గ్లోబల్ టెక్నాలజీ ప్రపంచంలో ఒక ఊహించని పెద్ద మార్పు చోటుచేసుకుంటోంది. గడచిన కొన్నేళ్లుగా టారిఫ్‌ల భయాలు, భౌగోళిక రాజకీయ ఉద్రిక్తతల కారణంగా చైనాను విడిచిపెట్టి థాయిలాండ్, వియత్నామ్ వంటి ఆగ్నేయాసియా దేశాలకు తరలివెళ్లిన ప్రముఖ కంప్యూటర్ తయారీ దిగ్గజాలు.. ఇప్పుడు మళ్లీ తమ ప్లాంట్లను చైనాకే మార్చుకోవడానికి మొగ్గు చూపుతున్నాయి. హెచ్‌పీ (HP), అసుస్ (Asus), ఏసర్ (Acer) వంటి దిగ్గజ గ్లోబల్ బ్రాండ్లు తమ ప్రొడక్షన్ లైన్లను తిరిగి చైనాకు తరలిస్తుండగా, ప్రపంచంలో మూడో అతిపెద్ద పీసీ తయారీ సంస్థ అయిన డెల్ (Dell) కూడా ఇదే విధమైన నిర్ణయం తీసుకునేందుకు తీవ్రంగా ఆలోచిస్తోంది. గతంలో 'చైనా ప్లాన్ పక్కనబెట్టి వేరే దేశాలకు వెళ్లాలి' అని అనుకున్న హెచ్‌పీ, 2025 నాటికి అమెరికాకు ఎగుమతి అయ్యే 90 శాతానికి పైగా మదర్‌బోర్డుల తయారీని థాయిలాండ్, వియత్నాంలకు మార్చిన అసుస్ సంస్థలు, ఇప్పుడు హఠాత్తుగా ఈ రివర్స్ గేర్ ఎందుకు వేశాయనేది టెక్ వర్గాల్లో పెద్ద చర్చనీయాంశంగా మారింది.

ఈ సంచలన మార్పునకు ప్రధాన కారణం కృత్రిమ మేధస్సు (AI) విప్లవం వల్ల విపరీతంగా పెరిగిపోయిన హార్డ్‌వేర్ కాంపొనెంట్ ధరలు మరియు ప్రొడక్షన్ కాస్ట్ ఒత్తిళ్లేనని విశ్లేషకులు స్పష్టం చేస్తున్నారు. ల్యాప్‌టాప్‌లు మరియు పీసీల తయారీ ఖర్చులను ఒకసారి పరిశీలిస్తే, 2025 మొదటి త్రైమాసికంలో ప్రాసెసర్లు, డిరామ్ (DRAM) మరియు ఎస్‌ఎస్‌డీ (SSD) నిల్వ సాధనాల వ్యయం ఒక సాధారణ నోట్‌బుక్ బిల్ ఆఫ్ మెటీరియల్స్ (BOM) లో 45 శాతంగా ఉండేది. కానీ 2026 మూడో త్రైమాసికం నాటికి ఈ కాంపొనెంట్ల వాటా ఏకంగా 68 శాతానికి పెరిగిపోయింది. మరోవైపు కంప్యూటర్ టోటల్ కాస్ట్‌లో మెమరీ, స్టోరేజ్ పరికరాల వాటా 15 శాతం నుంచి ఏకంగా 40 శాతానికి ఎగబాకింది. గ్లోబల్ మార్కెట్‌లో డిమాండ్‌కు తగినట్లుగా మెమరీ చిప్‌ల సరఫరా లేకపోవడంతో, 2026 మూడో త్రైమాసికంలో గ్లోబల్ పీసీ షిప్‌మెంట్లు ఏకంగా 20.1 శాతం తగ్గి కేవలం 62.7 మిలియన్ యూనిట్లకు పడిపోయాయి. ఇందులో హెచ్‌పీ సంస్థ షిప్‌మెంట్స్ ఏకంగా 30.9 శాతం పడిపోగా, అసుస్ కూడా 8.6 శాతం క్షీణతను నమోదు చేసింది.

కంప్యూటర్ స్పేర్ పార్ట్స్ ధరలు కొండెక్కి కూర్చోవడంతో బ్రాండ్లకు హార్డ్‌వేర్ మార్జిన్లు దారుణంగా పడిపోయాయి. దాంతో అసెంబ్లీ, ఇంజనీరింగ్ మరియు లాజిస్టిక్స్ ఖర్చులను వీలైనంత వరకు తగ్గించుకోవడం ఒక్కటే ల్యాప్‌టాప్ తయారీదారులకు ఏకైక మార్గంగా మారింది. అందుకే చైనాకు చెందిన లక్స్‌షేర్ (Luxshare), హువాచిన్ టెక్నాలజీ (Huaqin Technology), లాంగ్‌చీర్ (Longcheer) వంటి కాంట్రాక్ట్ మ్యానుఫ్యాక్చరింగ్ సంస్థలు తక్కువ ధరకు అసెంబ్లింగ్ సేవలు అందిస్తూ బ్రాండ్లను ఆకర్షిస్తున్నాయి. ఈ చైనా అసెంబ్లర్లు ఇంజనీరింగ్, టూలింగ్ ఫీజులను పూర్తిగా మినహాయించడమే కాకుండా, చైనా స్వదేశీ మెమరీ చిప్ తయారీ సంస్థ అయిన సిఎక్స్ఎమ్‌టి (CXMT) ఉత్పత్తి చేసే చవకైన డిరామ్ చిప్‌లను త్వరితగతిన అందిస్తామని హామీ ఇస్తున్నాయి. ఇప్పటికే హెచ్‌పీ, అసుస్, ఏసర్ కంపెనీలు చైనాలోని CXMT చిప్‌లను పరీక్షించి ఆమోదించాయి మరియు వాటితో తయారు చేసిన నోట్‌బుక్‌లను ఇతర దేశాలకు ఎగుమతి చేయడం కూడా ప్రారంభించాయి.

 

 

 

[HP, Asus, Acer, Dell, China PC Manufacturing, Global PC Market, AI Hardware Demand, DRAM Memory Chips, CXMT, Laptop Manufacturing Costs]