తమిళనాడు రాష్ట్రంలోని తేని జిల్లా ఆండిపట్టి సమీపంలో ఉన్న తెక్కంపట్టి సబ్‌జైలు నుంచి 17 మంది రిమాండ్ ఖైదీలు పరారైన ఘటన తీవ్ర కలకలం రేపింది. సోమవారం (అక్టోబర్ 26) అర్ధరాత్రి సమయంలో ఖైదీలు జైలు సిబ్బందిపై దాడి చేసి తప్పించుకున్నారు. ఈ ఘటనలో జైలు సిబ్బందికి గాయాలు కావడంతో పాటు, రాష్ట్రవ్యాప్తంగా పోలీసులు అప్రమత్తమయ్యారు. పోలీసుల ప్రాథమిక సమాచారం ప్రకారం. జైలులోని ఒకే గదిలో ఉన్న 17 మంది ఖైదీలు పక్కా ప్రణాళికతో తప్పించుకున్నారు. 

రాత్రి సమయంలో తమలో ఒక ఖైదీకి మూర్ఛ లేదా ఫిట్స్ వచ్చినట్లు మిగతా ఖైదీలు సిబ్బందికి సమాచారం ఇచ్చారు. దీంతో అతడికి వైద్య సహాయం అందించేందుకు జైలు సిబ్బంది గది తలుపులు తెరిచారు. ఇదే అదనుగా భావించిన ఖైదీలు ఒక్కసారిగా సిబ్బందిపై దాడి చేసి వారిని అదుపులోకి తీసుకున్నారు. అనంతరం జైలు ప్రధాన ద్వారం నుంచి బయటకు పారిపోయారు. ఈ దాడిలో తంగపాండి అనే సిబ్బందికి తలపై తీవ్ర గాయాలయ్యాయి. మరో ఇద్దరు జైలు సిబ్బందికి కూడా గాయాలైయ్యాయి.

నలుగురు మళ్లీ అరెస్ట్‌.. 13 మంది కోసం గాలింపు.!

17 మంది ఖైదీలు పరారైన విషయం తెలుసుకున్న పోలీసులు వెంటనే రంగంలోకి దిగారు. జైలు పరిసర ప్రాంతాలు, అటవీ ప్రాంతాల్లో గాలింపు చర్యలు చేపట్టారు. తాజా మీడియా నివేదికల ప్రకారం.. పరారైన వారిలో నలుగురిని పోలీసులు తిరిగి పట్టుకున్నారు. మిగిలిన 13 మంది కోసం గాలింపు కొనసాగుతోంది.ఖైదీలను పట్టుకునేందుకు దక్షిణ మండల పోలీసు ఉన్నతాధికారుల పర్యవేక్షణలో 17 ప్రత్యేక బృందాలను ఏర్పాటు చేసినట్లు సమాచారం. తేని, మదురై, దిండిగల్ జిల్లాలతో పాటు కేరళ సరిహద్దు ప్రాంతాల్లోనూ నిఘా పెంచారు. ప్రధాన రహదారులు, చెక్‌పోస్టుల వద్ద వాహనాలను క్షుణ్ణంగా తనిఖీ చేస్తున్నారు. పరిసరాల్లో ఉన్న అటవీ ప్రాంతాల్లో కూడా గాలింపు చర్యలను కూడా ముమ్మరం చేశారు.

జైలు భద్రతపై ప్రశ్నలు.!

ఒకేసారి 17 మంది ఖైదీలు జైలు నుంచి తప్పించుకోవడం భద్రతా వ్యవస్థపై ప్రశ్నలు లేవనెత్తింది. ఖైదీలు ఒకే గదిలో ఉండటం, వైద్య అత్యవసర పరిస్థితి ఉందన్న సమాచారంతో సిబ్బంది గది తలుపులు తెరిచిన సమయంలో దాడి జరగడం వంటి అంశాలపై అధికారులు విచారణ చేపట్టారు.జైలు నుంచి ఖైదీలు ఎలా తప్పించు కున్నారు? భద్రతా విధుల్లో నిర్లక్ష్యం జరిగిందా? ఈ ఘటన వెనుక మరెవరైనా సహకారం ఉందా? అనే కోణాల్లో దర్యాప్తు కొనసాగుతోంది.

 

 

 

[ Tamil Nadu Jailbreak, Theni Jailbreak, Thekkampatti Sub Jail, 17 Prisoners Escape, Tamil Nadu Prisoners Escape, Theni Police, Prison Security Breach, Prison Staff Attack, 4 Prisoners Recaptured, 13 Prisoners Missing, Tamil Nadu Police Search Operation, Special Police Teams, Prison Break News, Dindigul Police ]