ఆసియా క్రీడల బ్యాడ్మింటన్‌ షెడ్యూల్‌పై భారత స్టార్ షట్లర్‌, రెండుసార్లు ఒలింపిక్ పతక విజేత పీవీ సింధు అసంతృప్తి వ్యక్తం చేశారు. క్రీడాకారులకు తగినంత విశ్రాంతి సమయం ఇవ్వకుండా వరుసగా మ్యాచ్‌లు నిర్వహించడం వల్ల శారీరకంగా తీవ్ర ఒత్తిడి ఎదురవుతుందని ఆమె పేర్కొన్నారు. మహిళల సింగిల్స్ క్వార్టర్‌ ఫైనల్లో చైనాకు చెందిన చెన్‌ యూ ఫీ చేతిలో సింధు 11-21, 21-18, 21-10 తేడాతో ఓటమి పాలయ్యారు. మ్యాచ్ అనంతరం మాట్లాడిన ఆమె.. కేవలం 24 గంటల వ్యవధిలో మూడు సింగిల్స్ మ్యాచ్‌లు ఆడాల్సి రావడం చాలా కష్టంగా మారిందని తెలిపారు.

“24 గంటల్లో మూడు మ్యాచ్‌లు ఆడటం కేవలం మానసిక సన్నద్ధతకు సంబంధించిన విషయం కాదు. సుదీర్ఘమైన మ్యాచ్‌లు ఆడిన తర్వాత శరీరానికి కచ్చితంగా విశ్రాంతి అవసరం. ఆటలో మంచి స్థితిలో ఉన్నప్పటికీ.. సరైన రికవరీ సమయం లేకపోతే అలసట కారణంగా కాళ్లు సహకరించవు” అని సింధు పేర్కొన్నారు.శనివారం సింధు రెండు మ్యాచ్‌లు ఆడారు. రెండో మ్యాచ్ స్థానిక కాలమానం ప్రకారం ఆదివారం తెల్లవారుజామున ఒంటిగంట సమయంలో ముగిసింది. ఆ తర్వాత కొన్ని గంటల వ్యవధిలోనే మధ్యాహ్నం 1:30 గంటలకు చెన్‌ యూ ఫీతో క్వార్టర్‌ ఫైనల్‌ మ్యాచ్‌ ఆడాల్సి వచ్చింది.

షెడ్యూల్ మరింత మెరుగ్గా ఉంటే తాను మెరుగైన ప్రదర్శన ఇచ్చే అవకాశం ఉండేదని సింధు అభిప్రాయపడ్డారు. అంతర్జాతీయ స్థాయి టోర్నమెంట్లలో క్రీడాకారుల రికవరీ సమయాన్ని పరిగణనలోకి తీసుకుని మ్యాచ్‌లను షెడ్యూల్ చేయాలని ఆమె సూచించారు. మరో భారత షట్లర్ ఉన్నతి హుడా కూడా మ్యాచ్‌ల షెడ్యూలింగ్‌పై అసంతృప్తి వ్యక్తం చేశారు. ఒకే రోజు రెండు, మూడు మ్యాచ్‌లు ఆడాల్సి రావడం వల్ల క్రీడాకారులు అలసిపోతున్నారని చెప్పారు. అయితే తన క్వార్టర్‌ ఫైనల్‌ ఓటమికి షెడ్యూల్‌నే కారణంగా చూపబోనని స్పష్టం చేశారు.

మరోవైపు, కోర్టుల్లో ఆధునిక సాంకేతిక పరిజ్ఞానం అందుబాటులో లేకపోవడంపైనా సింధు అసంతృప్తి వ్యక్తం చేశారు. కీలకమైన లైన్‌ కాల్స్‌పై రివ్యూ కోరే అవకాశం లేకపోవడం మ్యాచ్‌లలో ఇబ్బందులకు దారితీస్తోందని పేర్కొన్నారు.క్రీడాకారుల శారీరక సామర్థ్యం, రికవరీ సమయం, మ్యాచ్‌ల తీవ్రతను పరిగణనలోకి తీసుకుని భవిష్యత్‌ టోర్నమెంట్ల షెడ్యూల్‌ను రూపొందించాల్సిన అవసరం ఉందని సింధు వ్యాఖ్యలు మరోసారి చర్చకు తెచ్చాయి.

 

 

 

[ PV Sindhu, Asian Games badminton scheduling, PV Sindhu criticism, Telugu Asian Games Badminton,  Sindhu Reaction, Sindhu Comments, Sindhu Defeat, Chen Yufei, Unnati Hooda, Indian Badminton, Sports News, Match Schedule, Athlete Recovery ]