా ఉండాలి.!

SIR ప్రక్రియపై కాంగ్రెస్ పార్టీ బూత్ లెవల్ ఆఫీసర్లు (BLOలు), పార్టీ శ్రేణులు అప్రమత్తంగా ఉండాలని సీఎం సూచించారు. ఎన్నికల సమయం వరకు వేచి చూడకుండా ఇప్పటి నుంచే ఓటర్ల జాబితాలను పరిశీలించాలని పిలుపునిచ్చారు. బ్రిటిష్ పాలనలో సైమన్ కమిషన్‌కు వ్యతిరేకంగా సాగిన ఉద్యమాన్ని గుర్తుచేస్తూ.. ఇప్పుడు SIR అంశంపై కూడా ప్రజల్లో చైతన్యం తీసుకురావాలని అన్నారు. జ్ఞానేశ్ కుమార్‌కు వ్యతిరేకంగా 'గో బ్యాక్' నినాదంతో ముందుకు సాగాలని పిలుపునిచ్చారు.

ఓటు హక్కు ఉన్నవారు, ఓటు హక్కు లేనివారు అంటూ రెండు రకాల పౌరులను బీజేపీ తయారు చేస్తోందని రేవంత్ రెడ్డి ఆరోపించారు. దేశంలో ద్వితీయ శ్రేణి పౌరుల వ్యవస్థను సృష్టించే ప్రయత్నం జరుగుతోందని విమర్శించారు. ఈ నేపథ్యంలో ఓటర్ల జాబితాల పరిశీలనపై కాంగ్రెస్ నాయకులు, కార్యకర్తలు పూర్తి అప్రమత్తతతో పనిచేయాలని సూచించారు.

మీకు నచ్చవచ్చు: బంగారం ధరలు భారీ తగ్గుదల.. ప్రధాని మోదీకి సీటీఐ కృతజ్ఞతలు.!

మీకు నచ్చవచ్చు: జబర్దస్త్ కమెడియన్లు దొరబాబు, రైజింగ్ రాజుకు రోడ్డు ప్రమాదం.!

 

 

 

[ Telangana Congress PAC meeting, CM Revanth reddy, Telangana Congress, BM Sandeep, Gandhi Bhavan, PAC Meeting, Sonia Gandhi, Rahul Gandhi, Mallikarjun Kharge, Meenakshi Natarajan, OBC Caste Census, SIR  ]