ప్రధాన ఎన్నికల కమిషనర్ (సీఈసీ), ఎన్నికల కమిషనర్ల (ఈసీల) నియామకాలకు సంబంధించిన చట్టం చెల్లుబాటును సవాల్ చేస్తూ  దాఖలైన పిటిషన్లను రాజ్యాంగ ధర్మాసనానికి   బదిలీ చేసే అంశంపై సుప్రీంకోర్టులో భిన్నాభిప్రాయాలు వ్యక్తమయ్యాయి. ఈ అంశంపై విచారణ జరిపిన ద్విసభ్య ధర్మాసనంలోని న్యాయమూర్తులు ఏకాభిప్రాయానికి రాలేకపోయారు. దీంతో దీనిపై  విభజిత తీర్పు వెలువడింది.   ఈ చట్టం రూపకల్పన, అమల్లోకి వచ్చిన తీరు,  రాజ్యాంగబద్ధతపై పిటిషనర్లు పలు ప్రశ్నలు లేవనెత్తారు. గతంలో సుప్రీంకోర్టు ఇచ్చిన తీర్పునకు విరుద్ధంగా ఈ నూతన చట్టం ఉందనే వాదనలు గట్టిగా వినిపించాయి.

ఈ నేపధ్యంలో, పిటిషన్ల విచారణను మరింత విస్తృతమైన ధర్మాసనానికి సిఫారసు చేయాలా వద్దా అనే దానిపై న్యాయమూర్తుల మధ్య భిన్నమైన అభిప్రాయాలు తలెత్తడం ప్రాధాన్యత సంతరించుకుంది. సీఈసీ,  ఇతర ఈసీల నియామకాల పారదర్శకతను పెంచాలనే ఉద్దేశంతో దాఖలైన ఈ పిటిషన్లు దేశ వ్యాప్తంగా హాట్ టాపిక్ గా మారాయి. 

సీఈసీ, ఈసీల నియామక ప్రక్రియలో కార్యనిర్వాహక వర్గానికి ఎక్కువ అధికారాలు కట్టబెడుతున్నారని పిటిషనర్లు తమ వ్యాజ్యాలలో పేర్కొన్నారు.  ఈ నేపథ్యంలో, తదుపరి విచారణను ఏ విధంగా ముందుకు తీసుకెళ్లాలి,  ఈ కేసును ఏ బెంచ్‌కు కేటాయించాలనే విషయాలపై అత్యున్నత న్యాయస్థానం త్వరలోనే స్పష్టతనిచ్చే అవకాశం ఉంది. ఈ న్యాయపరమైన వివాదంపై తుది తీర్పు వెలువడితే, భవిష్యత్తులో ఎన్నికల సంఘం అధికారుల నియామకాల్లో కీలకమైన మార్పులు వచ్చే అవకాశం ఉందని న్యాయ నిపుణులు విశ్లేషిస్తున్నారు.

[Supreme Court, Split Verdict, CEC and ECs Act, Chief Election Commissioner, Election Commissioners, Telugu One]