ప్రపంచ క్రీడా యవనికపై భారతదేశం తనదైన ముద్ర వేస్తూ దూసుకుపోతున్న తరుణంలో, అంతర్జాతీయ క్రీడల్లో మన దేశ భాగస్వామ్యాన్ని సరికొత్త శిఖరాలకు తీసుకెళ్లాల్సిన అవసరం ఎంతైనా ఉందని ప్రధాని నరేంద్ర మోదీ స్పష్టం చేశారు. ప్రపంచంలోనే అతిపెద్ద క్రీడోత్సవమైన ఓలింపిక్స్‌లో భారత్ పాత్ర కేవలం ప్రాతినిధ్యానికే పరిమితం కాకుండా, క్రీడా నిర్వహణతో పాటు పతకాల సాధనలోనూ అగ్రస్థానంలో నిలవాలన్నది నవ భారత్ లక్ష్యమని ఆయన ఉద్ఘాటించారు. దేశంలో క్రీడా రంగాన్ని ఒక సమగ్ర వ్యవస్థగా అభివృద్ధి చేస్తూ, అంతర్జాతీయ స్థాయి ఛాంపియన్లను తయారుచేయడానికి కేంద్ర ప్రభుత్వం పక్కా ప్రణాళికతో ముందుకు సాగుతోంది. 140 కోట్లకు పైగా జనాభా కలిగిన మన దేశంలో ప్రతిభకు కొదువ లేదని, గ్రామీణ స్థాయిలో ఉన్న యువ రత్నాలను వెలికితీసి అంతర్జాతీయ వేదికలపై మెరిపించడమే ప్రభుత్వ ప్రాధాన్యత అని మోదీ వెల్లడించారు.

గత కొన్నేళ్లలో భారత క్రీడా రంగంలో చోటుచేసుకున్న విప్లవాత్మక మార్పులను పరిశీలిస్తే, క్రీడాకారులకు అందిస్తున్న ప్రోత్సాహం ఏ స్థాయిలో ఉందో స్పష్టమవుతుంది. ఖేలో ఇండియా, టార్గెట్ ఒలింపిక్ పోడియం స్కీమ్ (TOPS) వంటి పథకాల ద్వారా వందలాది మంది అథ్లెట్లకు ప్రపంచస్థాయి శిక్షణ, మౌలిక సదుపాయాలు మరియు ఆర్థిక సహాయం అందుతున్నాయి. గతంలో ఓలింపిక్స్ లేదా ఆసియా క్రీడల్లో భారత్ పరిమిత క్రీడాంశాల్లో మాత్రమే పతకాలు సాధించేది. కానీ నేడు అథ్లెటిక్స్, బ్యాడ్మింటన్, షూటింగ్, బాక్సింగ్, రెజ్లింగ్, ఆర్చరీ వంటి అనేక విభిన్న విభాగాల్లో భారతీయ అథ్లెట్లు ప్రపంచ వేదికలపై త్రివర్ణ పతాకాన్ని ఎగరవేస్తున్నారు. ఆసియా క్రీడల్లో చారిత్రాత్మకంగా 100కి పైగా పతకాల మార్కును దాటడం, టోక్యో మరియు పారిస్ ఓలింపిక్స్‌లో సాధించిన ఆశాజనక ఫలితాలు భారత క్రీడాకారుల మానసిక బలాన్ని, ఆత్మవిశ్వాసాన్ని నిరూపించాయి.

అయితే ఇక్కడితో ఆగిపోకూడదని, రాబోయే రోజుల్లో భారత్ ప్రపంచ క్రీడా శక్తిగా రూపాంతరం చెందాలని ప్రధాని ఆకాంక్షించారు. ఈ దిశగా 2036 ఓలింపిక్స్ క్రీడల నిర్వహణ హక్కులను కైవసం చేసుకోవడమే భారత్ లక్ష్యంగా పెట్టుకుందని ఆయన స్పష్టం చేశారు. 2036 ఒలింపిక్స్ అతిథ్య హక్కులు సాధించడం 140 కోట్ల మంది భారతీయుల దశాబ్దాల కల. అంతేకాకుండా అంతకుముందే 2029లో జరగబోయే యూత్ ఓలింపిక్స్‌ను కూడా భారతదేశంలోనే నిర్వహించేందుకు సిద్ధంగా ఉన్నామని ప్రకటించడం ద్వారా భారత్ తన సన్నాహక స్థాయిని ప్రపంచానికి చాటిచెప్పింది. ముంబైలో జరిగిన 141వ అంతర్జాతీయ ఒలింపిక్ కమిటీ (IOC) సెషన్‌లో భారతదేశపు ఈ దృఢ సంకల్పాన్ని అంతర్జాతీయ క్రీడా సమాజం ముందు ప్రధాని బలంగా వినిపించారు. 1983 తర్వాత దాదాపు 40 సంవత్సరాల విరామం తర్వాత భారత్‌లో ఐఓసీ సమావేశం జరగడం మన దేశ క్రీడా దౌత్యంలో ఒక కీలక మలుపుగా మారింది.

 

 

 

india bidding for 2036 olympic games,modi speech on indian sports development.