భారత మహిళా క్రికెట్ యువ ఆల్‌రౌండర్ నిక్కీ ప్రసాద్ అంతర్జాతీయ టీ20 క్రికెట్‌లో అరుదైన అరంగేట్రంతో సరికొత్త ప్రపంచ రికార్డును నెలకొల్పారు. జింబాబ్వే మహిళా జట్టుతో   టీ20 సిరీస్ లో భాగంగా ఆదివారం (అక్టోబర్ 18) జరిగిన రెండో మ్యాచ్‌లో బౌలింగ్ వేసే అవకాశం దక్కించుకున్న ఆమె, అసాధారణ ప్రదర్శనతో అందరి దృష్టినీ ఆకట్టుకున్నారు. అంతర్జాతీయ క్రికెట్ కెరీర్‌లో తాను వేసిన తొలి రెండు బంతుల్లోనే వరుసగా రెండు వికెట్లు పడగొట్టి, టీ20 క్రికెట్ చరిత్రలోనే ఈ ఘనత సాధించిన మూడో బౌలర్‌గా చరిత్రకెక్కారు.

జింబాబ్వేతో ఆదివారం జరిగిన జరిగిన రెండో మ్యాచ్‌లో కెప్టెన్ స్మృతి మంధాన బంతిని నిక్కీ ప్రసాద్‌ చేతికి ఇవ్వగా, ఆమె అద్భుతమైన నియంత్రణతో బౌలింగ్ చేశారు. వేసిన మొదటి బంతికే ముగేరిని క్యాచ్ అవుట్ చేసి పెవిలియన్‌కు పంపగా, ఆ తర్వాతి బంతికే న్యాషా గ్వాంజురాను ఎల్బీడబ్ల్యూగా అవుట్ చేసి దెబ్బతీశారు. దీంతో అంతర్జాతీయ టీ20ల్లో తన కెరీర్ మొదట్లోనే వరుసగా రెండు బంతులకు రెండు వికెట్లు సాధించిన తొలి భారత మహిళా బౌలర్‌గా, అంతర్జాతీయంగా మూడో క్రికెటర్‌గా నిక్కీ అరుదైన రికార్డు నమోదు చేశారు.

ఈ సిరీస్‌లోని మొదటి మ్యాచ్‌లోనే నిక్కీ ప్రసాద్ బ్యాటింగ్‌లోనూ తన సత్తా చాటారు. జట్టు కష్టాల్లో ఉన్న సమయంలో నిలకడగా ఆడి 35 బంతుల్లో 39 పరుగులు చేసి విజయంలో కీలక పాత్ర పోషించారు. బ్యాటింగ్, బౌలింగ్ రెండింటిలోనూ ఒత్తిడికి లోనుకాకుండా పరిణతి చెందిన ఆటతీరును ప్రదర్శించడంతో క్రికెట్ విశ్లేషకులు, అభిమానులు ఆమెపై ప్రశంసల వర్షం కురిపిస్తున్నారు.గతంలో భారత అండర్-19 ప్రపంచకప్ విజేత జట్టుకు సారథ్యం వహించిన అనుభవం కూడా ఆమెకు ఎంతగానో ఉపయోగపడింది.

ఈ మ్యాచ్ విశేషాల్లోకి వెళితే, జింబాబ్వే నిర్ణీత ఓవర్లలో విధించిన 103 పరుగుల స్వల్ప లక్ష్యాన్ని టీమిండియా కేవలం 8.5 ఓవర్లలోనే ఛేదించింది. దీంతో 2-0 తేడాతో మూడు మ్యాచ్‌ల టీ20 సిరీస్‌ను భారత్ మరో మ్యాచ్ మిగిలి ఉండగానే చేజిక్కించుకుంది. భారత జట్టు సమష్టి ప్రదర్శనతో విజయాన్ని అందుకోగా, నిక్కీ సాధించిన రికార్డు మ్యాచ్‌లోనే విశేష ఆకర్షణగా నిలిచింది.

కెరీర్ ఆరంభంలోనే ఇటు బ్యాట్‌తోనూ, అటు బంతితోనూ సంచలన ప్రదర్శనలు చేస్తూ భారత్‌కు నమ్మకమైన ఆల్‌రౌండర్‌గా నిక్కీ ప్రసాద్ ఎదుగుతున్నారు. భారత మహిళా జట్టులో సుదీర్ఘకాలం పాటు కొనసాగే సత్తా ఆమెకు ఉందనడానికి ఈ ఘనతే నిదర్శనమని క్రీడా నిపుణులు భావిస్తున్నారు. రాబోయే మ్యాచ్‌లలో కూడా ఆమె ఇదే ఊపును కొనసాగించి మరిన్ని విజయాలు అందించాలని అభిమానులు కోరుకుంటున్నారు.

[Nikki Prasad record, T20 International Women cricket, Team India Women, India vs Zimbabwe T20, Telugu One]