అంతర్జాతీయ క్రీడా ప్రపంచంలో ఎన్నో విచిత్రాలు, అరుదైన సంఘటనలు జరుగుతుంటాయి. కానీ క్రికెట్ చరిత్రలోనే ఎప్పుడూ చూడని ఒక వినూత్న దృశ్యం ఆసియా క్రీడలు 2026 వేదికగా ఆవిష్కృతమైంది. జపాన్‌లోని ఐచి-నాగోయాలో జరుగుతున్న ఈ ఆసియా క్రీడల్లో భాగంగా నిషిన్‌లోని కొరోగి స్పోర్ట్స్ పార్క్‌లో సెప్టెంబరు 25 శుక్రవారం రోజున ఒమన్, హాంకాంగ్ జట్ల మధ్య పురుషుల క్రికెట్ మ్యాచ్ జరిగింది. ఈ మ్యాచ్‌లో హాంకాంగ్ చేతిలో ఒమన్ జట్టు 41 పరుగుల తేడాతో ఓటమి పాలైనప్పటికీ, మ్యాచ్ ఫలితం కంటే ఒమన్ ప్రకటించిన ప్లేయింగ్ ఎలెవన్ ఇప్పుడు ప్రపంచవ్యాప్తంగా క్రీడాభిమానుల దృష్టిని విశేషంగా ఆకర్షిస్తోంది. ఎందుకంటే ఒమన్ తుది జట్టులో ఒకే ఇంటిపేరు ఉన్న ఏకంగా ఏడుగురు ఆటగాళ్లు ఒకేసారి మైదానంలోకి దిగి చరిత్ర సృష్టించారు. కేవలం ప్లేయింగ్ ఎలెవన్‌లోనే కాకుండా, మొత్తం ఒమన్ స్క్వాడ్‌ను పరిశీలిస్తే ఒకే ఇంటిపేరు గల ఆటగాళ్లు తొమ్మిది మంది ఉండటం మైండ్ బ్లోయింగ్ నిజం.

సుఫియాన్ మహమూద్ నాయకత్వంలో బరిలోకి దిగిన ఒమన్ మైదానంలోకి దింపిన 11 మంది ప్లేయర్లలో ఏకంగా ఏడుగురి పేర్ల చివర 'అల్ బలూషి' అనే ఇంటిపేరే ఉంది. మహమ్మద్ అల్ బలూషి, షుయైబ్ అల్ బలూషి, జుబైర్ అల్ బలూషి, వహీద్ అల్ బలూషి, ఈసా అల్ బలూషి, నవీద్ అల్ బలూషి, ఫారిస్ అల్ బలూషి కలిసి మ్యాచ్ ఆడారు. ఇక రిజర్వ్ బెంచ్ మీద ఉన్న వసీమ్ అల్ బలూషి, కైస్ అల్ బలూషిలను కూడా కలుపుకుంటే ఈ టోర్నీ స్క్వాడ్‌లో ఏకంగా తొమ్మిది మంది అల్ బలూషి కుటుంబానికి చెందిన వారే ఉన్నారు. మైదానంలో వ్యాఖ్యాతలకు కూడా ఏ బలూషి ఎటు వైపు ఫీల్డింగ్ చేస్తున్నారో గుర్తుపట్టడం ఒక పెద్ద సవాలుగా మారింది.

ఈ మ్యాచ్‌లో మరో ఆసక్తికరమైన అంశం ఏమిటంటే, ఒమన్ ఇన్నింగ్స్‌ను ప్రారంభించిన మొదటి నలుగురు బ్యాటర్లు కూడా ఈ బలూషి కుటుంబ సభ్యులే కావడం విశేషం. మహమ్మద్ అల్ బలూషి, షుయైబ్ అల్ బలూషి, జుబైర్ అల్ బలూషి, వహీద్ అల్ బలూషి వరుసగా 1 నుంచి 4 స్థానాల్లో బ్యాటింగ్‌కు వచ్చారు. అయితే హాంకాంగ్ బౌలర్ల ధాటికి వీరెవరూ ఆశించిన స్థాయిలో భారీ స్కోర్లు చేయలేకపోయారు. ఈ ఆటగాళ్ల అంతర్జాతీయ టీ20 ట్రాక్ రికార్డును పరిశీలిస్తే, మహమ్మద్ అల్ బలూషి ఈ ఏడాదే ఒమన్ తరఫున అంతర్జాతీయ టీ20 అరంగేట్రం చేసి ఇప్పటివరకు 6 మ్యాచ్‌లు ఆడాడు. ఈ ఏడాది జూన్ 3న బహ్రెయిన్‌పై చేసిన 81 పరుగులే ఇతని కెరీర్ అత్యుత్తమ స్కోరుగా ఉంది. 30 ఏళ్ల ఆల్‌రౌండర్ షుయైబ్ అల్ బలూషి 6 టీ20లు ఆడి 117 పరుగులు చేయడంతో పాటు 4 వికెట్లు పడగొట్టాడు. జుబైర్ అల్ బలూషి ఖాతాలోనూ 6 టీ20లు ఉండగా, వహీద్ అల్ బలూషి హాంకాంగ్‌తో జరిగిన ఈ మ్యాచ్ ద్వారానే అంతర్జాతీయ క్రికెట్ అరంగేట్రం చేశాడు. బౌలింగ్ విభాగంలో నవీద్ అల్ బలూషి 5 టీ20లు ఆడి 7 వికెట్లు తీశాడు, సింగపూర్‌పై అరంగేట్ర మ్యాచ్‌లోనే 22 పరుగులిచ్చి 4 వికెట్లు తీయడం ఇతని కెరీర్ బెస్ట్ ప్రదర్శన. మరో ఆటగాడు ఫారిస్ అల్ బలూషి 2 టీ20 మ్యాచ్‌లు ఆడి 10 పరుగులు చేశాడు. ఒకే కుటుంబానికి చెందిన ఇంతమంది ఆటగాళ్లు ఒకే జాతీయ జట్టుకు ప్రాతినిధ్యం వహించడం క్రికెట్ ప్రపంచంలో ఒక అరుదైన రికార్డుగా నిలిచిపోతుంది.

 

 

 

[Asian Games 2026, Oman Cricket Team, Hong Kong vs Oman, Al Balushi Family, Oman Cricket, Men’s T20 Cricket, Aichi Nagoya 2026, Sufyan Mahmoud, Al Balushi Players, Cricket Records]