దీపావళి పండుగ వేళ బాణసంచా వినియోగంపై సుప్రీంకోర్టు   కీలకమైన నిర్ణయాన్ని వెలువరించింది. పర్యావరణ పరిరక్షణ, కాలుష్య నియంత్రణను సాకుగా చూపి టపాసుల తయారీ, విక్రయాలు  వినియోగంపై సంపూర్ణంగా నిషేధం విధించాలంటూ దాఖలైన విజ్ఞప్తులను అత్యున్నత న్యాయస్థానం తోసిపుచ్చింది.

ప్రజల ఆరోగ్య హక్కుతో పాటు బాణసంచా పరిశ్రమపై ఆధారపడి బతుకుతున్న లక్షలాది మంది ఉపాధిని సమతుల్యం చేయాల్సిన బాధ్యత ఉందని దేశ సర్వోన్నత న్యాయస్థానం పేర్కొంది.  పండుగ సంబరాలను పూర్తిగా దెబ్బతీసేలా ఎలాంటి కఠినమైన నిర్ణయాలు తీసుకోలేమని విస్పష్టంగా పేర్కొంది. 

గత కొన్ని సంవత్సరాలుగా శీతాకాలం రాకముందే దేశ రాజధాని సహా పలు నగరాల్లో వాయు కాలుష్యం తీవ్ర స్థాయికి చేరుకుంటున్న నేపథ్యంలో టపాసుల నిషేధంపై పెద్దఎత్తున చర్చ జరుగుతోంది. దీనికి సంబంధించి దాఖలైన పిటిషన్లను విచారించిన ధర్మాసనం, కేవలం బాణసంచాను మాత్రమే   తప్పుపట్టడం సమంజసం కాదని స్పష్టం చేసింది.

అయితే.. పండుగ సమయంలో గాలి నాణ్యత పడిపోకుండా ఉండేందుకు తగిన నియంత్రణ చర్యలు పాటించాల్సిన అవసరం ఉందని పేర్కొంది.  పూర్తిగా నిషేధించడం వల్ల చట్టవిరుద్ధమైన రసాయనాలతో కూడిన ఉత్పత్తులు మార్కెట్లోకి వచ్చే ప్రమాదం ఉందని న్యాయ నిపుణులు హెచ్చరిస్తున్న తరుణంలో ఈ తీర్పు ప్రాధాన్యత సంతరించుకుంది.

ఈ నేపథ్యంలో పర్యావరణానికి తక్కువ హాని కలిగించే గ్రీన్ క్రాకర్స్   వినియోగాన్ని మాత్రమే అనుమతించాలని న్యాయస్థానం గతంలోనే స్పష్టం చేసిన మార్గదర్శకాలను గుర్తుచేసింది. నిర్ణీత సమయాల్లో మాత్రమే టపాసులు కాల్చేలా స్థానిక యంత్రాంగాలు తగిన నిఘా పెట్టాలని ఆదేశించింది. నిబంధనలను ఉల్లంఘించి భారీ శబ్దాలు చేసే, హానికరమైన రసాయనాలు కలిగిన బాణసంచాను విక్రయించే వారిపై కఠిన చర్యలు తీసుకోవాలని ఆదేశించింది. పండుగ ఆనందాలకు భంగం కలగకుండా, అదే సమయంలో ప్రజల ఆరోగ్యానికి ముప్పు వాటిల్లకుండా మధ్యేమార్గమైన విధానాలను అమలు చేయాలని రాష్ట్రాల ప్రభుత్వాలకు సూచించింది. 

[Supreme Court, Firecrackers, Diwali Firecrackers, Supreme Court Guidelines, Diwali, Green crakers,  Air Pollution, telugu One]