యశోద ఆస్పత్రిలో గవర్నర్‌ శివప్రతాప్ శుక్లాకు విజయవంతంగా స్టెంట్ అమరిక..!

తెలంగాణ గవర్నర్ శివప్రతాప్ శుక్లా గుండె సంబంధిత చికిత్స అనంతరం శుక్రవారం మధ్యాహ్నం హైదరాబాద్‌లోని యశోద ఆస్పత్రి నుంచి డిశ్చార్జ్ అయ్యారు. ఆయన ఆరోగ్యం ప్రస్తుతం పూర్తిగా నిలకడగా ఉందని వైద్య నిపుణుల బృందం స్పష్టం చేసింది. తీవ్ర అస్వస్థత కారణంగా నగరంలోని హైటెక్ సిటీ శాఖ యశోద ఆసుపత్రిలో చేరిన గవర్నర్‌కు వైద్యులు అత్యవసరంగా పలు పరీక్షలు నిర్వహించారు. ఈ తనిఖీల్లో గుండె నాళాల్లో అడ్డంకులు ఉన్నట్లు గుర్తించిన వైద్య నిపుణులు ఆయనకు వెంటనే శస్త్రచికిత్స నిర్వహించారు.

సీనియర్ కార్డియాలజిస్టుల పర్యవేక్షణలో సాగిన ఈ సర్జరీలో గవర్నర్ గుండె నాళాల్లో విజయవంతంగా స్టెంట్‌ను అమర్చారు. ఆ తర్వాత కొద్ది గంటల పాటు ఆయనను ఐసీయూలో ఉంచి ఆరోగ్య పరిస్థితిని నిశితంగా పరిశీలించారు. చికిత్స అనంతరం గవర్నర్ శరీరం ఔషధాలకు అనుకూలంగా స్పందించడంతో పాటు కీలక ఆరోగ్య సూచీలు సాధారణ స్థితికి రావడంతో వైద్యులు ఆయనను డిశ్చార్జ్ చేయడానికి అనుమతించారు. కొన్ని రోజుల పాటు రాజ్ భవన్‌లో విశ్రాంతి తీసుకోవాలని సూచించారు.

ఈ పరిణామాల నేపథ్యంలో సీఎం రేవంత్ రెడ్డి, ఎంపీ వేం నరేందర్ రెడ్డిలతో కలసి యశోద ఆస్పత్రికి వెళ్లారు. చికిత్స పొందుతున్న గవర్నర్ శివప్రతాప్ శుక్లాను ప్రత్యక్షంగా కలిసి ఆయన ఆరోగ్య స్థితిగతులను అడిగి తెలుసుకున్నారు. గవర్నర్ శస్త్రచికిత్స వివరాలను ప్రస్తుత హెల్త్ అప్‌డేట్‌ను సీనియర్ వైద్యుల బృందం ముఖ్యమంత్రికి వివరించింది. గవర్నర్ త్వరగా కోలుకుని పూర్తి ఆరోగ్యంతో ప్రజాసేవలో పునరంకితం కావాలని సీఎం ఈ సందర్భంగా ఆకాంక్షించారు. రాజ్ భవన్ వర్గాల సమాచారం ప్రకారం, గవర్నర్ ఆరోగ్యం మెరుగ్గా ఉందన్న వార్త విని ప్రజాప్రతినిధులు, ప్రముఖులు సంతోషం వ్యక్తం చేశారు. ఆయన పూర్తి స్థాయిలో కోలుకునే వరకు కొద్దిరోజుల పాటు అధికారిక సమీక్షలు, పర్యటనలకు దూరంగా ఉండే అవకాశం ఉంది.

 

Shiv Pratap Shukla, Telangana Governor Health Update, Yashoda Hospital Hyderabad, Revanth Reddy Visit Governor, Heart Surgery Stent, Telangana Political News