ప్రముఖ బిలియనీర్ ఎలాన్ మస్క్‌కు చెందిన అంతరిక్ష పరిశోధనా సంస్థ స్పేస్‌ఎక్స్ తన ఉద్యోగులకు అదిరిపోయే గుడ్‌న్యూస్ అందించింది. ఆర్టిఫిషియల్ ఇంటెలిజెన్స్ (AI) డేటా సెంటర్ల విస్తరణను వేగవంతం చేసేందుకు ముందుకు వచ్చే ఉద్యోగులకు ఏకంగా 20 శాతం అదనపు జీతాన్ని చెల్లించనున్నట్లు ప్రకటించింది. ఈ మేరకు అమెరికాలోని టెన్నెసీ రాష్ట్రంలోని మెమ్ఫిస్ లేదా మిస్సిసిపిలోని సౌత్‌హేవన్ ప్రాంతాలకు కేవలం ఆరు వారాల పాటు తాత్కాలికంగా రీలోకేట్ అయ్యే ఉద్యోగుల కోసం ఈ ప్రత్యేక ఇన్సెంటివ్‌ను తీసుకొచ్చింది. అక్టోబర్ ప్రారంభంలో ఉద్యోగులకు పంపిన ఈ మెయిల్ ద్వారా ఈ కీలక సమాచారం వెలుగులోకి వచ్చింది.

ప్రస్తుతం ప్రపంచవ్యాప్తంగా కంప్యూటింగ్ సామర్థ్యానికి డిమాండ్ విపరీతంగా పెరుగుతున్న తరుణంలో, ఈ సూపర్ కంప్యూటర్ల నిర్మాణాన్ని వేగవంతం చేయాలని ఎలాన్ మస్క్ బృందం భావిస్తోంది. ఈ క్రమంలోనే సంస్థలో లీడర్‌లుగా ఎదగాలనుకునే ప్రస్తుత, ఉద్భవిస్తున్న నాయకులు ముందుకు వచ్చి అడ్డంకులను తొలగించాలని ఈ మెయిల్‌లో స్పష్టం చేశారు. ఈ ఆరు వారాల ప్రాజెక్ట్‌లో పాల్గొనేందుకు వాలంటీర్లుగా ముందుకొచ్చే వారికి మేనేజియల్ పొజిషన్‌లో ఉండాల్సిన అవసరం లేదని, ప్రధానంగా అంకితభావం, డ్రైవ్ మాత్రమే ముఖ్యమని స్పష్టం చేశారు. కంపెనీలో ఒక సంవత్సరం కంటే ఎక్కువ సర్వీస్ ఉండి, మంచి పనితీరు కనబరుస్తున్న ఉద్యోగులు మాత్రమే ఈ అవకాశానికి అర్హులని పేర్కొన్నారు.

ఎంపికైన ఉద్యోగులకు వారి బేస్ సెలరీ లేదా హవర్లీ రేట్‌పై అదనంగా 20% ప్రీమియం లభించనుంది. అంతేకాకుండా, ఈ ప్రోగ్రామ్ విజయవంతమైతే ప్రత్యేక బోనస్‌లు కూడా అందుతాయని కంపెనీ వెల్లడించింది. ఉద్యోగుల ప్రయాణ ఖర్చులు, లాజిస్టిక్స్ బాధ్యతలను కూడా స్పేస్‌ఎక్సే పూర్తిగా భరించనుంది. ఫిబ్రవరిలో స్పేస్‌ఎక్స్‌లో విలీనమైన ఎఐ స్టార్టప్ xAI అభివృద్ధి చేసిన కొలోసస్ 1, కొలోసస్ 2 డేటా సెంటర్ల విస్తరణ కోసం ఈ తాత్కాలిక ఉద్యోగుల సర్జ్‌ను ఉపయోగిస్తున్నారు.

ఇటీవల వెల్లడించిన గణాంకాల ప్రకారం, ఆంత్రోపిక్ మరియు గూగుల్ వంటి సంస్థలకు కంప్యూట్ రెంటల్స్ ద్వారా లభించిన ఏఐ ఆదాయం 7 బిలియన్ డాలర్లకు పైగా పెరిగింది. ఇది కంపెనీ త్రైమాసిక ఆదాయంలో దాదాపు సగం ఉండటం విశేషం. తాము అందించే కంప్యూటింగ్ సామర్థ్యం కోసం ఇతర కంపెనీల నుండి విపరీతమైన డిమాండ్ వస్తోందని, స్వయంగా ఎలాన్ మస్క్ వారానికి నాలుగు రోజులు మెమ్ఫిస్‌లోనే గడుపుతూ 10 గిగావాట్ల అదనపు సామర్థ్యాన్ని లక్ష్యంగా పెట్టుకుని ఈ ప్రాజెక్ట్‌ను స్వయంగా పర్యవేషిస్తున్నారు.

 

 

 

[SpaceX, Elon Musk, xAI Data Centers, AI Data Center Expansion, SpaceX Employee Salary Hike, 20 Percent Salary Incentive, Colossus Supercomputer, Colossus 2 Data Center, Memphis Tennessee, Artificial Intelligence Infrastructure]