ప్రభుత్వ పాఠశాలలో ఓ టెన్త్ అమ్మాయిపై ఓ సైకో చేసిన దాడి సంచలనం సృష్టించింది.  చదువుకోవడానికి వెళ్లిన ఓ బాలికపై సైకో పాల్పిడిన రాక్షస దాడి పాఠశాలల్లో బాలిక భద్రతను ప్రశ్నార్థకం చేసింది.  అనంతపురం జిల్లాలోని రాప్తాడులోని  ప్రభుత్వ ఉన్నత పాఠశాలలో ఈ దారుణం చోటుచేసుకుంది. పాఠశాల నడుస్తున్న వేళ, ఎవరూ ఊహించని విధంగా ఒక వ్యక్తి   నేరుగా పాఠశాల పరిసరాల్లోకి ప్రవేశించి టెన్త్ చదువుతున్న  గోపిక లక్ష్మి అనే విద్యార్థినిపై   విచక్షణారహితంగా దాడికి  పాల్పడ్డాడు.  చెట్లను కత్తిరించడానికి ఉపయోగించే  ట్రీ కట్టర్ మెషిన్ తో ఆ వ్యక్తి చేసిన దాడి అందరినీ భయాందోళనలకు గురి చేసింది. బెంబేలెత్తించింది.  

ఈ   దాడిలో గోపిక లక్ష్మి తీవ్రంగా గాయపడింది. . పాఠశాల సిబ్బంది, స్థానికులు ఆమెను  హుటాహుటిన అనంతపురం ప్రభుత్వ ప్రధాన ఆసుపత్రికి తరలించారు. ప్రస్తుతం ఆమెకు ఐసీయూలో చికిత్స అందిస్తున్నారు.   సమాచారం అందిన వెంటనే స్థానిక పోలీసులు  పాఠశాలకు చేరుకుని  కేసు నమోదు చేశారు. బాలికపై దాడికి పాల్పడి పరారైన నిందితుడి కోసం గాలింపు చర్యలు చేపట్టారు.  అసలు ఈ దుండగుడు పాఠశాలలోకి ఎలా ప్రవేశించాడు. ఆ బాలికపై దాడికి కారణాలేంటి? అనే కోణంలో దర్యాప్తు చేస్తున్నారు.  ఈ ఘటనతో విద్యార్థుల తల్లిదండ్రులు, ఉపాధ్యాయులు తీవ్ర ఆందోళన చెందుతున్నారు.  

[Raptadu School Attack, Pcyco, Tree Cutter Attack, Government, School, Telugu One]